Yi ẍeꞌn cuꞌn ẍchibneꞌ wunak yi txant tan tucumuleꞌn yi wiꞌtzbil kꞌejlal
3
1 Ma jaluꞌ na waj yil tzꞌel atxum tetz yi xtxolbileꞌj: Tzꞌul eꞌchk cꞌaꞌlaj tiemp yi txant tan tucumuleꞌn yi wiꞌtzbil kꞌejlal. 2 Na yi eꞌ wunak ẍchikꞌakꞌaxk len tu cyajtzaꞌkl, nin tu chijilon. Ntin chocopon tan xtxumleꞌn pwok. Chocopon len tan jisoꞌn, nin tan pajleꞌn caꞌwl chitaj chitxuꞌ. 3 Quil chityoẍin yil bajij jun baꞌn scyetz. Quil cyek ẍchiꞌ Ryos. Quil tzꞌel chikꞌajab te junt. Quil tzꞌel jun oyintziꞌ te chicꞌuꞌl. Chocopon len tetz chacꞌl yol. Quil chixcyeꞌ tan makleꞌn cyajtzaꞌkl te eꞌchk takleꞌn cachiꞌ. Quil chixob tan chibuchleꞌn, nin tan chibiyleꞌn wunak. Chocopon contr te cyakil eꞌchk takleꞌn balaj. 4 Cob chiyubel sbneꞌ na ẍchicꞌayeꞌ quib tan tponseꞌn yol ẍchixoꞌl junt txꞌakajt. Nin tuninl chipokꞌloj tlen tu quib tu cyajtzaꞌkl. Scyocseꞌ quib nim tu cyajtzaꞌkl. Squicyꞌseꞌ chicꞌuꞌl te cyetz cyajbil, nin quil chiban taneꞌn yi tajbil Ryos. 5 Scyocseꞌ quib chi jun yi na xom te tajbil Ryos, poro tan yi eꞌchk takleꞌn cachiꞌ yi na chiban slajluchaxk yi chiwutz tuꞌ chiplaj tuꞌ. Baꞌn tcuꞌn quil cxom scyeꞌj jun jilwutz wunakaꞌtz.6 Chixoꞌl yi jun jilwutz wunakaꞌtz at eꞌ yaj yi na choꞌc lakak caꞌl tan subleꞌn cyajtzaꞌkl yi eꞌ kajwutz xnaꞌn, yi cotxcoj eꞌ te yi na kocsaj. Yaꞌstzun yi jun jilwutz xnaꞌnaꞌtz yi na poꞌtij cyajtzaꞌkl tan paj xtxumleꞌn quil. Pitij cheꞌ tan eꞌchk cyajbil tuꞌ. 7 Ilenin na quibit eꞌchk chusuꞌn, poro qui na pujx yi mero xeꞌ yi bintzi cyaꞌn. 8 Yi eꞌ subul nakaꞌtz eꞌ contr te yi xtxolbil yi bintzinin tetz. Niꞌcuꞌn chi quitaneꞌn Janes tu Jambres, yi ocnakeꞌ tan contriꞌn te Moisés.a Yi jun jilwutz wunakaꞌtz, xubsnakt cyajtzaꞌkl. Quiꞌc chixac, na qui na chixcyeꞌ tan banleꞌn taneꞌn yi chusuꞌn yi na kocsaj ketz. 9 Poro quil pucꞌun chiwutz yi eꞌ yil chixom scyeꞌj, na tzꞌelepon chitxum cyakil wunak scyetz yi juntlen cyajtzaꞌkl, chi eꞌ ban eꞌ wunak tentz scyeꞌj yi cob yajaꞌtz yi eꞌ oc tan contriꞌn te Moisés.
Yi wiꞌtzbil caꞌwl yi takꞌ Pawl tetz Timoteo
10 Yi aẍatz Timoteo elnak atxum te yi inchusuꞌn. Ej nin elnak atxum tetz yi ẍeꞌn cuꞌn wutaneꞌn wetz. Nin elnak atxum tetz yi mbiꞌtz yi inwutz quen teꞌj. Elnak atxum tetz yi ẍeꞌn kꞌuklij incꞌuꞌl. Ej nin elnak atxum tetz yi at impasens nin yi at lokꞌ ib swuchꞌ. 11 Ej nin elnak atxum tetz yi ja intij qꞌuixcꞌuj. Nin bitaꞌnt awaꞌn mbi cuꞌn bajij sweꞌj yi wicyꞌakeꞌn le tnum Antioquía, tu yi tnum Iconio nin Listra. Wiꞌnin qꞌuixcꞌuj mintij. Poro ja neꞌl liwr tan Kajcaw tkꞌab eꞌchk qꞌuixcꞌujaꞌtz. 12 Na bintzinin cyakil yi eꞌ yi xomcheꞌ te Cristo Jesús chitijeꞌ qꞌuixcꞌuj. 13 Ma yi eꞌ mal nak, nin cyakil yi eꞌ subul nak, jaleꞌn atit mas cyetz quil. Ilenin chocopon tan chisubleꞌn mas wunak nin nchaꞌtz eꞌ ẍchisubeꞌ quib squibil quib.
14 Inti aẍ awetz Timoteo, benk awukan ttxꞌotxꞌ te yi chusuꞌn yi ja wiꞌt oc le awiꞌ, yi jun chusuꞌnaꞌtz yi jun cuꞌn na awocsaj. Na elnak atxum tetz yi ẍeꞌn cuꞌn taneꞌn chibalajil yi eꞌ yi ocnakeꞌ tan achusleꞌn te yol Kataj. 15 Na juyil cunin aẍ yi teleꞌn atxum tetz yi mbi ekaꞌn tan yi xtxolbil yi tzꞌibaꞌnt cyen, yi chin xan nin. Yaꞌstzun yi xtxolbilaꞌtz yi na akꞌon awajtzaꞌkl, nin yaꞌstzun yi xtxolbil yi na chajon tzatz yi ẍeꞌn kaclax. Na skaclaxok tan tuꞌ yi na kꞌukeꞌ kacꞌuꞌl te Cristo Jesús. 16 Na Ryos aꞌlon cyen cyakil yi tzꞌibaꞌnt cyen. Iꞌ aꞌlon scyetz eꞌ tajtzꞌib tan cyajeꞌn cyen chitzꞌibal. Nin na xcon jaluꞌ tan kachusleꞌn te yi bintzi. Na xcon tan makleꞌn kawutz te eꞌchk takleꞌn cachiꞌ. Na xcon tan kanucꞌleꞌn. Nin na xcon tan kuchꞌeyeꞌn tan kaxomeꞌn te yi tajbil Kataj. 17 Nin na xcon scyetz cyakil yi eꞌ yi ateꞌ tkꞌab Ryos tan takꞌleꞌn cyajtzaꞌkl nin tan cyoqueꞌn tetz tzꞌaknak cuꞌn bantz chibnol yi eꞌchk takleꞌn balaj.