Yi ẍeꞌn cuꞌn ban Pawl tan xtxoleꞌn Tesalónica
2
1 Sak ẍchiwutzuꞌ yi ja jamelan kukan yi kicyꞌakeꞌn tan chixajseꞌnuꞌ. 2 Nin sak ẍchiwutzuꞌ yi ẍeꞌn cuꞌn cyoqueꞌn wunak tan kabiyleꞌn le tnum Filiposa yi ntaxk kopon scyeꞌjuꞌ. Ej nin sak ẍchiwutzuꞌ yi wiꞌnin chiꞌch cꞌuꞌlal bajij skeꞌj yi koponeꞌn cuꞌn ẍchixoꞌluꞌ. Poro Ryos oꞌ quiwsan tan xtxꞌolcheꞌn xoꞌl yi balaj stziblal scyeruꞌ.b \v 3 Na yi kicyꞌakeꞌn tan xtxoleꞌn yi balaj stziblal scyeruꞌ ja kal yi mero bintzi. Nkꞌeꞌtz yi xubsnakoꞌ-k. Nin quinin koꞌc tan chisubleꞌnuꞌ. Nin quiꞌc jun takleꞌn yi wutzchoꞌ quen teꞌj. 4 Na oꞌ cuꞌn ẍchakum Ryos. Nin txaꞌijchoꞌ taꞌn tan xtxoleꞌn yi balaj stziblal. Nin quiꞌc nin jun tir yi jajk katxꞌixpuj yi xtxolbil tan chitzatzineꞌnuꞌ teꞌj. Ma na ja katxol scyeruꞌ quib yi na tal yol Kataj. Ej nin yaꞌstzun kulejtz tan kakꞌol tzatzin tetz Kataj, na sak swutz iꞌ cyakil yi na icyꞌ tkacꞌuꞌl. 5 Eꞌuꞌ wajwutz, quiꞌc nin jun tir yi jajk xcon jun yol kaꞌn ntin tan chitzatzineꞌnuꞌ. Bintzi ja kamiwi kib scyuchꞌuꞌ, poro sak swutz Kataj yi nkꞌeꞌtz yi ik tan cyakꞌoluꞌ muꞌẍ ketz te chimebiꞌluꞌ. 6 Ej nin nchaꞌtz yi kicyꞌakeꞌn tan chixajseꞌnuꞌ nkꞌeraꞌtz ik tan jaleꞌn kakꞌej ẍchiwutzuꞌ, nka ẍchiwutz wunak. Na yi oꞌ ketz yi oꞌ apostl, cu kloꞌ tan cyakꞌoluꞌ kakꞌej. Poro sak ẍchiwutzuꞌ yi nkꞌeꞌtz kakꞌej nkajoy ẍchixoꞌluꞌ, 7 ma na ja kocsaj kib chi na ban jun xnaꞌn tan moxeꞌn quen tal te xtxuꞌtx. 8 Ja katxol yi yol Kataj scyeruꞌ, poro nkꞌeꞌtz ntink tan xtxoleꞌn ma na ja kakꞌ kib tkꞌab quimichil tan tuꞌ yi na kapekꞌ scyeꞌjuꞌ. 9 ¿Qui peꞌ na chinachonuꞌ teꞌj eꞌuꞌ wajwutz, yi ja kakꞌuj yi koponeꞌn tan xtxoleꞌn yi balaj stziblal ẍchixoꞌluꞌ? Na ja kakꞌuj skꞌejl nin lakꞌbal, nin ja el aꞌ te kawiꞌ tan jaleꞌn kabambil, na nkꞌeraꞌtz kajbil tan kakꞌol gast scyeruꞌ.10 Sak ẍchiwutzuꞌ, nin sak swutz Kataj Ryos yi ẍeꞌn cunin oꞌ bantz yi kaꞌteꞌn ẍchixoꞌluꞌ yi eꞌuꞌ creyent. Na ja skojan kabalajil ẍchiwutzuꞌ, nin cyaꞌl nkatxꞌamxeꞌt cyanuꞌ. 11 Ja kakꞌ cyajtzaꞌkluꞌ chi na ban jun yaj tan takꞌleꞌn tajtzaꞌkl yi cyꞌajl. 12 ¿Qui peꞌ na chinachonuꞌ teꞌj? Na ja koꞌc tan chimoxeꞌnuꞌ nin tan chiquiwseꞌnuꞌ. Nin yaꞌstzun nkaban bantz chixomeꞌnuꞌ te yi tajbil Ryos bantz qui teleꞌn xtxꞌix iꞌ. Nin yaꞌstzun yi Ryos yi na tzan tan kamoxeꞌn, tan kanajeweꞌn kale na cawuneꞌt iꞌ. Ej nin yi tetz tajbil iꞌtz tan jaleꞌn ketz kakꞌej chi yi tetz kꞌej.
13 Yi koqueꞌn tan xtxoleꞌn yol Kataj scyeruꞌ, quinin quibituꞌ yi ik yol tuꞌk jun wunak, poro el chitxumuꞌ tetz yi yaꞌstzun yi mero yol Ryos. Nin ja cyocsajuꞌ. Chaꞌstzun te ilenin na katyoẍin tetz Kataj tan tuꞌ yi cyakꞌoluꞌ amaꞌl tan tbiteꞌn. Nin iteꞌn nin yolaꞌs na tzan tan xtxꞌixpeꞌn cyajtzaꞌkluꞌ jaluꞌ, yi eꞌuꞌ yi kꞌuklij chicꞌuꞌluꞌ teꞌj. 14 Nin yi cyeruꞌ choꞌn cuꞌn nchuꞌlijuꞌ chi nchuꞌlij yi eꞌ mas kajwutz yi najlcheꞌ lakak eꞌchk amaꞌl cwent Judea, na yi eꞌ cyetz ja chibuchlij cyakꞌun cyetz chitanum yi eꞌ judiy. 15 Ej nin yaꞌstzun yi eꞌ judiy yi biyon cuꞌn Kajcaw Jesús, chi eꞌ banakeꞌ yi chimam chiteꞌ tan chibiyleꞌn cuꞌn yi eꞌ elsanl stziꞌ Ryos tentz. Nin iteꞌn nin na chiban skeꞌj. Na oꞌ el tzaj chilajul ẍchixoꞌl, na na chiꞌch chicꞌuꞌl scyeꞌj cyakil wunak. Qui na tzatzin Ryos te cyajtzaꞌkl. 16 Na yi cyajbil yi eꞌ judiyaꞌtz iꞌtz tan qui katxolil yi balaj stziblal scyetz yi eꞌ yi nkꞌeꞌtz eꞌ judiy. Tan yi xtxolbilaꞌtz, eꞌ teꞌn na chitzan tan bowbajeꞌn quil squibaj, poro yil tzajpon wiꞌ tzꞌakꞌlok chicaws tan Ryos.
Yi tajbil Pawl iꞌtz tan chixajseꞌn junt tir yi eꞌ aj Tesalónica
17 I bin jaluꞌ eꞌuꞌ wajwutz, bintzinin joylaj kaxoꞌl scyuchꞌuꞌ, poro ilenin ateꞌuꞌ te kajal. Chaꞌstzun te wiꞌnin na el nin kalmaꞌ tan chixajseꞌnuꞌ. 18 Alaꞌ tir bixeꞌ waꞌn tan imbeneꞌn kloꞌ tan chixajseꞌnuꞌ, poro ilenin ja oc Baybaꞌn tan inmakleꞌn. 19 Poro eꞌuꞌ wajwutz, yil tzꞌul tzaj Kajcaw Jesucristo katzatzink na at kachꞌiw scyeꞌjuꞌ yi tan eꞌuꞌ stkꞌeꞌ Ryos ketz kakꞌej, na ẍcheꞌ kachajeꞌuꞌ swutz Ryos chi jun chumbalaj oy. 20 Na tan tuꞌ yi ja cyocsajuꞌ yi yol Ryos, tzꞌakꞌlok ketz kakꞌej, nin skatzatzink.