YI CART YI OPON ẌCHIKꞌAB YI Eꞌ HEBREO
Ja jilon Ryos sketz poro ja xcon yi tetz Cyꞌajl taꞌn
1
1 Wiꞌnin tir jilon Kataj Ryos scyetz yi eꞌ kamam kateꞌ tentz. Nin wiꞌnin eꞌchk puntil xcon taꞌn scyetz yi eꞌ elsanl stziꞌ iꞌ tan cyalol yi tetz tajbil scyetz yi eꞌ kamam kateꞌaꞌtz. 2 Poro te yi tiemp yi atoꞌ tul jaluꞌ ja xcon yi tetz Cyꞌajl taꞌn tan tlol yi tetz tajbil sketz. Yi Cyꞌajolaꞌtz bixbaꞌnt taꞌn tan tetzal cyakil eꞌchk takleꞌn, na iꞌ txumul tetz cyakil yi eꞌchk takleꞌn yi ja wiꞌt bajij tu yi txeꞌn bajij. 3 Ej nin tan iꞌ, na lajluchaxeꞌt yi pakꞌpuchal tu yi kꞌej Ryos. Na iteꞌn nin iꞌ Ryos, na i yi porer yi tetz yol xicyol tetz cyakil eꞌchk takleꞌn yi at. Nin yi xcyeweꞌn iꞌ tan stzajseꞌn yi kil ja cꞌoleꞌ le sbal kawutzileꞌn Kataj Ryos yi at tziꞌn tcyaꞌj. Choꞌn cꞌolchij iꞌ jaluꞌ le sbal Ryos.At mas kꞌej yi Cyꞌajl Ryos ẍchiwutz yi eꞌ ángel
4 Ej nin nchaꞌtz ja jal mas kꞌej iꞌ ẍchiwutz yi eꞌ ángel, na ja takꞌ Ryos mas kꞌej iꞌ swutz yi chikꞌej yi eꞌ ángel. Ej nin nchaꞌtz yi tetz biꞌ at mas kꞌej swutz chibiꞌ yi eꞌ ángel.a 5 Na quiꞌc nin jun tir yi jajk tal Ryos tetz jun ángel:
“Aẍ jun cꞌoloj inCyꞌajl, jaluꞌ nnoꞌc tetz ataj.”b
Ej nin nchaꞌtz quiꞌc nin jun tir yi jajk tal Ryos yi xtxolbileꞌj tetz jun ángel:
“Nocopon tetz ataj nin yi aẍatz cẍocopon tetz incyꞌajl.”c
6 Ej nin yi txant tan sajeꞌn ẍchakol yi tetz Cyꞌajl tzoneꞌj wuxtxꞌotxꞌ, yi jun yi cyaꞌl na opon tan stzꞌamleꞌn yi tetz kꞌej, je yol Ryoseꞌj tetz:
“Tajweꞌn tan cyoqueꞌn yi eꞌ ángel tan acꞌuꞌlajeꞌn.”d
7 Poro apart yol tal iꞌ scyetz yi eꞌ ángel:
“Yi eꞌ weri inángel,
chin lajkeꞌl nin na chixon,
chi na xon cyekꞌekꞌ.
Nin niꞌcuꞌn eꞌ tu takꞌ kꞌakꞌ,
yi na jeꞌ litꞌp.”e
8 Poro apart yi yol yi nxcon tan Ryos tan talcheꞌn yi ẍeꞌn taneꞌn yi tetz Cyꞌajl. Je yol iꞌeꞌj:
“I iluꞌaꞌtz iluꞌ Ryos.
Nin tetz ben kꞌej ben sak,
quil tzꞌel yi caꞌwl yi at tkꞌabuꞌ,
na chin tzꞌaknak cuninuꞌ,
nin mpe nin skꞌil na cawunuꞌ.
9 Wiꞌnin na pekꞌuꞌ tan banleꞌn
yi eꞌchk takleꞌn balaj.
Nin qui na pekꞌuꞌ
tan banleꞌn yi eꞌchk takleꞌn cachiꞌ.
Chaꞌstzun te ja takꞌ yi Ryosiluꞌ
mas tzatzin paz teruꞌ
ẍchiwutz yi eꞌ mas tuchꞌuꞌ.”f
10 Nchaꞌtz at jun xtxolbil yi alijt cyen:
“Wajcaw, iluꞌ cuꞌsan yi wuxtxꞌotxꞌ tentz.
Nin iluꞌ bnol tetz yi tcyaꞌj.
11 Yi eꞌchk takleꞌnaꞌtzeꞌj sotzok teraꞌtz,
poro yi iluꞌ teruꞌ quil sotzuꞌ.
Tzꞌaꞌtokuꞌ tetz ben kꞌej ben sak.
Sbuꞌyink yi wuxtxꞌotxꞌ tu yi tcyaꞌj
chi na buꞌyin jun beꞌch ketz.
12 Na yi wuxtxꞌotxꞌ tu yi tcyaꞌj,
niꞌcuꞌn tu jun beꞌchok yi na el te peꞌm.
Chelepon cyeꞌtz te peꞌm.
Nin sbnixok acꞌaj tcyaꞌj tu acꞌaj wuxtxꞌotxꞌ.
Poro yi iluꞌ teruꞌ, iẍnin atuꞌ-tz.
Quiꞌc quimbiluꞌ tetz ben kꞌej ben sak.”g
13 Nchaꞌtz, quiꞌc jun tir yi jajk tal Ryos tetz jun ángel:
“Cꞌolchin cuꞌn le insbal jalen cuꞌn choꞌc eꞌ acontr waꞌn jakꞌ awukan.”h
14 Ma yi eꞌ ángel ¿mbi ekaꞌn cyaꞌn? Eꞌ ẍchakum Ryos, eꞌ cheꞌw cyekꞌekꞌ tuꞌ. Chakij cheꞌ tan Ryos tan kuchꞌeyeꞌn yi oꞌ ketz yi at kachꞌiw tan kacambal yi kutzꞌajbil.