5
1 I bin jaluꞌ katxumeꞌ junt xtxolbil. Cyakil yi eꞌ wiꞌtz paleꞌ yi na chixcon scyetz wunak, bixbaꞌncheꞌ tan telseꞌn chitziꞌ yi eꞌ chitanum swutz Ryos, nin tan toyeꞌn eꞌchk chitxꞌixwatz tu eꞌchk cyoy. Yaꞌstzun na chiban tan stzajseꞌn yi quil. 2 Ej nin tan tuꞌ yi eꞌ tuꞌ wunak yi eꞌ paleꞌaꞌtz na chixubsij. Nchaꞌtz na quil yi qꞌuixbel yi eꞌchk pilbil cyetz yi eꞌ mas wunak. Ej nin tan tuꞌ yi na quil yi qꞌuixbelaꞌtz, na jal chipasens scyeꞌj yi eꞌ yi na chijuch quil, tan paj yi txeꞌn el chitxum te yi tajbil Ryos. Nin na jal chipasens scyeꞌj yi eꞌ yi elnakeꞌ tuꞌ yab. Na nchaꞌtz eꞌ, eꞌ tuꞌ wunak nin at na ban cuꞌnt na chixubsij cyetz. 3 Chaꞌstzun te tajweꞌn tan cyoyil yi cyetz chitxꞌixwatz tan stzajseꞌn yi cyetz quil, chi na chiban tan toyeꞌn chitxꞌixwatz yi eꞌ mas wunak.4 Poro quiꞌc rmeril yi nink tzꞌoc jun yaj tetz wiꞌtz paleꞌ tan tuꞌ yi yaꞌtz tetz tajbil. Ma na tajweꞌn yi txaꞌijt tan Ryos, chi banak Ryos te Aarón. 5 Nin yaꞌtz tulej Ryos yi Cristo. Nkꞌeꞌtz ẍchuc iꞌ bixbal tib tan toqueꞌn tetz wiꞌtz kapaleꞌil ma na Ryos bixban iꞌ te yi jun munlaꞌtz yi wiꞌnin kꞌej. Na je yol Ryos yi talnakeꞌj:
“Aẍ jun cꞌoloj inCyꞌajl, jaluꞌ nnoꞌc tetz ataj.”a
6 Nchaꞌtz at junt xtxolbil yi tzꞌibaꞌnt cyen yi na tal:
“Yi aẍ awetz, aẍ paleꞌ tetz ben kꞌej ben sak.
Niꞌcuꞌn amunl chi yi munl Melquisedec,”
chij Ryos bantz tetz.b
7 Nchaꞌtz yi at tzaj Cristo tzoneꞌj wuxtxꞌotxꞌ, cuꞌ wutz swutz Ryos tan jakleꞌn yi ẍchꞌeybil tetz. Nin yi toqueꞌn iꞌ tan nachleꞌn Kataj, nternin tokꞌlej iꞌ, nin chin tjaꞌj nin iꞌ ban tan yol tan cꞌuꞌcheꞌn yi ẍchꞌeybil tetz, tetz Ryos. Xcyeꞌ kloꞌ Ryos tan colcheꞌn iꞌ tkꞌab quimichil yi yaꞌtzk tajbil, poro quiꞌ. Tbit Ryos yi stziꞌ yi kul tan tuꞌ yi tocsaj tib juy, nin tan tuꞌ yi tekal iꞌ ẍchiꞌ Ryos. 8 Nin tan tuꞌ yi tij iꞌ qꞌuixcꞌuj, aꞌw tekeꞌn ẍchiꞌ Ryos taꞌn, wech Cyꞌajl Ryos iꞌ. 9 Ej nin yi nsken oc iꞌ tetz tzꞌaknak cuꞌn tan tuꞌ yi cꞌulutxumil iꞌ yi njal swutz yi taj, ja xcon iꞌ tan chicolcheꞌn cyakil yi eꞌ yi na choꞌc cꞌulutxum jakꞌ caꞌwl iꞌ. 10 Na bixbaꞌnt iꞌ tan Ryos tetz jun wiꞌtz paleꞌ. Nin niꞌcuꞌn yi munl iꞌ tu yi munl Melquisedec.
At eꞌ yi txeꞌn chiquiwix te yi na kocsaj
11 Na kloꞌ waj lwal mas xtxolbil scyeruꞌ tetz Melquisedec. At qꞌuixbel tan xtxꞌolcheꞌn xoꞌl, poro lastum qui na cyajuꞌ quibituꞌ. 12 Ja kloꞌ wiꞌt choꞌcuꞌ tetz aj chusunl, na jatix loꞌ tiemp cyocleꞌnixuꞌ tkꞌab Kataj. Poro lastum, ilenin na taj chichusleꞌnuꞌ te eꞌchk xtxolbil yi chin sensiy nin. Niꞌcuꞌn eꞌuꞌ chi eꞌ niꞌ yi ntin txuꞌtx na baj cyaꞌn, yi qui na chixcyeꞌ tan wochꞌleꞌn eꞌchk takleꞌn quiw. 13 Yi eꞌ niꞌ yi na chitxutxuneꞌt, txeꞌn jal cyajtzaꞌkl. Qui na el chitxum tetz yi ko baꞌn yi na chiban nka quiꞌ. Niꞌcuꞌn tzun eꞌuꞌ-tz chi eꞌ niꞌ. 14 Poro yi eꞌ yi ja chiquiwix tkꞌab Kataj, niꞌcuꞌn eꞌ chi quitaneꞌn yi eꞌ tijlcꞌuꞌlal yi na chixcyeꞌ tan wochꞌleꞌn eꞌchk takleꞌn quiw. Na at cyajtzaꞌkl, nin na el chitxum tetz yi ko baꞌn na chiban nko quiꞌ.