Yi eꞌchk caꞌwl yi tajweꞌn tan kabnol taneꞌn
5
1 Chijoyeꞌuꞌ bin puntil tan cyoqueꞌnuꞌ chi taneꞌn Kataj Ryos, na eꞌuꞌ nitxajil iꞌ, nin nternin okꞌleꞌn chiwutzuꞌ taꞌn. 2 Chilokꞌeꞌ quibuꞌ squibil quibuꞌ, chi banak Cristo skeꞌj ketz na ja takꞌ tib iꞌ tetz kaxel. Ja takꞌ tib iꞌ tetz katxꞌixwatz, chi jun oy yi nternin na opon cꞌoꞌcal swutz Ryos.3 Txaꞌij cheꞌtuꞌ tan chixconeꞌnuꞌ tetz Ryos, chaꞌstzun te quil cyakꞌuꞌ amaꞌl tetz yi xnaꞌniꞌn nka yajiꞌn, nka alchok jilwutz takleꞌn cachiꞌ yi na el nin cyalmaꞌuꞌ teꞌj. Nchaꞌtz baꞌn tcuꞌn quil kayol yi eꞌchk takleꞌnaꞌtz. 4 Quil chiyoluꞌ eꞌchk yol yi chin txꞌixwil nin. Nin quil chiyoluꞌ yi eꞌchk takleꞌn yi chin juntlen nin yi na chiban wunak. Nin quil chixkꞌeꞌlinuꞌ te yi eꞌchk xtxolbilaꞌtz. Na qui na yub yi eꞌchk yolaꞌtz. Mas baꞌn tcuꞌn yi nink chiyoluꞌ yi banl talmaꞌ Ryos, nink chityoẍinuꞌ tetz. 5 Na jun cuꞌn cyakil yi eꞌ aj xnaꞌninl nka aj yajinl scyuchꞌ cyakil yi eꞌ yi na chiban yi eꞌchk takleꞌn cachiꞌaꞌtz, quiꞌc cyocleꞌn cyeꞌtz te yi jun balaj tiemp yil tzꞌoc Cristo tu Ryos tan cawuꞌn. Nchaꞌtz cyakil yi eꞌ yi xkan tzaj nin na cyaj, quiꞌc cyocleꞌn cyeꞌtz te yi jun tiempaꞌtz yil cawun Cristo, na niꞌcuꞌn yi jun ajtzaꞌklaꞌtz tu yi najk chimejeꞌuꞌ swutz jun ryos yi banij cuntuꞌ taneꞌn. 6 Chaꞌstzun te quil cyakꞌuꞌ amaꞌl scyetz wunak tan chisubleꞌnuꞌ tan yi eꞌchk yol yi quiꞌc na takꞌ sketz. Na tan paj eꞌchk yolaꞌtz stkꞌeꞌ Ryos chicaws yi eꞌ pajol caꞌwl. 7 Xomiꞌch tzun chiwiꞌuꞌ-tz scyeꞌj.
8 Yaꞌstzun quitaneꞌnuꞌ sajleꞌn. Ateꞌuꞌ tul tzꞌoꞌtz wutzil. Poro yi jaluꞌ ateꞌuꞌ tul tkan skil taneꞌn tan tuꞌ yi junit eꞌuꞌ tu Kajcaw. Ja pujx yi tajbil Ryos cyanuꞌ. Chixomok binuꞌ-tz teꞌj. 9 Na kol kaxom te tajbil Ryos yi niꞌcuꞌn tu jun txekbil, kocopon tetz balaj nak, yi baꞌn kꞌukeꞌ chicꞌuꞌl wunak skeꞌj. Na sjalok kabalajil swutz Ryos nin ẍchiwutz wunak. 10 Chijoyeꞌuꞌ bin puntil tan banleꞌn eꞌchk takleꞌn yi na tzatzin Ryos teꞌj. 11 Quil chibanuꞌ yi eꞌchk takleꞌn yi na chiban yi eꞌ yi ateꞌ tul tzꞌoꞌtz wutzil, na quiꞌc na xtxicbaj sketz. Baꞌn tcuꞌn yil skojax chipaltil cyanuꞌ nin yil chimakuꞌ chiwutz. 12 Poro chin txꞌixwil nin yi nink kayolbej te yi eꞌchk takleꞌn cachiꞌaꞌtz yi na chiban ewun cuꞌn. 13 Poro yil skojax ẍchiwutz qui cunin batz xcyek tan xtxꞌixpeꞌn cyajtzaꞌkl tan chixoneꞌn tul yi tkan skil. 14 Chi alijt cyen tul jun xtxolbil:
“Chin watum, elk awatl.
Cawleꞌn tzaj ẍchixoꞌl yi eꞌ quimnak quitaneꞌn tkꞌab yi ilcꞌol.
Nin tzꞌocopon Cristo tetz atxekbil.”
15 Or bin quiluꞌ kajwutz yi mbi na chibanuꞌ. Quil chibanuꞌ chi na chiban yi eꞌ yi quiꞌc cyajtzaꞌkl. Ma na choꞌkuꞌ tzꞌaknak cuꞌn. 16 Te yi at amaꞌl choꞌkuꞌ il tan banleꞌn yi takꞌun Ryos, na atoꞌ tul yi cꞌaꞌlaj tiemp. 17 Quil quicyꞌajuꞌ chiyaꞌbl yi eꞌ yab, ma na choꞌkuꞌ il tan teleꞌn chitxumuꞌ te yi tajbil Kajcaw. 18 Quil tzꞌoc aꞌ ẍchiwiꞌuꞌ, na na xcyeꞌ tan kapitleꞌn nin tul il. Baꞌn tcuꞌn cyakꞌeꞌuꞌ amaꞌl tetz yi Espíritu Sant tan chitzatzineꞌnuꞌ. 19 Nin yi na chijilonuꞌ squibil quibuꞌ baꞌn xcon eꞌchk balaj bitz cyanuꞌ chi taneꞌn eꞌchk salmos yi na takꞌ kꞌej Kataj Ryos. Nin tetz cuꞌn cyalmaꞌuꞌ cyakꞌeꞌuꞌ chikꞌajsbiluꞌ swutz iꞌ tan eꞌchk balaj bitz. 20 Na tajweꞌn yi ilenin chityoẍinkuꞌ tetz Kataj Ryos tan cyakil yi na takꞌ iꞌ scyeruꞌ. Nin chityoẍinkuꞌ tetz tan biꞌ Kajcaw Jesucristo.
Jun najal yi creyent tajweꞌn yil chilokꞌ quib
21 Tan tuꞌ yi na cyekuꞌ ẍchiꞌ Ryos chichajeꞌuꞌ yi chicꞌulutxumiluꞌ squibil quibuꞌ.
22 Yi eꞌ xnaꞌn tajweꞌn yil choꞌc cꞌulutxum jakꞌ caꞌwl yi quimichil chi quitaneꞌnuꞌ jakꞌ caꞌwl Kajcaw Jesucristo. 23 Na yi chmil jun xnaꞌn iꞌ ajcaw te yi xnaꞌn, chi taneꞌn Cristo skeꞌj ketz yi oꞌ cmon creyent. Iꞌ ajcaw skeꞌj, na iꞌ colol ketz, yi oꞌ cmon creyent, yi oꞌ yi chi wankil iꞌ taneꞌn. 24 Na chi kutaneꞌn ketz jakꞌ caꞌwl Cristo yi oꞌ cmon creyent, nchaꞌtz yi eꞌ xnaꞌn tajweꞌn tan cyoqueꞌn cꞌulutxum jakꞌ caꞌwl quichmil.
25 Poro nchaꞌtz yi eꞌ yaj tajweꞌn tan chilokꞌil wutz quixkel. Tajweꞌn yil chipekꞌ scyeꞌj chi yi pekꞌeꞌn yi banak Cristo skeꞌj, yi tkꞌol tib tetz kaxel. 26 Ej nin yaꞌstzun tulej iꞌ-tz tan kaxansajeꞌn yi oꞌ yi oꞌ cmon iꞌ. Na ja katxꞌajxij tan aꞌ nin tan yi yol iꞌ. 27 Ej nin yaꞌstzun tulejtz bantz nternin na kayub yil kopon swutz iꞌ. Na yaꞌstzun tulej bantz qui jaleꞌn jun tal niꞌ manch skeꞌj, tu muꞌẍ tal kayaꞌchil, nka alchok jilwutz kapaltil. Na yi tajbil iꞌ iꞌtz tan koqueꞌn tetz tzꞌaknak cuꞌn, nin tan qui jaleꞌn muꞌẍ tal kil.
28 Tajweꞌn bin yil pekꞌ jun yaj te txkel, chi na pekꞌ Cristo skeꞌj ketz yi oꞌ cmon. Tajweꞌn yil lokꞌ wutz yi txkel, chi na lokꞌ iꞌ yi tetz wankil, na alchok scyetz yi na lokꞌ wutz yi txkel, na tzun lokꞌ tibtz. 29 Na cyaꞌl jun yi najk chiꞌch cꞌuꞌl stibil tib, ma na nternin na cꞌaꞌch tib. Nin nternin na qꞌuicyꞌlej tib. Ej nin yaꞌstzun na ban Cristo skeꞌj ketz yi oꞌ cmon. Na yi oꞌ ketz yi oꞌ cmon niꞌcuꞌn yi oꞌ-k wankil iꞌ taneꞌn. 30 Niꞌcuꞌn chi oꞌ lenk wekl yi wankil iꞌ taneꞌn. Niꞌcuꞌn chi oꞌ lenk ẍchꞌel iꞌ taneꞌn. Na oꞌ wankil iꞌ taneꞌn. 31 Chaꞌstzun te na til cyen jun yaj yi taj xtxuꞌ tan tokꞌbel tib tu yi txkel. Ej nin yi na cyokꞌbej quib yi jun lmujaꞌtz junit chiwankil na ban. 32 Wiꞌnin na jop yi chusuꞌneꞌj yi qui na pujx cyakꞌun wunak poro na chintzan tan xtxꞌolcheꞌn xoꞌl yi ẍeꞌn taneꞌn Cristo tu yi cmon creyent. 33 Poro nchaꞌtz na jop yi eꞌ cyeruꞌ, tajweꞌn yil chilokꞌuꞌ wutz yi quixkeluꞌ, chi na chilokꞌuꞌ yi cyeruꞌ chiwankiluꞌ chijunalenuꞌ. Poro ilenin tajweꞌn yil cyek ẍchiꞌ yi eꞌ xnaꞌn yi quichmil.