Bixbaꞌnt Pawl tan xtxoleꞌn scyetz yi eꞌ yi nkꞌeꞌtz eꞌ judiy
3
1 Jun cuꞌn cyakil yi xtxolbilaꞌseꞌj. Chaꞌstzun te yi in wetz yi in Pawl, atin xetzeꞌ tan tuꞌ yi xomchin te Cristo Jesús. Ej nin atin xetzeꞌ tan paj yi ja intxol yi balaj stziblal scyeruꞌ, yi eꞌuꞌ yi nkꞌeꞌtz eꞌuꞌ judiy. 2 Ja loꞌ wiꞌt quibituꞌ yi tan tuꞌ banl talmaꞌ Ryos, akꞌij yi jun tareyaꞌtz swetz. 3 Ja loꞌ wiꞌt quibituꞌ yi ja lajluchax tzinwutz yi tajbil Ryos yi ewaꞌn cuntuꞌ sajleꞌnix tunintz. Na benak intzꞌibal jun tir scyeruꞌ yi mbiꞌtz yi txumijt tan iꞌ. 4 Ej nin kol chisiꞌlejuꞌ yi jun cartaꞌtz, tzꞌelepon chitxumuꞌ tetz yi elnak intxum tetz yi mbiꞌtz yi tajbil Ryos te Cristo. 5 Yi jun xtxolbilaꞌtz quinin lajluchax ẍchiwutz yi eꞌ wunak tenẍchan. Poro yi jaluꞌ tan porer yi Espíritu Sant ja lajluchax skawutz ketz yi oꞌ apostl, nin ẍchiwutz yi eꞌ elsanl stziꞌ Ryos. 6 Yi xtxolbileꞌj yi ja wiꞌt lajluchax skawutz, iꞌtz yi jun kawutz sbneꞌ scyuchꞌuꞌ tan tilweꞌn yi balaj tiemp yi at tulbil. Na ja lajluchax yi junit kutaneꞌn scyuchꞌuꞌ jaluꞌ. Nin ja lajluchax yi ketz scyuchꞌuꞌ cyakil yi sukiꞌnt cyen tan Ryos tentz. Ẍchicambokuꞌ te cyakil yi xtxolbilaꞌtz tan tuꞌ yi na cyocsajuꞌ yi balaj stziblal tetz Cristo Jesús. 7 Yi wetz inmunl yi akꞌij swetz iꞌtz tan xtxoleꞌn yi jun balaj stziblalaꞌtz. Poro ja akꞌlij yi jun munlaꞌtz swetz tan tuꞌ banl talmaꞌ Ryos. 8 Na yi in wetz na el intxum tetz yi quiꞌc wetz inkꞌej. Ajnak tzaj inkꞌej ẍchiwutz cyakil yi eꞌ mas yi ateꞌ tkꞌab Ryos. Poro tan tuꞌ banl talmaꞌ Ryos ja takꞌ iꞌ amaꞌl swetz tan xtxoleꞌn yi balaj stziblal scyetz cyakil eꞌuꞌ, yi nkꞌeꞌtz eꞌuꞌ judiy. Ja takꞌ iꞌ amaꞌl swetz tan xtxoleꞌn yi ẍeꞌn cunin taneꞌn yi banl talmaꞌ Cristo skibaj, yi banl talmaꞌ iꞌ yi quinin bajsbeꞌn tetz. 9 Nin nchaꞌtz ja takꞌ iꞌ amaꞌl swetz tan lajluchaxeꞌn ẍchiwutzuꞌ yi ẍeꞌn sban yil tzꞌel cuꞌn te yi tajbil iꞌ, yi ewaꞌn cun tuꞌ taꞌn le xeꞌtzbil tzaj. Yi junaꞌtz yi makꞌon amaꞌl swetz yaꞌstzun yi Ryos yi mbnon tetz cyakil yi eꞌchk takleꞌn yi at. 10 Poro yi tajbil iꞌ yi ewaꞌn cun tuꞌ taꞌn sajleꞌnix tunintz, iꞌtz tan kaxconeꞌn yi oꞌ ketz yi oꞌ cmon creyent tan lajluchaxeꞌn yi balajil yi tajtzaꞌkl iꞌ ẍchiwutz cyakil eꞌ ajcaw yi ateꞌ tcyaꞌj. 11 Yaꞌstzun tulej Ryos na yi tajbil iꞌ sajleꞌnix tunintz iꞌtz tan xconeꞌn Cristo Jesús tan banleꞌn yi tetz tajbil.12 I bin jaluꞌ tan tuꞌ yi kokꞌbeꞌnt kib tu Cristo, nin tan tuꞌ yi kꞌuklij kacꞌuꞌl te iꞌ, at rmeril tan kajiloneꞌn tu Ryos. Quiꞌt kaxob tan yol tetz jaluꞌ. 13 Chaꞌstzun te na cuꞌ inwutz scyeruꞌ tan qui chicabeluꞌ chicꞌuꞌluꞌ te Ryos tan yi qꞌuixcꞌuj yi atin cuꞌnt wetz, na iꞌtz tan takꞌoneꞌn baꞌn scyeruꞌ.
Yi ẍeꞌn cuꞌn na pekꞌ Cristo skeꞌj
14 Chumbalaj nin yi txumijt tan Kataj skeꞌj. Chaꞌstzun te na chinmejeꞌ swutz iꞌ, yi taj Kajcaw Jesucristo. 15 Nchaꞌtz iꞌ chitaj cyakil jilwutz wunak yi ocnakeꞌ tkꞌab yi eꞌ yi ateꞌ wuxtxꞌotxꞌ, nin yi eꞌ yi ja wiꞌt chopon tcyaꞌj. 16 Chin cham nin iꞌ, nin wiꞌnin tetz kꞌej. Chaꞌstzun te na chintzan tan cꞌucheꞌn tetz tan toqueꞌn iꞌ tan chiquiwseꞌnuꞌ tan porer yi Espíritu Sant. 17 Nin na chintzan tan cꞌucheꞌn tetz tan kꞌukeweꞌn mas chicꞌuꞌluꞌ teꞌj bantz najeweꞌn Cristo scyeꞌjuꞌ. Nin bantz pujxeꞌn cyanuꞌ scyuchꞌ yi eꞌ mas creyent yi quiꞌc maꞌlbil tetz yi loꞌkl Kataj squibajuꞌ. 18 Nin na incꞌuch tetz Kataj yi nink chilokꞌ quibuꞌ squibil quibuꞌ bantz pujxeꞌn cyanuꞌ, scyuchꞌ yi eꞌ mas creyent yi jatnaꞌ cunin na jop yi loꞌkl Cristo skibaj. Na chumam nin loꞌkl Cristo skibaj. Qui bajsbeꞌn tetz. Chin wutz nin taneꞌn; nin chin tkan nin taneꞌn; nin chin xeꞌ nin taneꞌn; nin chin wutz tkan nin taneꞌn. 19 Na na waj yi nink tzꞌel chitxumuꞌ tetz yi ẍeꞌn cunin na pekꞌ Cristo skeꞌj. Poro quiꞌc loꞌ rmeril tan teleꞌn katxum tetz, na chumam nin. Na incꞌuch tetz Kataj cyakil yi eꞌchk xtxolbilaꞌseꞌj, na na waj yil tzꞌel chitxumuꞌ tetz, bantz nojeꞌn cyalmaꞌuꞌ tan cyakil yi balajil Ryos.
20 Kakꞌeꞌ bin kakꞌajsbil tetz Kataj yi jun yi baꞌn na xcyeꞌ tan banleꞌn cyakil yi eꞌchk takleꞌn yi na kacꞌuch tetz. Na tan tuꞌ yi xomij yi porer iꞌ skeꞌj, xcyeꞌ iꞌ tan banleꞌn cyakil yi eꞌchk takleꞌn yi tu na icyꞌ tuꞌ tkacꞌuꞌl. Ej nin nkꞌeꞌtz ntinaꞌtz ma na nchaꞌtz na xcyeꞌ tan banleꞌn alchok eꞌchk takleꞌn yi qui na el katxum tetz. 21 Lok jal yi kꞌej Kataj tan yi cmon creyent nin tan Cristo Jesús tetz ben kꞌej ben sak. Amén.