At mas kꞌej Jesús swutz Moisés
3
1 I bin jaluꞌ eꞌuꞌ herman, yi eꞌuꞌ yi xansaꞌn cheꞌtuꞌ, yi eꞌuꞌ yi txaꞌij cheꞌtuꞌ tan Ryos, choꞌkuꞌ il tan xtxumleꞌn yi ẍeꞌn taneꞌn Cristo Jesús yi jun yi Ryos nchakon tzaj tan xconeꞌn tetz wiꞌtz kapaleꞌil. 2 Elnak kꞌab iꞌ te yi munl yi akꞌij tzaj tetz tan Ryos, chi banak Moisés yi el kꞌab te yi munl yi akꞌij tetz. 3 Poro at mas kꞌej Jesús swutz Moisés. Na niꞌcuꞌn Jesús chi jun bnol caꞌl, na at mas kꞌej jun bnol caꞌl swutz yi caꞌl yi na bnix taꞌn. 4 Nin elnak katxum tetz yi quiꞌc nin jun caꞌl yi ẍchuc na bnix, ma na at jun yi na bnon. Chaꞌstzun te at mas kꞌej Ryos na iꞌ bnon cyakil yi eꞌchk takleꞌn yi at. 5 Yi Moisés el kꞌab te yi munl yi akꞌlij tetz tan Ryos. Poro mos tuꞌ iꞌ taneꞌn tan chijutzꞌeꞌn yi eꞌ meꞌl cyꞌajl Ryos tentz, nin tan talcheꞌn scyetz yi mbi cuꞌn sbajok tzantzaj. 6 Poro yi Cristo nkꞌeꞌtz mos tuꞌ iꞌ, ma na iꞌ Cyꞌajol. Nin nchaꞌtz el kꞌab iꞌ te yi tetz munl yi akꞌlij tetz, na yi munl iꞌ iꞌtz tan kajutzꞌeꞌn yi oꞌ ketz yi oꞌ meꞌl cyꞌajl Ryos. Ko choꞌn kꞌuklij kacꞌuꞌl teꞌj, chin tajweꞌn cunin yi tzatziꞌn cuꞌn lkaxom te iꞌ, jalen cuꞌn yil kacambaj yi ajlij kacꞌuꞌl teꞌj. Poro ko na kacabej kacꞌuꞌl te iꞌ, nkꞌeꞌtz oꞌ meꞌl cyꞌajl iꞌ.At ujleꞌn tetz ketz, yi oꞌ yi atoꞌ tkꞌab Ryos
7 Na yaꞌstzun alijt cyen takꞌun yi Espíritu Sant, tul yi tuꞌj Kataj. Je xtxolbileꞌj:
“Ko na cxtzanwok tan tbiteꞌn yi yol Kataj Ryos,
banwok bin taneꞌn.
8 Nin quil tzeꞌtzax itajtzaꞌkl,
chi banakeꞌ yi eꞌ imam iteꞌ yi ateꞌ tzaj le amaꞌl tzꞌinunin tuꞌ.
Na ocnakeꞌ tan contriꞌn sweꞌj.
9 Wech ilenin quil yi eꞌchk milawr
yi bnix waꞌn tul yi caꞌwnak yob
yi eꞌ xon tul yi jun amaꞌlaꞌtz.
10 Quil eꞌchk milawraꞌtz poro tzeꞌtzax cyajtzaꞌkl.
Chaꞌstzun te ẍchiꞌcheꞌn incꞌuꞌl scyeꞌj, nintzun waltz:
‘Yi eꞌ wunakeꞌj, txꞌakxnakeꞌ tu cyajtzaꞌkl.
Qui na cyaj chixom te wetz wajbil.’
11 Chaꞌstzun ẍchiꞌcheꞌn incꞌuꞌl scyeꞌj,
nin bixeꞌ-tz waꞌn yi jun cuꞌn quiꞌc rmeril
tan cyocomponeꞌn tan ujleꞌn tzinxlaj,”a
stzun Ryos banak cyen.
12 Or bin quiluꞌ eꞌuꞌ wajwutz, na at jun ajtzaꞌkl yi na xcyeꞌ tan kajatxleꞌn len tkꞌab yi kaRyosil yi itzꞌ nin tetz. Iꞌtz yi ko qui na kocsaj cunin yi yol iꞌ. 13 Quil chixomuꞌ te jun ajtzaꞌklaꞌtz, ma na chiquiwsaj quibuꞌ squibil quibuꞌ, bantz qui pakxeꞌn jun ẍchixoꞌluꞌ. Na na poꞌtij kajtzaꞌkl tan tuꞌ yi na kakꞌ amaꞌl tetz yi jun ajtzaꞌklaꞌtz. Quil chichꞌiwuꞌ jalen le junt eklok tan chiquiwsal quibuꞌ, ma na chiquiwsaj quibuꞌ squibil quibuꞌ tul iteꞌn nin kꞌejaꞌtz yi na quiluꞌ yi at tajweꞌn scyeruꞌ. 14 Na skajatxeꞌ kib tu Cristo ko quil koꞌc il tan kꞌukeweꞌn kacꞌuꞌl te Ryos sbneꞌ opon tunintz. Tajweꞌn yil kꞌukeꞌ kacꞌuꞌl teꞌj chi yi koqueꞌn cunin tkꞌab iꞌ.
15 Ej nin at quiwel inyoleꞌj, na yaꞌstzun yi tzꞌibaꞌnt cyen:
“Ko na cxtzanwok tan tbiteꞌn yi yol Kataj Ryos,
banwok bin taneꞌn.
Quil tzeꞌtzax itajtzaꞌkl,
chi banakeꞌ yi eꞌ kamam kateꞌ,
yi ocnakeꞌ tan contriꞌn teꞌj Ryos,”b
chij yi tzꞌibaꞌnt cyen.
16 ¿Poro naꞌ scyetz eꞌ yi eꞌaꞌtz yi quibitnak yol iꞌ, nin pontzaj jeꞌn chitxꞌixpul cyajtzaꞌkl? Iꞌtz yi eꞌ yi eꞌ el tzaj tcyꞌal Moisés le tnum Egipto. 17 Ej nin yaꞌstzun yi eꞌaꞌtz yi tcꞌuꞌl caꞌwnak yob alaꞌ tir chiꞌch cꞌuꞌl Ryos scyeꞌj. Ej nin iteꞌn nin eꞌaꞌtz yi quimnakeꞌ le amaꞌl tzꞌinunin tuꞌ tan paj yi chijuchul quil. 18 Ej nin iteꞌn nin eꞌaꞌs yi jun cuꞌn bixeꞌ tan Ryos tan qui cyocomponeꞌn tan ujleꞌn le jun amaꞌlaꞌtz yi sukiꞌnt taꞌn, tan paj yi eꞌ cuꞌn pajol caꞌwl.
19 Ma jaluꞌ, yi na elepont cyakil eꞌchk xtxolbilaꞌseꞌj iꞌtz: Quinin eꞌ ocopon tul yi jun amaꞌlaꞌtz tan paj yi quinin cyocsaj cunin yi yol Ryos yi alijt scyetz.