5
1 Inti yi tiemp nka kꞌejlal yi tulbil Jesucristo yi nchijakuꞌ swetz. Je puntileꞌj: Qui tajweꞌn tan beneꞌn walol scyeruꞌ tul uꞌj, na elnakt chitxumuꞌ tetz yi ewun cuꞌn tuꞌ tzꞌul. 2 Na yil tzꞌul tzaj iꞌ, choꞌn cuꞌn sbneꞌ chi na ul jun alkꞌom lakꞌbal. 3 Nin te yi ntaxk ul, chocopon wunak tan talcheꞌn: “Quiꞌct kabislej, na ja taneꞌ cyakil eꞌchk oyintziꞌ. Quiꞌct il na tzan wi munt jaluꞌ,” cheꞌch sbneꞌ. Poro jalt cuntunin chinach yil tzꞌul tzaj chicaws. Choꞌn sbajok scyeꞌj chi na ban jun chꞌon wiꞌ yi na xeꞌtij tan il. Quil cheꞌl swutz chicaws. 4 Ma yi oꞌ ketz wajwutz, nkꞌeꞌtz jopij kawutz te yi tulbil Kajcaw Jesucristo. Na quil tzꞌul Jesucristo tan kicyꞌleꞌn nin chi na ban jun alkꞌom, na at stziblal tkawiꞌ. 5 Na cyakil oꞌ ja skilin te kajtzaꞌkl. Nin elnak katxum tetz, yi ketz sbneꞌ yi balaj tiempaꞌtz yi at tulbil. Nkꞌeꞌtz jopij choꞌ ttzꞌoꞌtz. 6 Chaꞌstzun te wajwutz, kaqꞌuicyꞌlej kib skibil kib. Toqueꞌn cuꞌn sban kajtzaꞌkl. Quil kaban chi quitaneꞌn yi eꞌ mas wunak yi niꞌcuꞌntz chi najk chiwit len, na qui na el chitxum tetz yi mbi na bajij jaluꞌ, nka mbi sbajoktz sbneꞌ opon tunintz. 7 Moy wutzil na chicyꞌan. Niꞌcuꞌn eꞌ scyuchꞌ yi eꞌ yi na oc aꞌ chiwiꞌ. 8 Ma yi oꞌ ketz, yi skil cuꞌn te kajtzaꞌkl, toqueꞌn cuꞌn kulej katxumuꞌn, na ko kꞌuklij kacꞌuꞌl te Ryos nin ko at lokꞌ ib skuchꞌ xcyek yi jun ajtzaꞌklaꞌtz tan kacolcheꞌn chi na ban yi chꞌichꞌ yi na xcon tan colcheꞌn wutz cꞌuꞌl jun sanlar. Nchaꞌtz ko jun cuꞌn at kachꞌiw tan kaclaxeꞌn, xconk yi jun ajtzaꞌklaꞌtz tan kacolcheꞌn chi na ban yi casco tan colcheꞌn wiꞌ jun sanlar. 9 Nkꞌeꞌtz bixbaꞌn choꞌ tan Ryos tan tijleꞌn qꞌuixcꞌuj, ma na bixbaꞌn choꞌt tan kacambal yi itzꞌajbil tan tuꞌ yi mbi cuꞌn banak Kajcaw Jesucristo. 10 Na quimnak iꞌ tetz kaxel bantz kanajeweꞌn te iꞌ. Nin quiꞌc na ban yi ko itzꞌoꞌ nka quimnakoꞌ, na ilenin at kachꞌiw teꞌj tan kitzꞌeꞌn junt tir. 11 Chaꞌstzun te chimaysaj quibuꞌ nin chiquiwsaj quibuꞌ squibil quibuꞌ chi quitaneꞌnuꞌ jaluꞌ.Yi tlol Pawl jun cyajtzaꞌkl yi eꞌ creyent
12 I bin jaluꞌ eꞌuꞌ wajwutz, cyakꞌeꞌuꞌ chikꞌej yi eꞌ chibajxomuꞌ yi ateꞌ sjuꞌ takꞌun Kataj, yi eꞌ yi na chitzan tan chichusleꞌnuꞌ nin tan takꞌleꞌn cyajtzaꞌkluꞌ. 13 Cyakꞌuꞌ chikꞌej nin chilokꞌeꞌuꞌ chiwutz na tetz cuꞌn cyalmaꞌ na chakꞌuj. Chixitcunuꞌ yi eꞌchk oyintziꞌ yi at ẍchixoꞌluꞌ nin chitzatzinkuꞌ.
14 Wajwutz baꞌn choꞌcuꞌ tan cꞌaseꞌn cyajtzaꞌkl yi eꞌ cyꞌaj, yi eꞌ yi qui na cyaj chakꞌuj. Nin chiquiwsajuꞌ yi eꞌ yi na chicabej chicꞌuꞌl. Nin chitxicbajeꞌnuꞌ yi eꞌ cotxcoj. Puntil cuꞌn cyulejuꞌ yil choꞌcuꞌ tan quichꞌeyeꞌn.
15 Ma ko at jun yi na nucꞌ quen ajtzaꞌkl cachiꞌ scyeꞌjuꞌ, quil scꞌul yi niꞌcuꞌnk tzꞌel cuꞌn cyanuꞌ tuchꞌ. Ma na chibneꞌuꞌ jun baꞌn tetz, nin scyetz cyakil wunak.
16 Ilenin chitzatzinkuꞌ. 17 Ilenin chinacheꞌuꞌ Kataj. 18 Chityoẍinkuꞌ tetz Kataj te cyakil yi na bajij scyeꞌjuꞌ, na yaꞌstzun tajbil Ryos skeꞌj, yi oꞌ yi atoꞌ tkꞌab Cristo.
19 Quil chimakuꞌ yi tajbil yi Espíritu Sant. 20 Quil choꞌcuꞌ tan telseꞌn kꞌej yi eꞌchk xtxolbil yi na txolij tan porer yi Espíritu Sant. 21 Ma na cyocsajuꞌ, poro ilenin na taj maꞌleꞌn yi ko bintzi nka quiꞌ. Nin chixomokuꞌ teꞌj yi ko baꞌn. 22 Chicyajscyenuꞌ cyakil eꞌchk takleꞌn cachiꞌ.
23 Na chintzan tan cꞌucheꞌn chibanluꞌ tetz Ryos bantz cyoqueꞌnuꞌ tetz mero balaj. Na iꞌ yi Ryos yi na cuyun kapaj, nin yi na xitun cuꞌn yi oyintziꞌ yi at skaxoꞌl tuchꞌ. Nin na chintzan tan cꞌucheꞌn tetz tan toqueꞌn tan chiqꞌuicyꞌleꞌnuꞌ, yi chiꞌespíritujuꞌ, tu yi cyalmaꞌuꞌ tu cyajtzaꞌkluꞌ tu chiwankiluꞌ. Yaꞌstzun sbneꞌ iꞌ-tz tan qui jaleꞌn muꞌẍ tal quiluꞌ yil tzꞌul tzaj Kajcaw Jesucristo. 24 Kꞌukek bin kacꞌuꞌl teꞌj, na iteꞌn nin iꞌ na tzan tan kamoxeꞌn tzaj. Ej nin tzꞌelk cuꞌn kꞌab te cyakil yi xtxolbilaꞌseꞌj.
Stzajsbil wiꞌ yol Pawl
25 Kajwutz, chinach tzajuꞌ Kataj skibaj.
26 Chikꞌajlankuꞌ squibil quibuꞌ. Nin cyaleꞌuꞌ jun yos squibil quibuꞌ.
27 Na chincawunin scyeruꞌ tan biꞌ Kajcaw. Chisiꞌlejuꞌ yi carteꞌj ẍchiwutz cyakil kajwutz.
28 Takꞌ tzaj Kajcaw Jesucristo yi banl squibuꞌ. Amén.