Jun chusuꞌn tan nachleꞌn Kataj
2
1 I bin jaluꞌ je bajx xtxolbil yi tajweꞌn tan abnol taneꞌn: Nachaj Kataj squibaj cyakil wunak. Cuk awutz nin nachaj Kataj nin tyoẍin squibaj. 2 Nin chin tajweꞌn cunin tan anachol Kataj squibaj yi eꞌ ajcaw tetz tnum, scyuchꞌ cyakil yi eꞌ yi at len caꞌwl ẍchikꞌab. Nachaj Kataj squibaj bantz cyakꞌol amaꞌl tan kacꞌuꞌlal Ryos, nin tan kabnol taneꞌn yi tajbil iꞌ. 3 Chumbalaj nin kloꞌ yi nink cxom te yi jun xtxolbilaꞌtz, na stzatzink Ryos teꞌj, yi Ryos yi colol ketz. 4 Na yi tetz tajbil iꞌtz tan chiclaxeꞌn cyakil wunak, nin tan teleꞌn chitxum te yi mero bintzi. 5 Na ntinaꞌtz jun Ryos at, nin ntinaꞌtz jun kayolol at skaxoꞌl tu Ryos, iꞌtz Jesucristo yi jun yi nchaꞌtz wunak iꞌ. 6 Na, takꞌ tib iꞌ tkꞌab quimichil tan kelseꞌneꞌl tzaj tkꞌab kil. Nin ja wiꞌt lajluchax yi jun xtxolbilaꞌtz skawutz. 7 Nchaꞌtz in, ja chin jeꞌ xtxaꞌol Ryos tan inxconeꞌn tetz jun aj txolinl, nin tetz jun apostl. Nin ja chin jeꞌ xtxaꞌol tetz jun ajtxolinl scyetz yi eꞌ awer nak tan teleꞌn chitxum tetz yi mero bintzi. Jun cuꞌn yol yi xtxolbil yi na wal nin tzatz, nkꞌeꞌtz wi wakꞌ tuꞌk, na yaꞌstzun yi mero bintzi.8 Yi wetz wajbil iꞌtz yi nink choꞌc cyakil yi eꞌ yi cyakꞌoꞌnt quib tkꞌab Ryos tan nachleꞌn Kataj. Poro qui na taj yi nink jal siquier muꞌẍ chiꞌch cꞌuꞌlal te cyalmaꞌ. Nin qui na taj yi atk oyintziꞌ ẍchixoꞌl. 9 Ma yi eꞌ xnaꞌn, na waj yil chixconsaj beꞌch cyetz yi sensiy. Nin toqueꞌn cun sban tkan chichic. Nin qui na taj banleꞌn mas yubilil xiꞌil chiwiꞌ. Nin baꞌn tcuꞌn quil xcon jun cꞌoloj balaj uwaj cyaꞌn chi taneꞌn oro, nka eꞌchk uwaj yi nim jamel. Qui tajweꞌn yil xcon balaj beꞌch cyetz cyakꞌun yi nim jamel. 10 Poro ko na cyaj yil chitzatzin wunak scyeꞌj, baꞌn tcuꞌn chibneꞌ jun baꞌn swutz yi priꞌsiꞌn yi na chiban tu beꞌch cyetz. Na yaꞌstzun yi ajtzaꞌkl yi tajweꞌn tan chixomeꞌn yi eꞌ xnaꞌn teꞌj yi cyakꞌoꞌnt quib tkꞌab Kataj. 11 Chin tajweꞌn cunin yi quil chijilon yil choꞌc tan tbiteꞌn yol Kataj. Tajweꞌn yil choꞌc cꞌulutxum. 12 Qui tzawakꞌ amaꞌl scyetz yi eꞌ xnaꞌn tan chichusleꞌn yi eꞌ nim juy, nka tan chicaweꞌn yi eꞌ yaj. Ma na tajweꞌn tan chinumeweꞌn eꞌ xnaꞌn. 13 Na bajx bnixleꞌn Adam tan Ryos, ma Eva buchtlen bnixeꞌn. 14 Nin nkꞌeꞌtz Adam yi xubsij, ma na Eva. Nin yi xubseꞌn yaꞌstzun juchul til. Nin yi juchul til ja akꞌlij tetz caws yi chin qꞌuixcꞌuj nin ltalaj jun tal. 15 Poro ẍchiclaxok eꞌ xnaꞌn kol chiban taneꞌn yi xtxolbileꞌj: Tajweꞌn tan chibnol taneꞌn yi cyetz cyakꞌun scyuchꞌ. Nin tajweꞌn yil kꞌukeꞌ chicꞌuꞌl te Kataj. Toqueꞌn cuꞌn chiban tu cyajtzaꞌkl. Ko yaꞌtz chiban ẍchiclaxok tzuntz.