Yi xtxolbil yi na tzatzin Ryos teꞌj
4
1 Je junt xtxolbileꞌj wajwutz. Na cuꞌ kawutz scyeruꞌ nin na kacawunin scyeꞌjuꞌ tan biꞌ Kajcaw Jesús. Chijoyeꞌuꞌ puntil tan tzatzineꞌn Ryos scyeꞌjuꞌ chi alijt cyen kaꞌn scyeruꞌ. Chijoyeꞌuꞌ puntil tan chixomeꞌnuꞌ mas te yi xtxolbilaꞌtz.2 Elnak chitxumuꞌ tetz yi eꞌchk chusuꞌn yi katxol scyeruꞌ tan biꞌ Kajcaw Jesucristo. 3 Na yi tajbil Kataj Ryos iꞌtz tan cyoqueꞌnuꞌ tetz balaj, nin tan qui chijuchuluꞌ mas quiluꞌ. Chaꞌstzun te tajweꞌn cuꞌn tan cyajeꞌn cyen quiloluꞌ yi yajiꞌn tu xnaꞌniꞌn. 4 Baꞌn tcuꞌn chitxaꞌeꞌnuꞌ jun quixkeluꞌ. Chilokꞌeꞌwuꞌ wutz nin cyakꞌeꞌuꞌ kꞌej. 5 Quil chibanuꞌ ntin yi cyeruꞌ cyajbiluꞌ te quixkeluꞌ, chi quitaneꞌn yi eꞌ yi qui na cyek ẍchiꞌ Ryos. 6 Quil cyakꞌuꞌ bis tetz jun, nin quil choꞌcuꞌ tan subleꞌn jun tan tuꞌ yi na cyajuꞌ chibanuꞌ tajbil chiwankiluꞌ. Na ko yaꞌtz lchibanuꞌ, tzꞌul chicawsuꞌ tan Ryos. Alijt cyen yi xtxolbileꞌj kaꞌn scyeruꞌ. 7 Na yi kajeꞌn xtxaꞌol Ryos, nkꞌeꞌtz ik tan kajuchul kil, poro tan kabnol cwent kib. 8 Alchok scyetz yi qui na pekꞌ te yi chusuꞌneꞌj, nkꞌeꞌtz ik yi ẍchusuꞌn jun wunak yi qui na pekꞌ teꞌj, ma na iꞌtz ẍchusuꞌn Ryos. Wech na iꞌ mmakꞌon tzaj yi Espíritu Sant sketz.
9 I bin jaluꞌ katxumeꞌ yi lokꞌ ib yi tajweꞌn tan jaleꞌn skaxoꞌl ketz yi oꞌ creyent. Poro qui kloꞌ tajweꞌn tan beneꞌn intzꞌibal yi jun xtxolbilaꞌtz scyeruꞌ na chusij cheꞌtuꞌ teꞌj tan Ryos. 10 Na bintzinin ja lajluchax yi na chilokꞌ quibuꞌ squibil quibuꞌ scyuchꞌ yi eꞌ cmon creyent yi najlcheꞌ lakak eꞌchk amaꞌl cwent tetz Macedonia. Poro yi ketz, yi nternin na cuꞌ kawutz tan chibnoluꞌ taneꞌn, iꞌtz yil jal mas lokꞌ ib ẍchixoꞌluꞌ. 11 Chitzatzink bin cyeruꞌ xeꞌak chicaꞌluꞌ. Quil choꞌcuꞌ tan xtxumleꞌn yi eꞌchk takleꞌn yi quiꞌc cyocleꞌnuꞌ teꞌj. Baꞌn tcuꞌn chitxumuꞌ yi cyeruꞌ cyakꞌunuꞌ, chi yi cyajnak cyen kalol scyeruꞌ. 12 Ko yaꞌtz cyulejuꞌ sjalok chikꞌejuꞌ ẍchiwutz yi eꞌ yi quiꞌc na cyocsaj, nin sjalok cyakil yi tajweꞌn scyeruꞌ.
Yi tulbil Kajcaw
13 I bin jaluꞌ wajwutz, yi kajbil iꞌtz yil tzꞌel chitxumuꞌ tetz yi mbi sbajok scyeꞌj yi eꞌ quimnakeꞌ. Na qui na kaj yil chibisunuꞌ chi na chiban yi eꞌ yi quiꞌc chichꞌiw tan quitzꞌeꞌn junt tir. 14 Yi oꞌ ketz na kocsaj yi quimnak Jesús, nin na kocsaj yi itzꞌnak junt tir ẍchixoꞌl almaꞌ. Yi ko yaꞌtz, baꞌn bin kocsaj yi iteꞌn nin sbajokaꞌtz scyeꞌj yi eꞌ yi quimnakeꞌ tkꞌab Cristo. Ẍchitzꞌok junt tir tan Ryos, chi banak Jesús taꞌn. 15 Na je jun xtxolbileꞌj yi alijt cyen tan Kajcaw: Yil tzꞌul tzaj iꞌ, bajx chijeꞌul yi eꞌ quimnakeꞌ. Ma yi oꞌ ketz yi itzꞌoꞌ, yi oꞌ yi atoꞌ cyen, xomchoꞌt nin wutz chicoc. 16 Na iteꞌn nin Kajcaw choꞌn tzꞌopon tzaj tziꞌn tcyaꞌj. Chin wiꞌ nin sbneꞌ yil cawun. Ẍchꞌink yi wiꞌtz ángel, nin ẍchꞌink jun chun. Kalenaꞌs tzun chijeꞌul yi eꞌ quimnakeꞌ tkꞌab Cristo. 17 Ma yi oꞌ ketz, yi oꞌ yi itzꞌoꞌ, yi oꞌ yi atoꞌ cyen, xomchoꞌt nin ketz. Nkaben tcyꞌal tcꞌuꞌl sbakꞌ scyuchꞌ yi eꞌaꞌtz tan cꞌulcheꞌn Kajcaw tcyaꞌj. Nin skanajank te iꞌ tetz ben kꞌej ben sak. 18 Chaꞌstzun te, chimayseꞌ quibuꞌ squibil quibuꞌ tan yi yolaꞌseꞌj.