4
1 Nchaꞌtz yi eꞌ cyeruꞌ, yi eꞌuꞌ taw akꞌun, tajweꞌn yil tzꞌel chikꞌajabuꞌ te chimosuꞌ. Tzꞌaknak cuꞌn cyulejuꞌ chichojoꞌn na nchaꞌtz eꞌuꞌ at jun chipatrónuꞌ yi choꞌn najlij tcyaꞌj.2 Nchaꞌtz eꞌuꞌ wajwutz, quil chikꞌeꞌxijuꞌ tan nachleꞌn Kataj. Choꞌkuꞌ il teꞌj. Nin cyakil tir yi na choꞌcuꞌ tan nachleꞌn Kataj chityoẍinkuꞌ tetz.
3 Ma jaluꞌ eꞌuꞌ wajwutz, atin xetzeꞌ tan tuꞌ yi nnoꞌc tan xtxoleꞌn yi mbi ekaꞌn tan Cristo. Chaꞌstzun te, yi na choꞌcuꞌ tan nachleꞌn Kataj swibaj, chijakeꞌuꞌ tetz tan tkꞌol mas amaꞌl swetz tan xtxoleꞌn yi mbi ekaꞌn tan Cristo. 4 Nchaꞌtz, chinacheꞌuꞌ Kataj tan jaleꞌn inwalor tan xtxoleꞌn clar cunin yi mbi ekaꞌn tan yi xtxolbil yi na kocsaj, na yaꞌstzun inmunl yi akꞌij swetz.
5 Puntil cuꞌn cyulejuꞌ tan xtxoleꞌn yi yol Kataj scyetz yi eꞌ yi nkꞌeꞌtz eꞌ creyent. Chijoyeꞌuꞌ puntil tan lajluchaxeꞌn yi mbi na cyocsajuꞌ, na qui na kil yi mbi na xom tzaj ek caꞌp. 6 Nin yi na kajilon scyuchꞌ, tajweꞌn tan kajoyol putzpuj yol yi at xtxolbil. Tajweꞌn tan katxumul yi xtxolbil cuꞌn sban kayol yil katzaꞌw nin cyetz chiyol.
Stzajsbil wiꞌ yol Pawl
7 Ma jaluꞌ eꞌuꞌ wajwutz, yil tzꞌopon kajwutz Tíquico scyeꞌjuꞌ, staleꞌ cyakil yi xtxolbil scyeruꞌ yi mbi cuꞌn wutaneꞌn wetz tzoneꞌj. Baꞌn cyakꞌuꞌ amaꞌl tetz na iꞌ jun balaj kajwutz yi na akꞌuj tan wuchꞌeyeꞌn te takꞌun Kajcaw. 8 Mben inchakol scyeꞌjuꞌ tan talcheꞌn katziblal, nin tan quichꞌeyeꞌnuꞌ. 9 Nchaꞌtz mben xomok Onésimo teꞌj. Iꞌ junt kajwutz yi chin cꞌulutxum nin. Nin iꞌ jun chitanumuꞌ. Nchaꞌtz iꞌ staleꞌ scyeruꞌ yi mbi cunin na bajij tzoneꞌj.
10 Nchaꞌtz yi kajwutz Aristarco tu kajwutz Marcos yi titzꞌun Bernabé, ateꞌ sweꞌj. Nin na chitzan tan talcheꞌn nin jun yos tetz cyeruꞌ. Chinachonkuꞌ te yi mbi walnak scyeruꞌ te kajwutz Marcos. Poro kol tzꞌopon tan chixajseꞌnuꞌ baꞌn cyakꞌuꞌ amaꞌl tetz. 11 Ej nin nchaꞌtz kajwutz Jesús yi na aꞌlchij Justo tetz, na tzan tan talcheꞌn nin jun yos tetz cyeruꞌ. Yi eꞌaꞌtz, ntinaꞌtz cobox eꞌ yi eꞌ judiy yi na chitzan tan wuchꞌeyeꞌn tan xtxoleꞌn yi balaj stziblal yi at rmeril tan cyoqueꞌn alchok jilwutz wunak tkꞌab Ryos. Yi eꞌ kajwutzaꞌtz, wiꞌnin ichꞌeyaꞌn na chiban sweꞌj.
12 Nchaꞌtz kajwutz Epafras, yi chitanumuꞌ, na tzan tan talcheꞌn nin jun yos tetz cyeruꞌ. Iꞌ jun ẍchakum Cristo. Ilenin na tzan iꞌ tan nachleꞌn Kataj squibuꞌ tan chiquiwixeꞌnuꞌ, nin tan chibnoluꞌ taneꞌn yi tajbil Ryos. 13 Sak tzinwutz yi ẍeꞌn cuꞌn na bisun iꞌ scyeꞌjuꞌ nin scyeꞌj yi eꞌ kajwutz yi najlcheꞌ Laodicea tu Hierápolis.
14 Nchaꞌtz kajwutz Lucas, yi ajtzꞌac, yi wiꞌnin na kapekꞌ teꞌj, tu kajwutz Demas, na chitzan tan talcheꞌn nin jun yos tetz cyeruꞌ.
15 Cyal quenuꞌ jun yos scyetz yi eꞌ kajwutz yi ateꞌ Laodicea. Nin cyal quenuꞌ jun yos tetz kajwutz Ninfa scyuchꞌ yi eꞌ kajwutz yi na chicham cuꞌn quib xe caꞌl iꞌ. 16 Ej nin yil baj chisiꞌleluꞌ yi jun uꞌjeꞌj yi mben intzꞌibal scyeruꞌ, benken ẍchikꞌab yi eꞌ kajwutz yi najlcheꞌ le tnum Laodicea. Nin nchaꞌtz eꞌuꞌ na waj yil chisiꞌlejuꞌ yi uꞌj yi benak intzꞌibal scyetz. 17 Nchaꞌtz na kloꞌ waj yil cyal quenuꞌ tetz kajwutz Arquipo: “Cawleꞌn cuꞌn te yi takꞌun Kajcaw yi akꞌij tzatz tan abnol taneꞌn,” cheꞌchuꞌ sban tetz.
18 Ma jaluꞌ, i inaꞌtz in Pawl. Nin iꞌtz tan weri inkꞌab yi na chitzan tan stzꞌibeꞌn nin yi jun yoseꞌj scyeruꞌ. Nuꞌlk bin txꞌakx chicꞌuꞌluꞌ yi choꞌn atin xetzeꞌ. Takꞌ tzaj Kataj banl squibuꞌ, eꞌuꞌ wajwutz. Amén.