Junit yi cmon creyent na iꞌtz yi wankil Cristo taneꞌn
4
1 Ja wiꞌt quibituꞌ cyakil yi eꞌchk xtxolbilaꞌseꞌj. Chaꞌstzun te yi in wetz yi atin pres tan tuꞌ yi xomchin te Kajcaw, na cuꞌ inwutz scyeruꞌ, tan qui teleꞌn xtxꞌix yi balaj stziblal tetz Cristo. Na txaꞌij cheꞌtuꞌ tan jalseꞌn kꞌej iꞌ. 2 Cyocseꞌ bin quibuꞌ juy. Chichajeꞌuꞌ yi chiputzpaluꞌ. Nimit chicꞌuꞌluꞌ scyeꞌj wunak. Chimuqꞌueꞌuꞌ paj junt tan ẍchajleꞌn yi na chipekꞌuꞌ teꞌj. 3 Nin tan porer yi Espíritu Sant yi najlij scyeꞌjuꞌ chibneꞌuꞌ puers tan jaleꞌn yi tzatzin paz ẍchixoꞌluꞌ. Nin chijoyeꞌuꞌ puntil tan qui xiteꞌn yi jun lokꞌ ibaꞌtz. 4 Na junit cyakil creyent tkꞌab Cristo. Na jun ntziꞌ Espíritu Sant at skaxoꞌl. Nin jun ntziꞌ takleꞌn yi kawutz quen teꞌj, yi oꞌ yi moxoꞌn nkasaj tan Ryos. 5 Nin jun ntziꞌ Kajcaw at. Nin jun ntziꞌ xtxolbil yi kꞌuklij kacꞌuꞌl teꞌj. Nin jun ntziꞌ bautism yi na bajij skeꞌj, tan ẍchajleꞌn yi junit oꞌ tu Cristo. 6 Nchaꞌtz jun ntziꞌ Kataj Ryos at skibaj. Nin oꞌ len cuꞌn xconsbeꞌtz iꞌ. Na xomquen tunin iꞌ skeꞌjak.7 Akꞌij len yi banl iꞌ skeꞌjak, xomquen tunin te yi kamunl yi akꞌij sketz tan Cristo. 8 Na je jun xtxolbil yi alijt cyen:
“Yi tajeꞌnt tcyaꞌj,
eꞌ aj tcyꞌal wiꞌnin eꞌ yi ateꞌ pres.
Poro yi ntaxk aj,
cyaj cyen xtxumul yi eꞌchk chimunl yi eꞌ
yi itzꞌeꞌt, yi eꞌ yi na chixom teꞌj.”a
9 Yi yol yi na tal: “Yi tajeꞌn iꞌ tcyaꞌj,” na elepont yi bajx ja ulak iꞌ wuxtxꞌotxꞌ. 10 Ej nin iteꞌn nin iꞌaꞌtz yi ajtz jalen tziꞌn tcyaꞌj, tan toqueꞌn tetz wiꞌtz Ajcaw tibaj cyakil. 11 Yi ntaxk aj ja chibixeꞌ cyen cobox tan chixconeꞌn tetz apostl. Nin at jujun yi ja chibixeꞌ cyen taꞌn tetz elsanl stziꞌ Ryos. Nin at eꞌ yi ja chibixeꞌ taꞌn tetz chipstor nin chusul cyetz yi eꞌ cmon creyent. 12 Ej nin ja takꞌ eꞌchk munlaꞌtz scyetz yi eꞌaꞌtz bantz cyoqueꞌn yi eꞌ mas cmon tetz balaj, bantz chixconeꞌn tetz Ryos, nin tan chiquiwseꞌn cyakil yi cmon yi chi wankil Cristo taneꞌn. 13 Ej nin akꞌlij eꞌchk munlaꞌtz sketz jalen cuꞌn yi junit sban kajtzaꞌkl te yi na kocsaj, nin jalen cuꞌn yil tzꞌel cunin katxum tetz yi mbi ekaꞌn tan yi Cyꞌajl Ryos. Nin akꞌij eꞌchk munlaꞌtz sketz jalen cuꞌn lkacyꞌelcyꞌax tkꞌab Kataj, nin jalen cuꞌn kajepon te yi tajtzaꞌkl Cristo, yi jun yi chin tzꞌaknak cuꞌn. 14 Ko yaꞌtz kaban nkꞌeꞌtz choꞌn skabneꞌ chi quitaneꞌn yi eꞌ nitxaꞌ yi txeꞌn jal cyajtzaꞌkl, yi tunin na joꞌjkel tuꞌ cyajtzaꞌkl. Quiꞌt bin xom kawiꞌ te eꞌchk jilwutz chusuꞌn yi apart. Nin quiꞌt kaxubsij cyakꞌun yi eꞌ yi chin list nin eꞌ tan chisubleꞌn kajwutz. 15 Ma na kachajeꞌ yi xomchoꞌ te yi bintzi tan yi lokꞌ ib yi at skuchꞌ. Kajepon tzuntz tan stzꞌamleꞌn yi tajtzaꞌkl Cristo yi ketz kawiꞌ banl wiꞌ. 16 Na ko atoꞌ jakꞌ caꞌwl iꞌ mpe nin skꞌil na kanucꞌ kib. Nin pe nin skꞌil na kucyꞌaj kib. Quiꞌc na ban yi ko aparchk len yi eꞌchk kamunl yi akꞌij sketz, ntin kol xcon len kaꞌn. Nin kol kachaj yi lokꞌ ib, squiwixk tzun yi cmon Cristo, yi wankil iꞌ taneꞌn.
Tajweꞌn yil koꞌc tetz acꞌaj wunak
17 I bin jaluꞌ swaleꞌ jun xtxolbil scyeruꞌ tan biꞌ Kajcaw, nin copon inwutz scyeruꞌ tan chibnoluꞌ taneꞌn: Quiꞌt chixomuꞌ te eꞌchk ajtzaꞌkl cachiꞌ, chi na chiban yi eꞌ mas wunak, na quiꞌc na takꞌ. 18 Yi eꞌaꞌtz yi ateꞌ tul tzꞌoꞌtz wutzil, chijatxoꞌn quib tu yi itzꞌajbil yi choꞌn na jal tu Ryos. Na xubsnak cyajtzaꞌkl nin chin pajpuj nin eꞌ. 19 Qui na chitxꞌixwij tan yi eꞌchk takleꞌn cachiꞌ yi na chiban, nin cyakꞌoꞌnt quib tan chibnol yi eꞌchk takleꞌn yi chin xaꞌbil nin. Nternin na quicyꞌsaj chicꞌuꞌl tan banleꞌn yi cyetz cyajbil.
20 Poro yi eꞌ cyeruꞌ nkꞌeraꞌtz yi mmaꞌw cyanuꞌ te Cristo, 21 yi ko bintzi ja oc le chiwiꞌuꞌ yi xtxolbil yi bintzinin tetz yi quibitnakuꞌ, yi xtxolbil yi choꞌn na saj te Jesús. 22 Ko bintzinin na chixomuꞌ te yi bintzi quiꞌt bin chixomuꞌ te cyajtzaꞌkluꞌ yi xomnakeꞌuꞌ teꞌj sajleꞌn, yi ntin nxcyeꞌ tan chisubleꞌnuꞌ nin tan chipoꞌtzeꞌnuꞌ. 23 Ma na tajweꞌn yil jal jun acꞌaj cyajtzaꞌkluꞌ. 24 Tajweꞌn yil choꞌcuꞌ tetz acꞌaj wunak yi na chixom te yi tajbil Ryos. Tajweꞌn yil choꞌcuꞌ tetz jun acꞌaj wunak yi quiꞌc muꞌẍ chipaltiluꞌ swutz Ryos.
25 Chaꞌstzun te quiꞌt chijaluꞌ jun wi cyakꞌuꞌ, ma na cyaleꞌuꞌ yi mero bintzi squibil quibuꞌ. Na junit oꞌ tkꞌab Cristo, niꞌcuꞌn chi oꞌ lenk jun wekl yi wankil iꞌ.
26 Quil cyakꞌuꞌ amaꞌl tetz yi chiꞌch cꞌuꞌlal tan chipitleꞌn ninuꞌ tul il. Mas balaj yil chixitcunuꞌ yi ẍchiꞌchbeꞌn chicꞌuꞌluꞌ yi ntaxk cuꞌ kꞌej. 27 Qui tzun cyakꞌuꞌ amaꞌl tetz yi Baybaꞌn.
28 Ej nin yi eꞌ yi ateꞌ ẍchixoꞌluꞌ yi eꞌ alkꞌom sajleꞌn, jun cuꞌn quileꞌ cyen yi jun ajtzaꞌklaꞌtz. Baꞌn tcuꞌn chakꞌujk tan jaleꞌn yi tajweꞌn scyetz nin tan quichꞌeyeꞌn yi eꞌ mas yi at tajweꞌn scyetz.
29 Quil chiyoluꞌ eꞌchk xyablaj yol, ma na baꞌn tcuꞌn chiyoleꞌuꞌ balaj yol yi xcyek tan ẍchꞌeyeꞌn yi jun yi na tzan tan tbiteꞌn, nin tan takꞌoneꞌn baꞌn tetz. 30 Quil cyakꞌuꞌ bis tetz yi Espíritu Sant yi najlij te kalmaꞌ. Na iꞌ jun kechl yi oꞌ tetz Ryos. Nin tan tuꞌ yi at iꞌ te kalmaꞌ jun cuꞌn kelepon liwr yil tzꞌul yi wiꞌtzbil kꞌejlal.
31 Chixit cunuꞌ cyakil eꞌchk cyakal makꞌmal, tu cyakil yi eꞌchk chiꞌch cꞌuꞌlal yi at tetz cyalmaꞌuꞌ. Chicyajscyenuꞌ yi eꞌchk oyintziꞌ, tu eꞌchk jisoꞌn, tu cyakil yi eꞌchk takleꞌn cachiꞌ. 32 Quil chibanuꞌ yi eꞌchk takleꞌnaꞌseꞌj ma na chibneꞌuꞌ jun baꞌn squibil quibuꞌ. Elk chikꞌajabuꞌ te junt, chicuyeꞌuꞌ chipajuꞌ squibil quibuꞌ chi ncuy Kataj yi ketz kapaj tan tuꞌ yi nkoꞌc tkꞌab Cristo.