Chinachtzajuꞌ Kataj skibaj
3
1 Ma jaluꞌ eꞌuꞌ kajwutz te yi ntaxk tzaj wiꞌ cob inyol, na waj wal nin junt xtxolbil scyeruꞌ. Chinacheꞌuꞌ Kataj skibaj, bantz beneꞌn loꞌon yi stziblal Kajcaw beneꞌn tziꞌn wi munt. Ej nin chinacheꞌuꞌ Kataj skibaj bantz jaleꞌn kꞌej yi yol iꞌ ẍchiwutz cyakil wunak, chi tzan jaleꞌn ẍchixoꞌluꞌ. 2 Ej nin chinacheꞌuꞌ Kataj skibaj bantz keleꞌn liwr ẍchikꞌab yi eꞌ mal wunak. Na nkꞌeꞌtz cyakil wunak yi na cyocsaj Ryos. 3 Ma eꞌ cyeruꞌ, baꞌn kꞌukeꞌ chicꞌuꞌluꞌ te Kajcaw, na iꞌ quiwsanl ketz, nin iꞌ qꞌuicyꞌlom ketz tkꞌab cyakil jilwutz il. 4 Tan tuꞌ yi atoꞌ tkꞌab Ryos at te kajal yi na chitzanuꞌ tan banleꞌn taneꞌn yi eꞌchk xtxolbil yi kalnak scyeruꞌ. Ej nin ẍchibneꞌuꞌ seguir tan banleꞌn. 5 Takꞌ tzaj Kataj cyajtzaꞌkluꞌ tan teleꞌn chitxumuꞌ mas tetz yi ẍeꞌn na pekꞌ iꞌ skeꞌj. Ej nin lok jal chipasensuꞌ chi taneꞌn pasens Cristo.Chin tajweꞌn cunin tan kakꞌujeꞌn
6 Eꞌuꞌ wajwutz, kacawunk nin scyeruꞌ tan biꞌ Kajcaw Jesús: Quil chixomuꞌ scyeꞌj yi eꞌ kajwutz yi tu na chipaꞌcaꞌp tuꞌ, yi qui na chakꞌuj, yi eꞌ yi qui na cyaj chixom te yi ketz kachusuꞌn yi alijt cyen kakꞌun. 7 Elnak chitxumuꞌ te yi eꞌchk takleꞌn yi chin tajweꞌn cunin tan chibnoluꞌ taneꞌn, na yi atoꞌ tzaj scyuchꞌuꞌ ja kacꞌay kakꞌab tan lokꞌcheꞌn kawaꞌ. 8 Qui nkawan tan oy tuꞌ, poro skꞌejl nin lakꞌbal ja koꞌc tan akꞌun tan qui kakꞌol jun gast scyeꞌjuꞌ. 9 Tajweꞌn kloꞌ tan cyoqueꞌnuꞌ tan kacꞌaꞌcheꞌn, poro quinin nkajak scyeruꞌ. Ja kakꞌuj ketz tan kacꞌaꞌchal kib. Yaꞌtz kabanak na yi kajbil iꞌtz yi iteꞌn nin chiban cyeruꞌaꞌtz. 10 Na yi atoꞌ tzaj scyuchꞌuꞌ katxolnak yi xtxolbileꞌj: Ko at jun yi qui na taj tzꞌakꞌuj, quiꞌc cu tan waneꞌn. 11 Chinach cunuꞌ yi jun xtxolbilaꞌtz, na na kubit yi at eꞌ ẍchixoꞌluꞌ yi tunin na chipaꞌcaꞌp tuꞌ. Qui na chakꞌuj. 12 Ma jaluꞌ, kacawunk nin scyetz jun jilwutz wunakaꞌtz tan biꞌ Kajcaw Jesús: Tzatzin cuꞌn chakꞌujkuꞌ tan chicꞌaꞌchal quibuꞌ.
13 Kajwutz, je junt xtxolbileꞌj: Quil tzꞌicyꞌ chipajuꞌ tan chibnoluꞌ eꞌchk pawor scyetz cyakil wunak. 14 Ko at jun ẍchixoꞌluꞌ yi qui na taj xom te yi xtxolbil yi at le carteꞌj baꞌn tcuꞌn quil cyamiwi quibuꞌ tuchꞌ bantz teleꞌn xtxꞌix iꞌ. 15 Poro quil chiꞌch chicꞌuꞌluꞌ teꞌj, ma na cyakꞌeꞌuꞌ tajtzaꞌkl. Xconken putzpuj yol cyanuꞌ, na kajwutz kib.
Stzajsbil wiꞌ yol
16 Yi ketz Kajcaw, iꞌ akꞌol tzatzin paz. Takꞌ tzaj bin iꞌ tzatzin paz te cyalmaꞌuꞌ, jun tzatzin paz yi cyaꞌl jun xcyeꞌ tan xiteꞌn sbneꞌ opon tunintz. Lok lnajan iꞌ scyeꞌjuꞌ chijunalenuꞌ.