Kaxajsiꞌch len kib te yi xtxolbil yi na kocsaj
2
1 I bin jaluꞌ ja kil yi at mas kꞌej yi Cyꞌajol. Chaꞌstzun te tajweꞌn yil koꞌc il tan xtxumleꞌn yi eꞌchk xtxolbil yi ja wiꞌt kubit bantz quil kaxajslen kib te yi na kocsaj. 2 Elnak katxum tetz yi at kꞌej yi eꞌchk caꞌwl yi cyalnak yi eꞌ ángel tentz. Nin elnak katxum tetz yi akꞌlij chicaws cyakil yi eꞌ, yi qui eꞌ xom te eꞌchk caꞌwlaꞌtz. 3 Ko akꞌlij chicaws yi eꞌ wunakaꞌtz tentz, ¿ẍeꞌn tzun keꞌl ketz swutz yi ketz kacaws? Ko quil koꞌc il tan ketzaj yi jun colbil ibaj yi chumbalaj nin, tzꞌakꞌlok kacaws, na wutzileꞌn cuꞌn Kajcaw ocnak tan xtxoleꞌn. Nin yi eꞌ yi quibit yi tetz yol ja el chitxum tetz yi at kꞌej. Nin baj chitxolil yi puntil sketz. 4 Ej nin ja lajluchax skawutz yi at kꞌej yi jun chusuꞌnaꞌtz, na wutzileꞌn cuꞌn Kataj Ryos na tzan tan ẍchajleꞌn yi iꞌtz yi bintzi tan yi eꞌchk jilwutz milawr yi na bnix taꞌn. Nin nchaꞌtz na tzan tan ẍchajleꞌn sketz yi iꞌtz yi bintzi tan yi eꞌchk jilwutz ajtzaꞌkl yi na takꞌ iꞌ tan porer yi Espíritu Sant scyetzak yi eꞌ kale na tajwit iꞌ ltakꞌwit.Kitzꞌun kutzicy kib tu Jesús
5 Nchaꞌtz quil takꞌ Ryos chikꞌej yi eꞌ ángel tan cyoqueꞌn tan cawuꞌn squibaj yi eꞌ wunak yi ẍchinajank tul yi acꞌaj wuxtxꞌotxꞌ yi sbnixok taꞌn tzantzaj, yi ilenin na wal xtxolbil scyeruꞌ. 6 Quil takꞌ amaꞌl scyetz eꞌ ángel tan cawuꞌn na tzꞌibaꞌnt cyen jun xtxolbil yi na tal:
“¿Mbi kaxac yi oꞌ wunak swutzuꞌ Taꞌ?
¿Mbi tzuntz yi na okꞌuꞌ skeꞌj?
Na yi oꞌ ketz quiꞌc ekaꞌn kaꞌn.
Nin txꞌaklij quimichil skawutz.
¿Mbi tzuntz yi atoꞌ tetz tajaluꞌ?
7 Bintzi, at mas chikꞌej yi eꞌ ángel skawutz ketz,
poro tetz cobox ntziꞌ tiemp,
na ja wiꞌt takꞌuꞌ ketz kakꞌej.
Nin at caꞌwl tkakꞌab,
tan kacawuneꞌn tib cyakil yi banij tanuꞌ.
8 At cyakil jakꞌ kukan.”a
Yi na elepont yi xtxolbilaꞌseꞌj yi na tal, yi at cyakil jakꞌ kukan, iꞌtz yi kocopon tan chicaweꞌn cyakil yi bnixnak tan Ryos. Poro txeꞌn el cuꞌn teꞌj yi xtxolbilaꞌseꞌj na na kil yi txeꞌn choꞌc cyakil jakꞌ kacaꞌwl.
9 Poro at kachꞌiw teꞌj tan tuꞌ yi na kil yi ẍeꞌn cuꞌn jaleꞌn kꞌej Jesús. Bintzi jalnak mas chikꞌej yi eꞌ ángel swutz iꞌ, poro tetz cobox ntziꞌ tiemp, bantz quimeꞌn iꞌ tetz kaxel yi oꞌ wunak. Yaꞌstzun bajij te iꞌ bantz lajluchaxeꞌn yi banl talmaꞌ Ryos skeꞌj. Ej nin tan yi qꞌuixcꞌuj yi tijnak iꞌ ja jal mas tetz kꞌej.
10 Baꞌn mban Ryos, yi jun yi bnol tetz cyakil eꞌchk takleꞌn nin yi taw cyakil, yi cweꞌn xtxumul yi tajweꞌn tan tijol Jesús qꞌuixcꞌuj. Na tan yi qꞌuixcꞌujaꞌtz yi tijnak ja oc tetz tzꞌaknak cuꞌn nin ja xcyeꞌ tan chicolpeꞌn wiꞌnin wunak, nin tan cyoponseꞌn tcyaꞌj. 11 Junit Kataj tu yi junaꞌtz yi oc tan katxaꞌleꞌn tan kaxconeꞌn tetz. Chaꞌstzun te, tetz cuꞌn talmaꞌ na tal iꞌ “Witzꞌun” sketz, na junit Kataj tuchꞌ. Kitzꞌun kutzicy kib tuchꞌ. 12 Na yaꞌstzun tzꞌibaꞌnt cyen:
“Taꞌ, swaleꞌ yi stziblaluꞌ scyetz eꞌ witzꞌun.
Chimbitzink ẍchiwutz cyakil yi eꞌ nim juy,
tan takꞌleꞌn inkꞌajsbil swutzuꞌ.”b
13 Nchaꞌtz alijt cyen taꞌn:
“Yi in wetz choꞌn kꞌuklij incꞌuꞌl te Ryos.”
Ej nin at junt tir yi tal:
“Atin ẍchixoꞌl yi eꞌ meꞌl cyꞌajluꞌ Taꞌ, yi ja cheꞌ takꞌuꞌ swetz.”c
14 I bin jaluꞌ yi oꞌ meꞌl cyꞌajl Ryos, oꞌ len cuꞌn wunak, at len kawankil. Nchaꞌtz nin ban iꞌ tetz. Tocsaj tib tetz wunak, nin ja jal wankil, bantz quimeꞌn tetz kaxel. Nin yi quimeꞌn iꞌ ja xcyeꞌ tan xiteꞌn yi porer Baybaꞌn, yi taw quimichil. 15 Sajleꞌnix tunintz ilenin na kaxob tetz yi quimichil yi txꞌaklij skawutz. Poro yi toqueꞌn iꞌ tetz wunak ja xcyeꞌ tan kelseꞌn liwr tkꞌab yi jun xoꞌwaꞌtz yi at sketz sajleꞌn tunintz. 16 Tech cuꞌn tib yi quinin oc il iꞌ tan quichꞌeyeꞌn yi eꞌ ángel, ma na tan kuchꞌeyeꞌn ketz yi oꞌ xonl Abraham. 17 Chin tajweꞌn cunin toqueꞌn iꞌ chi kutaneꞌn ketz, yi oꞌ titzꞌun, bantz xconeꞌn iꞌ tetz wiꞌtz kapaleꞌil swutz Ryos. Ej nin iꞌ yi kapaleꞌil yi na el kꞌajab skeꞌj, nin iꞌ yi kapaleꞌil yi na el cuꞌn te yi munl yi akꞌij tetz, na ja cuy yi ketz kapaj. 18 Chumbalaj nin iꞌ na list iꞌ tan quichꞌeyeꞌn yi eꞌ yi ateꞌ tul pilbil cyetz, na icyꞌnakpon yi pilbil tetz taꞌn.