6
1 Axwok nitxaꞌ nin axwok xicy, tajweꞌn tan itoqueꞌn cꞌulutxum jakꞌ caꞌwl itaj itxuꞌ, na atixwok tkꞌab Kajcaw. 2 “Lokꞌwok itaj itxuꞌ,” na yaꞌstzun yi bajx caꞌwl yi at txꞌacoꞌn teꞌj. 3 Na na tal yol Kataj yi katzatzink, nin mben ẍkon yi katiemp tzoneꞌj wuxtxꞌotxꞌ yi kol kaban taneꞌn.a \p 4 Ma yi eꞌuꞌ yaj yi at chinitxajiluꞌ: Quil cyakꞌuꞌ chiꞌch cꞌuꞌlal scyetz. Ma na chijoyeꞌuꞌ puntil tan chichꞌuyseꞌn tkꞌab Kataj. Tajweꞌn tan chichusleꞌn, nin tan makleꞌn chiwutz.5 Ma yi eꞌ cyeruꞌ yi eꞌuꞌ mos, choꞌkuꞌ cꞌulutxum jakꞌ caꞌwl yi chipatrónuꞌ, na tajweꞌn yil cyekuꞌ chichiꞌ. Nchaꞌtz na taj yi tetz cuꞌn cyalmaꞌuꞌ chakꞌujuꞌ scyuchꞌ, na niꞌcuꞌn yi chi ik tetz Cristo yi akꞌun yi na chitzanuꞌ tan banleꞌn. 6 Tajweꞌn tan cyakꞌujeꞌnuꞌ poro nkꞌeꞌtz ntin yi ateꞌ chipatrónuꞌ tan chixmayeꞌnuꞌ, ma na nchaꞌtz mpe quibeꞌk. Nin tetz cuꞌn cyalmaꞌuꞌ na taj, na yaꞌstzun tajbil Ryos. 7 Tzatzin cuꞌn chakꞌujuꞌ chi ik tetz Ryos yi akꞌun yi na chitzanuꞌ tan banleꞌn. Quil chitxumuꞌ yi tetz cun tuꞌk yi taw yi akꞌun. 8 Na elnak chitxumuꞌ tetz yi quiꞌc na ban yi ko oꞌ mos nka quiꞌ, na stkꞌeꞌ Ryos jun oy sketz, tetz xel yi balaj akꞌun yi na bnix kakꞌun. Tunin xom cyen tuꞌ te yi balajil yi kakꞌun yi mbnix kaꞌn.
9 Nchaꞌtz yi eꞌ cyeruꞌ yi eꞌuꞌ patrón, tajweꞌn yil chixomuꞌ te yi iteꞌn nin ajtzaꞌklaꞌtz. Choꞌkuꞌ cꞌulutxum jakꞌ caꞌwl yi cyeruꞌ chipatrónuꞌ. Quil chibuchunuꞌ scyeꞌj chimosuꞌ, na elnak chitxumuꞌ tetz yi at jun ntziꞌ chipatrónuꞌ scyuchꞌ yi eꞌ chimosuꞌ yi choꞌn at jalen tziꞌn tcyaꞌj. Nin quiꞌc nim, quiꞌc juy swutz iꞌ.
Yi chimaꞌcl yi cmon creyent tan chicolol quib
10 I bin jaluꞌ eꞌuꞌ wajwutz je junt xtxolbileꞌj tan stzajseꞌn wiꞌ inyol. Quiwit tkꞌab Kataj, na chin cham nin iꞌ tan kuchꞌeyeꞌn. 11 Chiwekeꞌ quibuꞌ tan yi eꞌchk maꞌcl yi na tzan Ryos tan takꞌleꞌn sketz, bantz kaxcyeweꞌn cuꞌn swutz yi Baybaꞌn, yi subul cyetz wunak. 12 Na nkꞌeꞌtz eꞌ tu wunak yi na kaban kib scyuchꞌ, ma na yi mero kacontr iꞌtz yi eꞌ espíritu cwent Baybaꞌn yi na chicawun tzoneꞌj wi munt, eꞌ taw akꞌbal, eꞌ ẍchakum Baybaꞌn yi na chixon tul cyekꞌekꞌ. 13 Chaꞌstzun te tajweꞌn tan xconeꞌn cyakil yi eꞌchk maꞌcl yi na tzan Ryos tan takꞌleꞌn sketz, bantz kaxcyeweꞌn cuꞌn ẍchiwutz yi eꞌ ẍchakum Baybaꞌnaꞌtz. Ej nin yi na ul yi eꞌchk cꞌaꞌlaj tiemp ẍchiwutzuꞌ chixcyek cunuꞌ swutz, jalen cuꞌn yi naꞌ nin lchitzajpontuꞌ. 14 Quiwit bin, benk quikanuꞌ ttxꞌotxꞌ. Chipascyenuꞌ yi bintzi scyeꞌjuꞌ, chi na oc pasuꞌn jun cꞌalbil xe cꞌuꞌl jun sanlar. Choꞌkuꞌ tzꞌaknak cuꞌn. Chixomokuꞌ te eꞌchk ajtzaꞌkl yi jicyuch teꞌj. Na ko yaꞌtz kaban niꞌcuꞌn tzuntz yi chi atk jun colol wutz cꞌuꞌl sanlar yi chꞌichꞌ cuꞌn skeꞌj. 15 Chibneꞌuꞌ list quibuꞌ tan xtxoleꞌn yi balaj stziblal yi cyꞌaꞌn tzatzin paz taꞌn, chi na chiban yi eꞌ sanlar, yi at cyen tunin yi chixajab ẍchikan, na list cuntunin eꞌ tan oyintziꞌ. 16 Nin kꞌukek cunin chicꞌuꞌluꞌ te Ryos tan chicolol quibuꞌ. Na yi ko kꞌuklij kacꞌuꞌl te Ryos niꞌcuꞌn jun ajtzaꞌklaꞌtz chi jun makbil flech yi na xcon cyakꞌun sanlar tan chicolol quib. Na ko jun cuꞌn kꞌuklij kacꞌuꞌl quil kaloꞌon tan eꞌchk takleꞌn yi na ul bow skeꞌj tan Baybaꞌn yi niꞌcuꞌn tu flech yi cyꞌaꞌn kꞌakꞌ taꞌn. 17 Ej nin ok tetz cyajaluꞌ yi ja wiꞌt chiclaxuꞌ, na yi jun ajtzaꞌklaꞌtz niꞌcuꞌn tu jun casco yi na xcon cyakꞌun sanlar tan colcheꞌn chiwiꞌ. Nin tajweꞌn yil xcon yi yol Kataj cyanuꞌ tan chicolol quibuꞌ, na yaꞌstzun maꞌcl yi na takꞌ yi Espíritu Sant sketz. 18 Nin quil chitaneꞌuꞌ tan nachleꞌn Kataj tan porer yi Espíritu Sant. Nin quil chitaneꞌuꞌ tan cꞌucheꞌn yi ẍchꞌeybil cyeruꞌ tetz. Elk chiwatluꞌ, nin quil chikꞌeꞌxijuꞌ tan nachleꞌn Kataj squibaj cyakil yi eꞌ yi ateꞌ tkꞌab Ryos. 19 Nin nchaꞌtz chinacheꞌuꞌ Kataj swibaj bantz tkꞌol Kataj Ryos weltil inyol yil noꞌc tan xtxꞌolcheꞌn xoꞌl yi mbi ekaꞌn tan yi balaj stziblal. Nchaꞌtz chinacheꞌuꞌ Kataj tan qui inxobeꞌn. 20 Chakij chin tan Ryos tan xtxoleꞌn yi balaj stziblal, nin tan tuꞌ yi na intxol, atin tcaren. Chinacheꞌuꞌ bin Kataj swibaj bantz quil chinxob tan xtxoleꞌn yi balaj stziblal, na yaꞌstzun intarey.
Stzajsbil wiꞌ yol Pawl
21 I bin jaluꞌ tan quibitaluꞌ intziblal tzinchakeꞌ nin kajwutz Tíquico ẍchixoꞌluꞌ. Chumbalaj nin iꞌ, wiꞌnin na chimpekꞌ teꞌj, na iꞌ jun ẍchusbeꞌtz Kataj. 22 Chaꞌstzun te na chintzan tan ẍchakleꞌn nin iꞌ ẍchixoꞌluꞌ tan talcheꞌn scyeruꞌ yi ẍeꞌn kutaneꞌn. Yil tzꞌopon iꞌ, tzꞌocopon tan chichꞌeyeꞌnuꞌ, nin tan chimayseꞌnuꞌ.
23 Lok takꞌ Kataj Ryos tu Kajcaw Jesucristo yi tzatzin paz scyeruꞌ eꞌuꞌ wajwutz. Ej nin lok kꞌukeꞌ mas chicꞌuꞌluꞌ teꞌj, nin lok jal mas lokꞌ ib ẍchixoꞌluꞌ tan porer Kataj Ryos. 24 Takꞌ tzaj bin Kataj Ryos yi banl squibuꞌ, cyakil eꞌuꞌ yi qui na icyꞌ chipajuꞌ tan ẍchajleꞌn yi na chipekꞌuꞌ te Kajcaw Jesucristo. Amén.