Wiꞌnin xtxintxal kol kapakxij
6
1 Quin bin skawutz tan koqueꞌn tetz tzꞌaknak cuꞌn. Quiꞌt katxum yi eꞌchk chusuꞌn sensiy, chi taneꞌn, yi ẍeꞌn taneꞌn Cristo. Nin yi tajweꞌn katxꞌixpul yi kajtzaꞌkl. Nin yi tajweꞌn kꞌukeꞌ kacꞌuꞌl. 2 Nin yi mbi ekaꞌn tan yi eꞌchk bautism. Nin yi mbi na elepont yi na jeꞌ kꞌab jun ẍchiwiꞌ kajwutz. Nin yi mbi na elepont yi itzꞌeꞌn junt tir, tu yi at tulbil chicaws yi eꞌ mal nak tetz ben kꞌej ben sak. 3 Ej nin ko yaꞌtz tajbil Ryos katxumeꞌ yi eꞌchk chusuꞌn yi at mas tajweꞌn.4 Na quiꞌc rmeril tan chipakxeꞌn tzaj yi eꞌ yi ja chipakxij junt tir tul tzꞌoꞌtz wutzil. Na ko nsken el chitxum tetz yi eꞌchk takleꞌn balaj yi sukiꞌnt tan Ryos sketz; nin ko nsken akꞌlij yi Espíritu Sant scyetz; 5 nin ko elnak chitxum tetz yi ẍchiꞌal yi yol Ryos tu yi eꞌchk milawr yi sbajok tzantzaj yil bnix yi acꞌaj tcyaꞌj tu yi acꞌaj wuxtxꞌotxꞌ, quiꞌc rmeril tan xtxꞌixpeꞌn junt tir cyajtzaꞌkl tan chixomeꞌnt te Ryos. 6 Na cyakil yi eꞌ yi na chipakxij, niꞌcuꞌn tzuntz chi najk chitzan tan jeꞌseꞌn junt tir yi Cyꞌajl Ryos swutz pasyon, na na chitzan tan telseꞌn yi xtxꞌix Kajcaw Jesucristo ẍchiwutz cyakil wunak.
7 Je bin junt elsawutzileꞌj, tan lajluchaxeꞌn yi xtxolbil yi ja wiꞌt wal scyeruꞌ: Yi eꞌ balaj wunak niꞌcuꞌn eꞌ tu jalaj luwar yi na cuꞌ abal tibaj, nin na takꞌ balaj cosech. Na at banl Kataj squibaj. 8 Poro yi eꞌ yi na chipakxij, niꞌcuꞌn eꞌ tu jalaj txꞌotxꞌ yi na cuꞌ abal tibaj, poro ntin txꞌiꞌx na takꞌ. Quiꞌc banl Kataj squibaj. Quiꞌc muꞌẍ tal chixac swutz Ryos. Nin wiꞌtzbil tlen chisotzok cyeraꞌtz tan kꞌakꞌ, chi na ban txꞌiꞌx.
Kꞌuklij kacꞌuꞌl te yi at kachꞌiw teꞌj
9 Bintzi yi xtxolbilaꞌtzeꞌj yi nwal scyeruꞌ eꞌuꞌ jun cꞌoloj wajwutz. Poro ja el intxum tetz yi nkꞌeꞌtz niꞌcuꞌn quitaneꞌnuꞌ chi quitaneꞌn yi eꞌaꞌtz yi na chipakxij. Na yi cyeruꞌ tzan lajluchaxeꞌn yi eꞌchk takleꞌn balaj scyeꞌjuꞌ yi na ẍchaj yi ja wiꞌt chiclaxuꞌ. 10 Nin yi ketz kaRyosil chumbalaj nin iꞌ, nkꞌeꞌtz juntlen tajtzaꞌkl. Quil tzꞌel te cꞌuꞌl cyakil yi eꞌchk takleꞌn balaj yi mbaj chibnoluꞌ, tu yi eꞌchk ichꞌeyaꞌn yi na chibanuꞌ scyeꞌj yi eꞌ kajwutz sajleꞌn tunintz. Nin tan tuꞌ yi yaꞌtz na chibanuꞌ, na lajluchax yi na chipekꞌuꞌ teꞌj. 11 Nin na kloꞌ waj yil chibanuꞌ siguir yi jun ajtzaꞌklaꞌtz chijunalenuꞌ jalen yil tzꞌul tzaj Kajcaw Jesucristo, bantz chicambaluꞌ yi na chiwutz cyenuꞌ teꞌj. 12 Qui na waj yi nink chicyꞌajixuꞌ tan chixomeꞌnuꞌ te Kataj, poro na waj yil chixomuꞌ te yi cyajtzaꞌkl yi eꞌ yi nternin kꞌuklij chicꞌuꞌl te Ryos, yi eꞌ yi jalnak chipasens tan chicambal yi oy yi sukiꞌnt tan Kataj scyetz.
13 Chixomokuꞌ bin te tajtzaꞌkl Abraham, na yi jiloneꞌn Ryos tetz tan talcheꞌn yi stkꞌeꞌ iꞌ yi banl tibaj, ja xcon iteꞌn nin biꞌ iꞌ taꞌn tetz stiwil yi yol iꞌ, na quiꞌc nin junt biꞌaj yi atk mas kꞌej swutz yi tetz biꞌ. 14 Nin je yol iꞌ yi talnak tetz Abraham: “Jun cuꞌn yol swakꞌeꞌ imbanl tzawibaj, nin tan in lpucꞌuneꞌt wiꞌnin axonl,” stzun Ryos bantz tetz. 15 Nin tan tuꞌ yi nim cuntunin cꞌuꞌl Abraham tan ẍchꞌiweꞌn, ja cambaj yi nsuk Ryos tetz. 16 Nchaꞌtz jaluꞌ na el katxum tetz, yi eꞌ wunak na chijoy quiwel chiyol. Ej nin tan tuꞌ yi na xcon eꞌchk quiwelaꞌtz cyakꞌun na chixcyeꞌ tan xiteꞌn yi oyintziꞌ. 17 Niꞌcuꞌn tzun banak Ryos tan ẍchajleꞌn yi at kachꞌiw te yi banl iꞌ yi suknak tetz Abraham. Na nkꞌeꞌtz ntin suk iꞌ yi yol ma na xcon jun quiwel yi yol iꞌ tan ẍchajleꞌn yi jun cuꞌn tzꞌelepon kꞌab te tetz yol. 18 At bin cob quiwel yi quiꞌc rmeril tan jeꞌn txꞌixp, iꞌtz yi yol Ryos, tu yi quiwel yi yol iꞌ yi xcon taꞌn. Na yi ketz kaRyosil quiꞌc rmeril yi quiꞌk tzꞌel kꞌab te yi tetz yol. Chaꞌstzun te yi oꞌ yi ja wiꞌt koꞌc tkꞌab Ryos tan kacolol kib, baꞌn kꞌukeꞌ kacꞌuꞌl teꞌj yi jun cuꞌn skacambok te yi at kachꞌiw teꞌj. 19 Ej nin yi jun xtxolbilaꞌtz iꞌtz jun chin tzꞌamol ketz tan qui kabeneꞌn tul il. Na niꞌcuꞌn chi cꞌalij choꞌ-k tan jun akwil yi opnak tzaj yi juꞌ kale najleꞌt Ryos. Chin quiw nin yi jun akwilaꞌtz taneꞌn, nin chin tzantzuj nin taneꞌn na quiꞌc rmeril yi nink saj pujx tcyaꞌj. 20 Na yaꞌstzun yi amaꞌl kale opnakit yi kabajxom, yi Jesús, yi kapaleꞌil yi bixbaꞌnt tetz ben kꞌej ben sak chi banak Melquisedec.