Yi cꞌulutxumil Jesús tu tetz kꞌej
2
1 I bin jaluꞌ kajwutz tan tuꞌ yi na el chitxumuꞌ tetz yi na tzan Cristo tan quichꞌeyeꞌnuꞌ, junit bin sban cyajtzaꞌkluꞌ, nin tan tuꞌ yi na el chitxumuꞌ tetz yi at lokꞌ ib ẍchixoꞌluꞌ tan tuꞌ Cristo; junit bin sban cyajtzaꞌkluꞌ. Ej nin tan tuꞌ na el chitxumuꞌ tetz yi choꞌn najlij yi porer Cristo scyeꞌjuꞌ bantz teleꞌn chikꞌajabuꞌ squibil quibuꞌ, junit bin sban cyajtzaꞌkluꞌ. 2 Ej nin ko yaꞌtz lchibanuꞌ sjalok jun chin tzatzin swetz. Chilokꞌeꞌ bin quibuꞌ squibil quibuꞌ, nin junit sban chitxumuꞌnuꞌ. 3 Quil chiban lenuꞌ ntin yi cyeruꞌ cyajbiluꞌ. Nin quil cyocsaj quibuꞌ nim. Ma na choꞌk lenuꞌ cꞌulutxum. Choꞌkuꞌ tan xtxumleꞌn yi at len cyajtzaꞌkl yi eꞌ mas cyuchꞌuꞌ. 4 Quil chitxumuꞌ yi ntin yi cyeruꞌ cyajtzaꞌkluꞌ baꞌn bnix, ma na baꞌn chixomuꞌ te cyajbil yi eꞌ mas.5 Chixomokuꞌ te yi ẍeꞌn cuꞌn ban tajtzaꞌkl Jesucristo.
6 Wech, Ryos iꞌ, poro quinin ban yi tetz tajbil.
7 Cyaj tilol iꞌ yi tcyaꞌj, nin ul itzꞌok tzoneꞌj wuxtxꞌotxꞌ chi wunak taneꞌn. Tocsaj tib chi jun chakum.
8 Ej nin mas tcuꞌn tocsaj tib tetz juy tu tajtzaꞌkl, na takꞌ tib tkꞌab quimichil, jun quimichil yi chin txꞌixwil nin.
9 Chaꞌstzun te tkꞌol Ryos mas kꞌej iꞌ, nin oc jun biꞌ yi mas tcuꞌn kꞌej swutz alchok scyetz biꞌajil.
10 Nin cyakil yi eꞌ yi ateꞌ tcyaꞌj, scyuchꞌ cyakil wunak yi ateꞌ wuxtxꞌotxꞌ, tircuꞌn eꞌ ẍchimejek len yil quibit nin yi biꞌ Jesús.
11 Na tzantzaj tzꞌelepon len chitxum cyakil wunak tetz, nin scyaleꞌ: Yi Jesucristo yaꞌstzun yi mero Ajcaw. Ej nin tan yi xtxolbilaꞌseꞌj sjalok mas kꞌej Kataj Ryos.
Yi eꞌ yi ateꞌ tkꞌab Cristo niꞌcuꞌn eꞌ tu txꞌuml
12 Ma jaluꞌ wajwutz yi wiꞌnin okꞌleꞌn chiwutzuꞌ waꞌn, chin cꞌulutxum nin eꞌuꞌ sajleꞌn te yi atin tzaj ẍchixoꞌluꞌ. Poro nchaꞌtz jaluꞌ na waj yil choꞌcuꞌ cꞌulutxum. Quiꞌc na ban mpe quibink ẍchixoꞌluꞌ, ntin chijoyeꞌuꞌ puntil tan chiquiwsal quibuꞌ bantz chiclaxeꞌnuꞌ. Chibisunkuꞌ tan quiluꞌ, nin cyekeꞌuꞌ ẍchiꞌ Ryos, 13 na iteꞌn nin iꞌ na tzan tan xtxꞌixpeꞌn kajtzaꞌkl nin tan kuchꞌeyeꞌn tan kabnol yi eꞌchk takleꞌn yi balaj, na yaꞌstzun tajbil iꞌ skeꞌj.
14 Ej nin yi na choꞌcuꞌ tan banleꞌn nka tan xtxumleꞌn alchok eꞌchk takleꞌn, qui na taj wakꞌ ib, nin qui na taj oyintziꞌ. 15 Kol chixomuꞌ te yi xtxolbilaꞌseꞌj, qui tzun ljal quiluꞌ-tz, nin slajluchaxk ẍchiwutz yi eꞌ mal wunak yi bintzinin eꞌuꞌ meꞌl cyꞌajl Ryos. Choꞌn tzun ẍchibneꞌuꞌ ẍchixoꞌl eꞌ mal wunak chi taneꞌn txꞌuml yi na txekun lakꞌbal. 16 Nchaꞌtz ko yaꞌtz quitaneꞌnuꞌ, chintzatzink yil tzꞌul tzaj Cristo, na slajluchaxk yi at jamel wukan, nin nkꞌeꞌtz tan chaꞌtz tuꞌ nnakꞌuj ẍchixoꞌluꞌ. 17 Na tan tuꞌ yi kꞌuklij chicꞌuꞌluꞌ niꞌcuꞌntz chi najk chitzanuꞌ tan takꞌleꞌn jun chitxꞌixwatzuꞌ swutz Ryos. Ej nin kol tzꞌel inẍchꞌel tan paj yi xomchin te Cristo, yaꞌstzun muꞌẍ stzꞌaꞌpl yi cyoyuꞌ sbneꞌ-tz. Nin chintzatzink teꞌj. 18 Chaꞌstzun te quil chibisunuꞌ sweꞌj, ma na chitzatzinkuꞌ na yi in wetz na chintzatzin.
Kaxomok te yi balajil Timoteo
19 Ko yaꞌtz tajbil Kajcaw Jesucristo, mben chan inchakol Timoteo tan chixajseꞌnuꞌ. Chintzatzink yil tzꞌult tzaj tu chitziblaluꞌ. 20 Mben inchakol Timoteo, na quiꞌc nin junt yaj yi na xom te yi wetz wajtzaꞌkl chi taneꞌn iꞌ. Cyaꞌl atit jun yi najk bisun scyeꞌjuꞌ chi taneꞌn Timoteo. 21 At eꞌ cyeraꞌtz yi list ateꞌt tan chixajseꞌnuꞌ, poro ntin na chitzan tan joyleꞌn yi cyetz cyajbil. Qui na chipekꞌ cyeraꞌtz tan banleꞌn taneꞌn yi takꞌun Cristo Jesús. Leꞌn cyetz tuchꞌ. 22 Poro sak ẍchiwutzuꞌ wajwutz yi balajil Timoteo. Quilnakuꞌ yi ẍeꞌn cunin ban iꞌ tan wuchꞌeyeꞌn tan xtxoleꞌn yi balaj stziblal. Na na chꞌeyan iꞌ sweꞌj chi na oc jun yaj tan ẍchꞌeyeꞌn taj. 23 Yi wetz wajbil iꞌtz tan tponeꞌn tan chixajseꞌnuꞌ, poro jalen cuꞌn skojan mbi cuꞌn sbajok sweꞌj. 24 Poro at inchꞌiw te Kajcaw tan wuponeꞌn chan tan chixajseꞌnuꞌ.
Kaxomok te yi balajil Epafrodito
25 Nchaꞌtz baꞌn, chinch wetz, kol tzinchak nin kajwutz Epafrodito te Timoteo. Iꞌ jun tan tijleꞌn qꞌuixcꞌuj te kamunl yi atoꞌ sjuꞌ. Nin sak nin ẍchiwutzuꞌ yi balajil iꞌ, na eꞌ binuꞌ nchakon tzaj iꞌ sweꞌj tan wuchꞌeyeꞌn te yi mbi cuꞌn tajweꞌn swetz. 26 Nchaꞌtz iꞌ, na pekꞌ tan beneꞌn tan chixajseꞌnuꞌ, na at muꞌẍ bis tetz talmaꞌ tan paj yi ja loꞌ chibisunuꞌ yi quibitaluꞌ yi stziblal yi yobteꞌn iꞌ. 27 Bintzinin ja yobtij. Muꞌẍt nin qui quim, poro ja ul tajtzaꞌkl tan Ryos, na ja loꞌ el kꞌajab Ryos sweꞌj, na ja kloꞌ jal mas bis swetz yi nink nquim. Cun peꞌk yi at nin bis swetz. 28 Chaꞌstzun te na waj tzinchak nin ẍchixoꞌluꞌ tan quiloluꞌ wutz, nin tan chitzatzineꞌnuꞌ junt tir tuchꞌ. Nchaꞌtz in, chintzatzink yil tzꞌopon iꞌ ẍchixoꞌluꞌ. 29 Chitzatzinkuꞌ te yil tzꞌopon iꞌ ẍchixoꞌluꞌ, na kajwutz kib tu Epafrodito tkꞌab Jesucristo. Ilenin na waj yil cyakꞌuꞌ kꞌej yi jun jilwutz wunakaꞌtz yi niꞌcuꞌn eꞌ tu Epafrodito, 30 na muꞌẍt qui quim sjuꞌ takꞌun Jesucristo. Tan tuꞌ yi chꞌeyaꞌn yi ban iꞌ sweꞌj, ja kloꞌ quim iꞌ, na tkꞌoꞌn tib tkꞌab quimichil tan wuchꞌeyeꞌn. Yaꞌstzun banak iꞌ, na quiꞌc rmeril tan cyuleꞌn cyeruꞌ tzoneꞌj tan wilweꞌn.