4
1 Chaꞌstzun te eꞌuꞌ jun cꞌoloj wajwutz, benk quikanuꞌ ttxꞌotxꞌ. Wiꞌnin na chimpekꞌ scyeꞌjuꞌ, nin wiꞌnin na el walmaꞌ tan wilol chiwutzuꞌ. Nin tan tuꞌ yi nchoꞌcuꞌ tkꞌab Cristo nternin na chintzatzin jaluꞌ, na tzantzaj tzꞌakꞌlok inkꞌej.Yi tkꞌol Pawl cobox cyajtzaꞌkl yi eꞌ aj Filipo
2 I bin jaluꞌ naꞌ Evodia tu iluꞌ naꞌ Síntique, na cuꞌ inwutz scyeruꞌ tan chibansal quibuꞌ squibil quibuꞌ na quitzꞌun quitzicy quibuꞌ tkꞌab Kajcaw. 3 Ma aẍatz wajwutz yi toqueꞌn cuꞌn awutaneꞌn te yi kupisyoꞌ yi atoꞌ sjuꞌ, chꞌeyweꞌ yi cob kajwutzaꞌtz, na nchaꞌtz eꞌ, eꞌ jun sweꞌj tan tijleꞌn qꞌuixcꞌuj yi inxeꞌteꞌn cuꞌn tan xtxoleꞌn yi balaj stziblal. Ej nin xomnakeꞌ skeꞌj tu Clement scyuchꞌ yi eꞌ mas kajwutz yi koqueꞌn tan xtxoleꞌn yol Kataj. Yi eꞌ kajwutz Evodia tu Síntique, eꞌ creyent na tzꞌibant chibiꞌ tcꞌuꞌl yi liwr kale tzꞌibaneꞌt chibiꞌ yi eꞌ yi ẍchicambok te yi itzꞌajbil yi quinin bajsbeꞌn tetz. Chꞌeyweꞌ bintz.
4 Ma eꞌuꞌ wajwutz, ilenin chitzatzinkuꞌ tkꞌab Kajcaw. Nin swaleꞌ nin junt tir scyeruꞌ, chitzatzinkuꞌ. 5 Nin chichajeꞌuꞌ chiputzpaluꞌ tu chibalajiluꞌ ẍchiwutz wunak, na txant tan tuleꞌn Kajcaw.
6 Quil chibisunuꞌ tan jun takleꞌn ma na chitxol ninuꞌ tetz Kataj Ryos. Chijakeꞌuꞌ ẍchꞌeybil cyeruꞌ, nin chityoẍinkuꞌ tetz. 7 Ko yaꞌtz chibanuꞌ, stkꞌeꞌ Ryos jun chin tzatzin paz scyeruꞌ, jun tzatzin paz yi cheleponuꞌ yab teꞌj, na xcyeꞌ yi jun tzatzinaꞌtz tan chiquiwseꞌnuꞌ, nin tan xiteꞌn yi bis yi at te cyalmaꞌuꞌ, na yi eꞌ cyeruꞌ ateꞌuꞌ tkꞌab Cristo.
Choꞌkuꞌ tan xtxumleꞌn yi eꞌchk takleꞌn balaj
8 Ma jaluꞌ eꞌuꞌ wajwutz, jaltaꞌtz coboxt yol swaleꞌ nin scyeruꞌ. Choꞌkuꞌ tan xtxumleꞌn ntin yi eꞌchk xtxolbil yi bintzinin tetz, nin yi at xeꞌ. Chitxumeꞌuꞌ yi eꞌchk xtxolbil yi na yub. Nin chitxumeꞌuꞌ yi balaj, nin yi eꞌchk xtxolbil yi na tzatzin Ryos teꞌj. Quil cyakꞌuꞌ amaꞌl tan ticyꞌeꞌn eꞌchk ajtzaꞌkl cachiꞌ chicꞌuꞌluꞌ ma na ntin yi eꞌchk ajtzaꞌkl balaj, yi na tzatzin Ryos teꞌj.
9 Choꞌkuꞌ tan banleꞌn taneꞌn cyakil yi eꞌchk xtxolbil yi eꞌ inchusnakuꞌ teꞌj, yi eꞌchk xtxolbil yi cyajnak cyen incawul tan chixomeꞌnuꞌ teꞌj. Choꞌkuꞌ tan banleꞌn taneꞌn cyakil yi eꞌchk xtxolbil yi quilnakuꞌ nin quibitnakuꞌ sweꞌj. Kol choꞌcuꞌ tan banleꞌn taneꞌn snajank Ryos scyeꞌjuꞌ, yi Ryosaꞌtz yi na akꞌon tzatzin paz sketz.
Yi chibisuneꞌn yi eꞌ aj Filipos te Pawl
10 Wiꞌnin na chintzatzin, nin na intyoẍij tetz Kajcaw, na ja nuꞌlt txꞌakx ẍchicꞌuꞌluꞌ. Poro qui na chintzan tan talcheꞌn yi junawes elnakint tetz cyajaluꞌ. Quiꞌ. Tin tuꞌ loꞌ yi qui njal puntil cyanuꞌ tan takꞌleꞌn tzaj muꞌẍ ẍchꞌeybil wetz. 11 Qui na waj yil choꞌcuꞌ tan xtxumleꞌn yi tu nink na sotz tuꞌ incꞌuꞌl. Na yi in wetz, xomchin quen tuꞌ te yi nicyꞌ naꞌ na ẍchaj Ryos swetz le jujun kꞌej. 12 Elnak intxum tetz mebaꞌil. Ej nin elnak intxum tetz riquil. Naꞌwnakint te cyakil. Quiꞌc na ban yi ko nojnak incꞌuꞌl nka quiꞌ. Naꞌwnakint teꞌj ko na sowrin muꞌẍ imbambil, nka quiꞌ. 13 Na chinxcyeꞌ tan mucꞌleꞌn cyakil, na at Cristo tan wuchꞌeyeꞌn. 14 Poro baꞌn nchibanuꞌ yi nchoꞌcuꞌ tan xtxumleꞌn yi muꞌẍ tal chꞌeybil wetz, na bintzinin atin wutz peꞌm.
15 At ẍchiwutzuꞌ, cyakil yi eꞌuꞌ yi najlcheꞌuꞌ le tnum Filipos, yi ntin eꞌuꞌ ulsan ofrent tinkꞌab tan wuchꞌeyeꞌn. Jetzaꞌtz chixeꞌtleꞌnuꞌ tan wuchꞌeyeꞌn yi wenleꞌn tzaj Macedonia tan xtxoleꞌn yi balaj stziblal. Yaꞌtz cyulejuꞌ tan ẍchajleꞌn yi nternin na chitzatzinuꞌ te yi pawor yi imbanak scyeꞌjuꞌ. 16 Ej nin nchaꞌtz yi atin tzaj Tesalónica ulnak cobox tir ofrent cyanuꞌ swetz tan wuchꞌeyeꞌn. 17 Qui na chintzan tan xtxumleꞌn yi jalt nin cotz tzimban, poro na waj yil tzꞌel chitxumuꞌ tetz yi tan tuꞌ yi na chitzanuꞌ tan wuchꞌeyeꞌn sjalok mas chimebiꞌluꞌ tziꞌn tcyaꞌj. 18 Ma jaluꞌ wajwutz, ja intzꞌam yi muꞌẍ tal oy yi nsaj cyakꞌoluꞌ swetz tan Epafrodito. Sowr mban. Ej nin wiꞌnin na tzatzin Ryos te jun jilwutz oyaꞌtz. Choꞌn na ban cꞌoꞌcal swutz iꞌ chi cꞌoꞌcal insens. 19 Nin tan tuꞌ yi kokꞌbeꞌn kib tu Cristo Jesús, stkꞌeꞌ Kataj Ryos cyakil yi tajweꞌn sketz. Na at tuchꞌ tan tkꞌol sketz, na quinin bajsbeꞌn tetz yi tetz mebiꞌl tziꞌn tcyaꞌj. 20 Kakꞌeꞌ bin kakꞌasbil tetz tetz ben kꞌej ben sak. Amén.
Stzajsbil wiꞌ yol Pawl
21 I bin jaluꞌ eꞌuꞌ wajwutz, cyalquenuꞌ jun yos scyetz cyakil yi eꞌ yi xansaꞌncheꞌt, yi eꞌ yi ateꞌ tkꞌab Cristo. Nchaꞌtz yi eꞌ kajwutz yi ateꞌ tzoneꞌj sweꞌj, na chitzan tan talcheꞌn nin jun yos scyeruꞌ. 22 Nin cyakil yi eꞌ mas yi ateꞌ tkꞌab Ryos tzoneꞌj Roma na chitzanin tan talcheꞌn jun yos scyeruꞌ. Nchaꞌtz yi eꞌ kajwutz yi choꞌn ateꞌ tzoneꞌj tpiltaꞌ na chitzan tan talcheꞌn nin jun yos tetz cyeruꞌ. 23 Takꞌ tzaj bin Kajcaw Jesucristo yi banl iꞌ squibuꞌ. Amén.