Tajweꞌn kaxomok te yi ẍchusuꞌn Pawl
3
1 Ma jaluꞌ wajwutz, chitzatzinkuꞌ, na eꞌuꞌ tetz Cristo. Nin qui na icyꞌoꞌk impaj tan stzꞌibeꞌn nin yi tajweꞌn tan chitzatzineꞌnuꞌ. Tan yi jun xtxolbilaꞌtz tzꞌakꞌonk baꞌn scyeruꞌ.2 Poro or quiluꞌ yi eꞌ mal nak, na yi eꞌaꞌtz niꞌcuꞌn eꞌ tu txuc. Nin or quiluꞌ na at aj txolinl yi chin cachiꞌ nin na chiban. Nin or quiluꞌ yi eꞌ yi na cyaj choꞌc tan kuxleꞌn chiwankiluꞌ tan cyoqueꞌnuꞌ kloꞌ tetz nitxajil Ryos.
3 Poro yi oꞌ ketz, oꞌ yi mero nitxajil Ryos, na na katzan tan cꞌuꞌlajeꞌn iꞌ tetz cuꞌn kalmaꞌ, nin yaꞌstzun yi techl yi na ẍchaj yi oꞌ tetz Cristo. Chaꞌstzun te qui na kꞌukeꞌ kacꞌuꞌl te yi eꞌchk takleꞌn yi na bajij te kawankil tan koqueꞌn tetz nitxajil Ryos. 4 Na yi yaꞌtzk tajbil Ryos, ja kloꞌ kꞌukeꞌ incꞌuꞌl te eꞌchk qꞌuixcꞌuj yi tijnak inwankil, na cyaꞌl nin junt yi jak icyꞌpon mas qꞌuixcꞌuj taꞌn tzinwutz wetz. 5 Na yi in wetz ja chimbajij circuncidar le wajxokiꞌn kꞌej, na in aj Israel. In xonl kꞌajtzun Benjamín. Nin ja chinxom te ley Moisés, chi taneꞌn chicstumbr yi eꞌ parisey. 6 Chin ẍcꞌatnak nin in te yi na wocsaj sajleꞌn. Chaꞌstzun te ja cheꞌ imbuch cyen yi eꞌ cmon creyent. Nin chin tzꞌaknak cunin in tenẍchan tan banleꞌn taneꞌn cyakil yi eꞌchk takleꞌn balaj yi na tal yi ley Moisés sketz yi tajweꞌn tan kabnol taneꞌn. Cyaꞌl nin jun yi jajk jal impaltil taꞌn. 7 Poro cyakil yi eꞌchk takleꞌnaꞌseꞌj yi chumbalaj nin taneꞌn tzinwutz wetz sajleꞌn, quiꞌct xac jaluꞌ, na yi jaluꞌ choꞌn kꞌuklij incꞌuꞌl te Cristo. Ja jal junt xtxolbil waꞌn yi mas balaj swutz cyakil yi eꞌchk takleꞌnaꞌtz. 8 Na cyakil yi eꞌchk takleꞌn yi mbaj cyen imbnol quiꞌc xac tzinwutz jaluꞌ, na nkꞌeꞌtz choꞌn walil chi walil yi teleꞌn intxum tetz yi mbi ekaꞌn tan Wajcaw Cristo Jesús. Tan tuꞌ yi na chinxom te Cristo, cyajnak cyen wilol cyakil yi eꞌchk takleꞌn yi mimban cyen. Na quiꞌc na takꞌ yi eꞌchk takleꞌnaꞌtz swutz yi txꞌacoꞌn yi at yi ko choꞌn atoꞌ tkꞌab Cristo. 9 Na yi mas balaj iꞌtz, yi junit wutaneꞌn tu Cristo. Poro quinin jal yi imbalajil yi nnoꞌc tan banleꞌn taneꞌn yi ley Moisés. Ma na ja jal imbalajil tan tuꞌ yi choꞌn kꞌuklij incꞌuꞌl te Cristo. Na na takꞌ Ryos chibalajil cyakil yi eꞌ yi choꞌn kꞌuklij chicꞌuꞌl te iꞌ. 10 Ej nin yi wetz wajbil jaluꞌ iꞌtz, tan teleꞌn mas intxum tetz yi mbi ekaꞌn taꞌn, na na waj tzincambaj yi porer yi ẍchajnak iꞌ yi titzꞌeꞌn junt tir ẍchixoꞌl almaꞌ. List in tan mucꞌleꞌn qꞌuixcꞌuj chi banak Jesucristo, nin list in tan inquimeꞌn chi banak iꞌ. 11 Na yi wetz wajbil iꞌtz tan incambal yi itzꞌeꞌn junt tir ẍchixoꞌl almaꞌ.
Kabisunk te kupisyoꞌ
12 Qui na chintzan tan xtxumleꞌn yi jajk wiꞌt noꞌc tetz tzꞌaknak cuꞌn. Poro chinxomok te Cristo, na at inchꞌiw tan woqueꞌn tetz tzꞌaknak cuꞌn. Na yaꞌstzun xac yi injeꞌnleꞌn xtxaꞌol. 13 Qui na chintzan tan talcheꞌn yi jajk wiꞌt chinjepon tuchꞌ. Poro at jun xtxolbil yi na chinxom teꞌj. Iꞌtz yi quiꞌt na chintzan tan xtxumleꞌn yi mbi cuꞌn cyajnak imbnol. Jaltaꞌtz na chintzan tan xtxumleꞌn jaluꞌ, iꞌtz yi ẍeꞌnk tzimban puers tan injeꞌn poneꞌn tamp te wupisyoꞌ. 14 Na na waj chinjepon te wupisyoꞌ bantz incambal yi jun balaj oy yi sukiꞌnt tan Ryos sketz tcyaꞌj. Yaꞌstzun yi oy yi na tzan kaRyosil tan sukeꞌn sketz cyakil yi oꞌ yi atoꞌ tkꞌab Cristo.
15 Chaꞌstzun te cyakil yi oꞌ yi ja kaquiwix muꞌẍ tal, chin tajweꞌn cunin tan kaxomeꞌn te yi jun ajtzaꞌklaꞌtz yi ja wiꞌt wal scyeruꞌ. Poro ko at eꞌ ẍchixoꞌluꞌ yi nkꞌeraꞌtz cyajtzaꞌkl, Ryos chajon puntil scyetz. 16 Poro at jun xtxolbil yi chin tajweꞌn cunin tan kabnol taneꞌn, iꞌtz yi chusuꞌn yi ja wiꞌt lajluchax skawutz.
17 Eꞌuꞌ kajwutz, chixomokuꞌ te wetz wajtzaꞌkl. Ej nin chixomokuꞌ te cyajtzaꞌkl yi eꞌ yi na chitzan tan banleꞌn taneꞌn weri inchusuꞌn. 18 Wajwutz alaꞌix tir wal yi xtxolbileꞌj scyeruꞌ, poro swaleꞌ nin junt tir. At wiꞌnin eꞌ skaxoꞌl yi niꞌcuꞌntz chi eꞌ-k contr te yi quimich yi mban Cristo swutz pasyon, nin na takꞌ bis swetz. 19 Na yi jun jilwutz wunakaꞌtz chisotzok cyeraꞌtz tzantzaj, na ntin na chitzan tan xtxumleꞌn yi ẍeꞌn lnoj chicꞌuꞌl. Niꞌcuꞌntz chi yaꞌtzk chiryosiltz. Na cyocsaj quib nim te yi eꞌchk takleꞌn cachiꞌ yi na chiban, nin qui na chitxꞌixwij taꞌn. Ntin na chitzan tan xtxumleꞌn yi eꞌchk takleꞌn tetz tzoneꞌj wuxtxꞌotxꞌ. 20 Poro yi oꞌ ketz, oꞌ tajlal yi cmon tetz tcyaꞌj. Nin na katzan tan ẍchꞌiweꞌn yi tulbil Kajcaw Jesucristo yi choꞌn tzꞌopon tzaj tcyaꞌj. 21 Iꞌ tzꞌocopon tan xtxꞌixpeꞌn yi jun kawankileꞌj yi chin cachiꞌ nin. Choꞌn sbneꞌ chi taneꞌn yi tetz wankil. Yi porer Kajcaw yi na xcyeꞌ te cyakil eꞌchk takleꞌn, iteꞌn nin poreraꞌtz xconk taꞌn tan katxꞌixpeꞌn.