4
1 I bin jaluꞌ eꞌuꞌ wajwutz, alijt tan Ryos yi at rmeril tan kocomponeꞌn tan ujleꞌn xlaj iꞌ. Poro or quiluꞌ, na lastum yi kol jal cobox ẍchixoꞌluꞌ yi quil tzꞌakꞌlij amaꞌl scyetz tan cyocomponeꞌn le jun amaꞌlaꞌtz. 2 Na yi eꞌ wunakaꞌtz tentz, quibit yi balaj stziblal, chi na kubit ketz jaluꞌ. Poro quiꞌc ntakꞌ scyetz na quinin kꞌukeꞌ chicꞌuꞌl teꞌj. 3 Poro yi oꞌ ketz yi ja wiꞌt kꞌukeꞌ kacꞌuꞌl te yi yol Ryos, at kopombil tan ujleꞌn te iꞌ. Na jun cuꞌn at jun ujleꞌn yi na chꞌiwan tetz ketz, na yaꞌstzun na elepont yi eꞌchk xtxolbil yi katxumeꞌ jalcuꞌn. Na je jun xtxolbileꞌj yi alijt cyen tan Ryos:“Chaꞌstzun ẍchiꞌcheꞌn incꞌuꞌl scyeꞌj,
nin bixeꞌ waꞌn yi jun cuꞌn quiꞌc rmeril
tan cyocomponeꞌn tan ujleꞌn tzinxlaj.”a
Poro yi tlol Ryos yi yolaꞌseꞌj nsken bnix yi tetz takꞌun, na yi bnixeꞌn yi wuxtxꞌotxꞌ taꞌn, ujeweꞌn nin ban iꞌ-tz. 4 Poro at junt xtxolbil yi alijt cyen, yi mbi cuꞌn banak Ryos le jukiꞌn kꞌej. Je xtxolbileꞌj:
“Le jukiꞌn kꞌej xcyeweꞌt Kataj Ryos te cyakil yi takꞌun.
Nin ujeweꞌn nin ban iꞌ-tz.”b
5 Ej nin at junt xtxolbil yi tzꞌibaꞌnt cyen yi na tal:
“Ja bixeꞌ waꞌn, yi quiꞌc rmeril tan cyocomponeꞌn tan ujleꞌn tzinxlaj.”c
6 Chaꞌstzun te quinin chicambaj yi eꞌ kamam kateꞌ yi jun ujleꞌnaꞌtz. Na, quibitnak yi balaj stziblal yi at jun ujleꞌn, poro quinin cyocsaj tan paj stzeꞌtzal yi cyalmaꞌ. Poro yi jun ujleꞌnaꞌtz ilenin na chꞌiwan tetz ketz. 7 Na yi teleꞌn tiemp naꞌwsajt Ryos yi jun ujleꞌnaꞌtz tetz Luwiy. Nin je yol iꞌeꞌj yi oc juclul le wiꞌ Luwiy:
“Ko na cxtzanwok tan tbiteꞌn yi yol Kataj Ryos,
banwok bin taneꞌn.
Nin quil tzeꞌtzax itajtzaꞌkl.”d
8 Chaꞌstzun te, quil choꞌcuꞌ tan xtxumleꞌn yi yaꞌtzk yi ujleꞌn yi talnak Ryos yi cyoponeꞌn yi eꞌ aj Israel tan Josué Canaán. Na yi iꞌtzk yi ujleꞌnaꞌtz, quiꞌt kloꞌ ntal Ryos junt tir tetz Luwiy pontzaj tlen.
9 Poro tan cyakil yi xtxolbilaꞌseꞌj na elepont yi jun cuꞌn at kachꞌiw te jun ujleꞌn, yi oꞌ yi oꞌ tanum Ryos. 10 Na cyakil yi eꞌ yi na chocopon xlaj Ryos tan ujleꞌn, ja tzun wiꞌt chujeꞌ-tz chi banak iꞌ tetz, yi xcyeweꞌn te takꞌun. 11 Chaꞌstzun te tajweꞌn cunin tan kabnol puers kib tan kacambal yi jun ujleꞌnaꞌtz. Na lastum kol kaxom te cyajtzaꞌkl yi eꞌ yi eꞌ ocnakeꞌ tan pajleꞌn yi caꞌwl Ryos tentz.
12 Na yi yol Kataj Ryos itzꞌ teraꞌtz, nin at porer. Nin nchaꞌtz mas tcuꞌn juyuchil swutz jun spar yi cabil len atit wiꞌ, na na xcyeꞌ tan tilweꞌn yi mbi na icyꞌ tkacꞌuꞌl. Quiꞌc jun eꞌchk takleꞌn yi quiꞌk na lajluchax taꞌn. 13 Na ilij tan Kataj Ryos yi ẍeꞌn kutaneꞌn cyakil yi oꞌ yi bnixnakoꞌ taꞌn. Quiꞌc jun yi nink xcyeꞌ tan teweꞌn yi mbi na icyꞌ tcꞌuꞌl, na niꞌcuꞌntz chi txꞌanlchoꞌ cuntuꞌk cyakil yi oꞌ yi bnixnakoꞌ taꞌn. Na quiꞌc jun ajtzaꞌkl yi quiꞌk na el xtxum tetz. Quiꞌc nin jun takleꞌn yi na icyꞌ tkacꞌuꞌl yi quiꞌk na til. Nin tajweꞌn yil kopon len swutz iꞌ tan talcheꞌn yi mbi cuꞌn mbaj kabnol.
Jesús yaꞌstzun yi wiꞌtz kapaleꞌil
14 Poro Jesús, yi Cyꞌajl Ryos, yaꞌstzun yi wiꞌtz kapaleꞌil, nin ja wiꞌt ocopon swutz Kataj Ryos. Chaꞌstzun te kajatxiꞌch len kib te yi na kocsaj. 15 Wiꞌnin na el kꞌajab iꞌ skeꞌj, na elnak xtxum tetz yi ketz kaplojil. Na yi tulakeꞌn iꞌ tzoneꞌj wuxtxꞌotxꞌ, jal wiꞌnin pilbil tetz yi ẍeꞌnk tan xubseꞌn. Nin quiꞌc nin jun pilbil ketz yi na ul skawutz yi quiꞌk micyꞌpon taꞌn, poro quinin xubsij tan paj. Chaꞌstzun te na el kꞌajab skeꞌj. 16 Qui tzunk kacabej kacꞌuꞌl tan kocomponeꞌn kale cꞌolcheꞌt yi ketz kapaleꞌil yi wiꞌnin na pekꞌ skeꞌj. Na baꞌn kajak cyakil cuybil kapaj tetz. Nin ko at tajweꞌn sketz baꞌn kajak yi ẍchꞌeybil ketz tetz. Na list iꞌ tan kuchꞌeyeꞌn tan tuꞌ yi wiꞌnin na el kꞌajab skeꞌj.