Yi wiꞌtz juchul il
2
1 I bin jaluꞌ eꞌuꞌ kajwutz, katxumeꞌ yi tulbil Kajcaw Jesucristo yil tzꞌul tzaj tan kachamleꞌn cuꞌn. 2 Na cuꞌ kawutz scyeruꞌ tan qui chitxꞌixpuluꞌ cyajtzaꞌkluꞌ, nin eꞌ bisunchuꞌ kol quibit ninuꞌ yi ja wiꞌt ul Kajcaw Jesús. Eꞌ bisunchuꞌ kol quibit ninuꞌ jun chusuꞌn yi na tal yi ja wiꞌt ul iꞌ. Eꞌ bisunchuꞌ kol quibituꞌ junt stziblal mas te yi elnak chitxumuꞌ tetz. Eꞌ bisunchuꞌ kol tzꞌopon jun cart chi ketz taneꞌn, kale na tzaneꞌt tan talcheꞌn yi ja wiꞌt ul Kajcaw junt tir, na nkꞌeraꞌtz bintzi. 3 Eꞌ xubsiꞌchuꞌ tan jun jilwutz ajtzaꞌkl, na yi ntaxk ul yi kꞌejlal yi tulbil Kajcaw, bajx cunin xeꞌtok contriꞌn te Ryos. Ej nin sjalok jun yaj yi chin cachiꞌ nin, yi chin wiꞌtz pajol caꞌwl iꞌ. Poro yi jun yajaꞌtz txꞌaklij tetz cawsaꞌtz. 4 Yaꞌstzun yi jun yi tzꞌocopon tan contriꞌn te kaRyosil, nin te cyakil chiryosil eꞌ mas wunak. Tzꞌocopon iꞌ tan contriꞌn te cyakil eꞌchk takleꞌn yi na chimejeꞌ wunak ẍchiwutz. Scꞌolek le luwar yi chin xan nin, yi at le caꞌl Ryos, na stocseꞌ tib iꞌ Ryos.5 Chinachonkuꞌ te cyakil yi xtxolbil yi walnak scyeruꞌ yi atin tzaj scyuchꞌuꞌ. 6 Nchaꞌtz na el chitxumuꞌ tetz yi mbiꞌtz na tzan tan makleꞌn wutz yi junaꞌtz tan qui ẍchajol chan tib, na txeꞌn akꞌlij amaꞌl tetz tan ẍchajol tib. 7 Poro yi tajtzaꞌkl iꞌ ewun cuꞌn na akꞌuj jaluꞌ tzoneꞌj wuxtxꞌotxꞌ. Jalt cuntunin yil tzꞌel ticyꞌleꞌn yi makol wutz iꞌ. 8 Slajluchaxk tzun yi naꞌ scyetz iꞌ, yi jun mal nakaꞌtz. Poro xew tuꞌ Kajcaw bnon tzaj. Sotzel wutz iꞌ sbneꞌ tan tuꞌ yi pakꞌpuchal Kajcaw yil tzꞌul tzaj. 9 Yi jun mal nakaꞌtz tzꞌul tan porer Satanás, yi Baybaꞌn. Yil tzꞌul tzaj, cyꞌaꞌn wiꞌnin porer taꞌn, nin ẍchajeꞌ wiꞌnin milawr. Poro nkꞌeꞌtz bintzi. Chij tuꞌ. 10 Xconk wiꞌnin eꞌchk ajtzaꞌkl cachiꞌ taꞌn, tan chisubleꞌn yi eꞌ wunak yi at nin cyetz cyopombiltz kale sotzeꞌt chiwutz. Sotzel chiwutz sbneꞌ, na quinin cyocsaj yi mero bintzi. Yi nink ncyocsaj, ẍchiclaxok tzun kloꞌ-tz, ma na sotzel chiwutz sbneꞌ. 11 Tan paj yi qui na cyocsaj, quil tzꞌoc il Ryos tan chicolcheꞌn yil tzꞌul tzaj yi jun subul nakaꞌtz. Ej nin jalcunin lcyocsaj yi laꞌjil yi jun yajaꞌtz. 12 Chaꞌstzun te tzꞌakꞌlok chicaws yi eꞌaꞌtz yi qui na cyaj cyocsaj yi mero bintzi, na yi cyetz cyajbil iꞌtz tan banleꞌn yi eꞌchk takleꞌn cachiꞌ.
Txaꞌij choꞌt le xeꞌtzbil tzaj
13 Ma yi eꞌ cyeruꞌ kajwutz, tajweꞌn yi cheꞌ katyoẍijuꞌ tetz Kataj Ryos, na okꞌleꞌn chiwutzuꞌ taꞌn, na le xeꞌtzbil tzaj txumijt taꞌn tan chiclaxeꞌnuꞌ, nin tan cyoqueꞌnuꞌ tetz tzꞌaknak cuꞌn. Na ja choꞌcuꞌ tetz tzꞌaknak cuꞌn tan porer yi Espíritu Sant, nin yi ncyocsajuꞌ yi mero bintzi. 14 Na ocnakeꞌuꞌ cyajlal yi eꞌ nitxajil Ryos yi ncyocsajuꞌ yi balaj stziblal tetz colbil ibaj yi katxolnak scyeruꞌ. Na yi tajbil Ryos iꞌtz tan jaleꞌn chikꞌejuꞌ chi taneꞌn yi kꞌej Kajcaw Jesucristo.
15 Chaꞌstzun te eꞌuꞌ kajwutz, quiwit. Elch te chicꞌuꞌluꞌ yi eꞌchk chusuꞌn yi kalnak scyeruꞌ yi atoꞌ tzaj scyeꞌjuꞌ. Nin elch te chicꞌuꞌluꞌ yi eꞌchk chusuꞌn yi at tul eꞌchk cart yi benak katzꞌibal scyeruꞌ. 16-17 Takꞌ tzaj bin Kajcaw Jesús tu Kataj Ryos yi chiwaloruꞌ, nin ẍchꞌeybil cyeruꞌ tan cyaloluꞌ, nin tan chibnoluꞌ yi eꞌchk takleꞌn balaj. Na wiꞌnin na pekꞌ iꞌ skeꞌj. Nin at banl talmaꞌ iꞌ skibaj. Qui na icyꞌ paj iꞌ tan kaquiwseꞌn. Na tan tuꞌ yi banl talmaꞌ iꞌ, at kachꞌiw te yi mero balaj yi sukiꞌnt taꞌn sketz.