3
1 Eꞌuꞌ wajwutz, tan paj yi quiꞌt nkatxꞌaj mas tiemp yi qui na kubit yi chitziblaluꞌ, chaꞌstzun te katxumul tan kacyajeꞌn cyen kachuc tzoneꞌj Atenas. 2 Nin ja ben kachakol Timoteo tan tilweꞌn yi ẍeꞌn quitaneꞌnuꞌ, na iꞌ jun ẍchakum Ryos. Junit oꞌ tuchꞌ tan xtxoleꞌn yi balaj stziblal tetz Cristo. 3 Ja xaꞌk iꞌ tan takꞌleꞌn cyajtzaꞌkluꞌ nin tan chiquiwseꞌnuꞌ mas te yi na kocsaj. Na qui na kaj yil chiplojixuꞌ tkꞌab yi pilbil cyeruꞌ. Na elnak chitxumuꞌ tetz yi txꞌaklij len yi pilbil ketz skawutz. 4 Na yaꞌstzun kalnak scyeruꞌ yi atoꞌ tzaj ẍchixoꞌluꞌ yi at tulbil pilbil ketz. Ej nin yaꞌtz nin taneꞌntz. Na tzan ticyꞌeꞌn poneꞌn kaꞌn scyuchꞌuꞌ. 5 Chaꞌstzun te ja ben kachakol Timoteo tan quilweꞌnuꞌ ko baꞌn ateꞌtuꞌ tkꞌab Ryos. Na qui cunin batz ja chixubsijuꞌ tan Baybaꞌn.6 Poro yi tuleꞌnt tzaj iꞌ, ja ul jun stziblal taꞌn yi iẍnin kꞌuklij chicꞌuꞌluꞌ, nin iẍnin atit lokꞌ ib ẍchixoꞌluꞌ. Ej nin ilenin na kuꞌl txꞌakxuj chicꞌuꞌluꞌ. Nin nchaꞌtz tal iꞌ yi cyeruꞌ cyajbiluꞌ iꞌtz tan kilolt kib junt tir scyuchꞌuꞌ. Nchaꞌtz oꞌ, yaꞌtz nin ketz kajbiltz. 7 Yi ketz tzoneꞌj wiꞌnin qꞌuixcꞌuj atoꞌ cuꞌnt nin wiꞌnin tajweꞌn sketz. Chaꞌstzun te yi nkubit chitziblaluꞌ ja takꞌ tzatzin sketz. Poro mas yi na katzatzin teꞌj iꞌtz yi iẍnin kꞌuklij chicꞌuꞌluꞌ te Kajcaw. 8 Nin ja jal mas kawalor yi nkubit yi iẍnin txicl cheꞌuꞌ tkꞌab Kajcaw. 9 Yi na kanach Kataj, qui na jal puntil kaꞌn yi mbil kalnin tetz, tan paj yi tzatzin yi atoꞌ cuꞌnt tan chitziblaluꞌ. 10 Jun cuꞌn yol eꞌuꞌ wajwutz, skꞌejl nin lakꞌbal na katzan tan cꞌucheꞌn tetz Kataj tan kilolt chiwutzuꞌ, nin tan quichꞌeyeꞌnuꞌ tan kꞌukeweꞌn mas chicꞌuꞌluꞌ te Kajcaw.
11 Lok ẍchaj Kataj Ryos tu Kajcaw Jesucristo puntil sketz tan koponeꞌn scyeꞌjuꞌ. 12 Takꞌ tzaj Kajcaw mas lokꞌ ib ẍchixoꞌluꞌ, nin ẍchixoꞌluꞌ scyuchꞌ yi eꞌ mas wunak. Lok jal wiꞌnin lokꞌ ib ẍchixoꞌluꞌ chi na kalokꞌ kib ketz scyuchꞌuꞌ. 13 Nin ko yaꞌtz lchibanuꞌ squiwixk tzun chicꞌuꞌluꞌ-tz, nin quil jal chipaltiluꞌ. Chin tzꞌaknak cunin eꞌuꞌ sbneꞌ-tz swutz Ryos yil tzꞌul tzaj Kajcaw Jesucristo scyuchꞌ cyakil yi eꞌ quimnakeꞌ, yi xansaꞌncheꞌ taꞌn.