Yi eꞌ yi ateꞌ tkꞌab Cristo chi sanlar quitaneꞌn
2
1 Ma jaluꞌ Timoteo, aẍ incyꞌajl taneꞌn tkꞌab Cristo. Xicyeꞌn awib, na at banl Kataj skibaj tan tuꞌ yi atoꞌ tkꞌab Cristo Jesús. 2 Chusweꞌ yi eꞌ yaj yi baꞌn kꞌukeꞌ kacꞌuꞌl scyeꞌj, yi eꞌ yi at chiẍcꞌatnakil tan chichusleꞌn mas kajwutz. Chusweꞌ te yi eꞌchk xtxolbil yi walnak tzatz ẍchiwutz cuꞌn jun cꞌoloj kajwutz.3 Tajweꞌn tan amucꞌul qꞌuixcꞌuj, na choꞌn awutaneꞌn tkꞌab Cristo chi taneꞌn jun sanlar. Nin ilijt awaꞌn yi ẍeꞌn quitaneꞌn yi eꞌ sanlar. 4 Quiꞌc rmeril yi nink choꞌc sanlar tan xtxumleꞌn yi cyetz cyajbil, ma na chin tajweꞌn cunin tan chibnol taneꞌn yi caꞌwl yi caꞌwl cyetz. 5 Nchaꞌtz aẍ awetz tajweꞌn tan abnol taneꞌn yi caꞌwl Cristo. Nchaꞌtz quiꞌc rmeril tan cambal jun yi na el tan ojkeꞌl yi ko quil xom te eꞌchk ley yi bixbaꞌnt tan yi txumul tetz. 6 Nchaꞌtz tajweꞌn tan awoqueꞌn il te awakꞌun chi na ban jun akꞌunwil xoꞌl tujul tan cambal jun balaj cosech. 7 Txumaj yi eꞌchk ajtzaꞌklaꞌtz yi na wal nin tzatz, nin Kajcaw cẍchꞌeyan tan pujxeꞌn awaꞌn.
8 Eliꞌch te acꞌuꞌl yi itzꞌij Jesucristo junt tir ẍchixoꞌl almaꞌ nin eliꞌch te acꞌuꞌl yi iꞌ xonl kꞌajtzun rey Luwiy. Na yaꞌstzun yi xtxolbil yi na chintzan wetz tan xtxoleꞌn scyetz wunak yi baꞌn na kaclax taꞌn. 9 Poro tan tuꞌ yi na chintzan tan xtxoleꞌn yi eꞌchk xtxolbilaꞌtz na intij wiꞌnin qꞌuixcꞌuj. Cꞌalij chin tan caren chi ink biyolnak taneꞌn ẍchiwutz wunak. Poro yi yol Kataj qui cꞌalij teꞌtz tcaren. 10 Yi in wetz na chintzan tan mucꞌleꞌn qꞌuixcꞌuj tan takꞌoneꞌn baꞌn scyetz yi eꞌ yi txaꞌij cheꞌt tan Ryos. Na yi wetz wajbil iꞌtz yi ẍeꞌnk chicambaj yi balaj itzꞌajbil yi quinin bajsbeꞌn tetz, yi jun itzꞌajbilaꞌtz yi njal kakꞌun tan tuꞌ yi nkoꞌc tkꞌab Cristo.
11 Je jun xtxolbileꞌj yi bintzinin, yi baꞌn kꞌukeꞌ kacꞌuꞌl teꞌj:
Ko na kocsaj yi chi ik oꞌaꞌtz yi nkaquim,
yi quimeꞌn Cristo swutz pasyon,
skitzꞌok tzun junt tir tan kanajeweꞌn te iꞌ.
12 Nin kol tzꞌicyꞌpon qꞌuixcꞌuj kaꞌn,
oꞌ tzun juntz tan cawuꞌn tuchꞌ.
Poro ko na kaxob tan talcheꞌn yi xomchoꞌ teꞌj,
nchaꞌtz iꞌ, staleꞌ yi qui ajskeꞌn kawutz taꞌn.
13 Yi eꞌ wunak ntin na cyakꞌ kꞌubaj cꞌuꞌlal sketz. Poro yi Kataj Ryos, ilenin na el kꞌab te yi yol, na quiꞌc laꞌjil tuchꞌ.
Jun balaj akꞌunwil swutz Ryos
14 Ilenin naꞌwsaj yi eꞌchk xtxolbilaꞌtz scyetz kajwutz. Nin swutz cuꞌn Ryos makaj chiwutz tan cyajeꞌn cyen quilol eꞌchk wakꞌ ib te yi mbi na elepont eꞌchk yol yi tzꞌibaꞌnt cyen. Na quiꞌc na takꞌ sketz. Ntin na xcyeꞌ tan poꞌtzeꞌn chitxumuꞌn yi eꞌ kajwutz yi na chitzan tan tbiteꞌn. 15 Nqueꞌn il tan awoqueꞌn tetz jun balaj akꞌunwil swutz Ryos tan qui teleꞌn atxꞌix. Nqueꞌn il tan awoqueꞌn tetz jun akꞌunwil yi baꞌn na xcyeꞌ tan xtxꞌolcheꞌn xoꞌl yi mero xeꞌ yi yol yi bintzinin tetz. 16 Poro or tzawil yi wakꞌ ib te eꞌchk yol yi quiꞌc ekaꞌn taꞌn. Na ntin na xcyeꞌ tan kapitleꞌn nin tul il. 17 Nin yi jun jilwutz ajtzaꞌklaꞌtz na ben loꞌon chi na ban jun jilwutz yabil yi na biꞌaj cáncer. Na yaꞌstzun taneꞌn cyajtzaꞌkl Himeneo tu Fileto. 18 Quiꞌt na chixom te yi bintzi, na yi cyetz na cyal: “Yi itzꞌeꞌn junt tir, ten bajij,” cheꞌch. Nin tan yi chiyolaꞌtz ja chixcyeꞌ tan subleꞌn cyajtzaꞌkl cobox kajwutz yi kꞌuklij chicꞌuꞌl te Ryos. 19 Poro quiꞌc na ban yi ko yaꞌtz na cyal, na yi xeꞌ yi ketz kachusuꞌn bnixnak cyen tan Ryos. Quiꞌc rmeril tan xtxꞌixpeꞌn. Na yi Kajcaw ajskeꞌn chiwutz yi eꞌ tetz taꞌn. Ej nin at junt xtxolbil yi na tal: “Cyakil yi eꞌ yi xomcheꞌ te Cristo, tajweꞌn cuꞌn tan cyajeꞌn quilol yi eꞌchk ajtzaꞌkl cachiꞌ.”
20 Je junt puntileꞌj: Yi na koꞌc tul jun balaj caꞌl skileꞌ yi nkꞌeꞌtz ntin eꞌchk maꞌcl sakal nka oro at txeꞌ, ma na skileꞌ yi at maꞌcl yi tzeꞌ tuꞌ nka txꞌotxꞌ tuꞌ. At balaj maꞌcl yi wiꞌnin na kalokꞌ wutz, nin at maꞌcl yi qui na kalokꞌ mas wutz. 21 Niꞌcuꞌn tzun kutaneꞌn ketz chi eꞌchk maꞌclaꞌtz. Ko na kaj kaxcon tetz jun balaj maꞌcl Kajcaw yi txaꞌijt, tajweꞌn cuꞌn tan kabnol cwent kib te cyakil eꞌchk takleꞌn cachiꞌ, tzun kaxconktz tan banleꞌn jun balaj ipisyoꞌ.
22 Il cyen bin yi chiyaꞌbl yi eꞌ xicy. Banaj puers tan abnol taneꞌn yi tajbil Ryos. Nin banaj puers tan kꞌukeweꞌn mas acꞌuꞌl teꞌj. Nin banaj puers tan achajol yi lokꞌ ib tu aputzpal, chi quitaneꞌn yi eꞌ yi tetz cuꞌn cyalmaꞌ na chitzan tan cꞌuꞌlajeꞌn Kajcaw. 23 Quil cẍoꞌc tan xtxumleꞌn eꞌchk ajtzaꞌkl yi quiꞌc xeꞌ, na elnak atxum tetz yi ntin oyintziꞌ na takꞌ. 24 Quiꞌc cu tan toqueꞌn jun ẍchakum Kajcaw tan oyintziꞌ, ma na tajweꞌn cuꞌn yi putzpuj jilon. Tajweꞌn cuꞌn yi toqueꞌn cuꞌn lchusun. Tajweꞌn cuꞌn yi wiꞌnin pasens. 25 Tajweꞌn cuꞌn yi puntil cuꞌn ltulej yi na oc tan makleꞌn chiwutz yi eꞌ pajol caꞌwl, na qui cunin batz tzꞌoc Ryos tan xtxꞌixpeꞌn cyajtzaꞌkl, bantz teleꞌn chitxum te yi bintzi. 26 Ko yaꞌtz taneꞌn jun ẍchakum Kajcaw, tzꞌelepon chitxum wunak tetz yi bintzinin yi chusuꞌn yi xomchoꞌ teꞌj, nin chelepon liwr tkꞌab Baybaꞌn, na ateꞌ pres tkꞌab Baybaꞌn tan bnol iꞌ yi tajbil scyeꞌj.