Niꞌcuꞌn munl Jesús tu yi munl Melquisedec
7
1 I bin jaluꞌ katxumeꞌ yi mbi cuꞌn banak Melquisedec. Iꞌ rey banak tetz yi tnum Salem. Nchaꞌtz, iꞌ paleꞌ swutz yi mero wiꞌtz Ryos. Nin iꞌ yi jun yi el tzaj tan cꞌulcheꞌn Abraham yi pakxeꞌn tzaj tan chibiyleꞌn yi eꞌ rey tul oyintziꞌ. Yaꞌstzun yi tkꞌol iꞌ yi banl Kataj tib Abraham. 2 Nin iꞌ tzꞌamon yi diesum Abraham yi saj cambal tul yi jun oyintziꞌaꞌtz.a Yi na elepon yi biꞌ Melquisedec iꞌtz: “Yi jun yi chin tzꞌaknak cuꞌn cawun, nin yi quiꞌc muꞌẍ paltil”. Nchaꞌtz aꞌlchij tetz yi iꞌ rey yi na cawun le tnum Salem. Ma yi Salemaꞌtz na elepont, “tzatzin paz”. Chaꞌstzun te ja aꞌlchij tetz: “Rey yi na akꞌon tzatzin paz”. 3 Jeꞌnak tu jobtuj iꞌ, na quiꞌc stziblal yi taj xtxuꞌ. Nin quiꞌc stziblal yi xonl iꞌ. Quiꞌc tkanil yi ẍeꞌn titzꞌeꞌn iꞌ. Nin quiꞌc stziblal yi ko quimnak iꞌ nka quiꞌ. Chaꞌstzun te iꞌ jun elsawutzil te yi Cyꞌajl Ryos, na iꞌ jun paleꞌ tetz ben kꞌej ben sak taneꞌn.4 Nchaꞌtz wiꞌnin kꞌej Melquisedec, na takꞌnak kꞌajtzun Abraham yi diesum tetz, te yi cambal tul yi oyintziꞌ.
5 I bin jaluꞌ, na el katxum tetz yi eꞌ xonl Leví ntin eꞌ baꞌn chixcon tetz paleꞌ. Nin ntin eꞌ at cu tan chixconsal yi chidiesum yi chitanum. Na yaꞌstzun tzꞌibaꞌnt cyen tan Moisés. At bin chikꞌej na eꞌ na xconsan chidiesum yi eꞌ mas chitanum. 6 Poro yi Melquisedec at mas kꞌej iꞌ ẍchiwutz yi eꞌ paleꞌaꞌtz, na nkꞌeꞌtz niꞌcuꞌn chitanum tu Abraham, poro ja stzꞌam iꞌ yi diesum Abraham. Nin ja takꞌ iꞌ yi banl tib Abraham. Wech na nsken cyen takꞌ Ryos yi kꞌej Abraham. 7 Na tzun elepont yi at mas kꞌej Melquisedec swutz Abraham. Na ilenin at mas kꞌej yi jun yi na akꞌon banl swutz yi na tzꞌamon tetz. 8 Nchaꞌtz at mas kꞌej Melquisedec ẍchiwutz yi eꞌ mas paleꞌ, na yi eꞌ mas paleꞌ na chiquim cyeraꞌtz. Poro yi Melquisedec yi tzꞌamon yi diesum Abraham niꞌcuꞌn chi itzꞌ nin iꞌ jaluꞌ. Na yaꞌstzun na elepont yi xtxolbil yi tzꞌibaꞌnt cyen.
9 Nchaꞌtz yi eꞌ tu Leví yi tzꞌamol tetz chidiesum yi eꞌ katanum. Niꞌcuꞌn tzuntz chi choꞌnk cyakꞌnak chidiesum tetz Melquisedec yi tkꞌol Abraham yi tetz diesum tetz. 10 Na yi teleꞌn tzaj Melquisedec tan cꞌulcheꞌn Abraham, nin yi tkꞌol Abraham yi tetz diesum tetz, ateꞌ yi xonl Abraham twankil iꞌ.
11 Ma jaluꞌ yi eꞌ paleꞌ, yi eꞌ tu Leví, yi eꞌ xonl Aarón, ja chixcon tan xtxꞌolcheꞌn xoꞌl yi ley Moisés scyetz yi eꞌ mas chitanum. Poro yi jak chixcyeꞌ tan chicolpeꞌn wunak, ¿mbi tzun kloꞌ xac sajeꞌn ẍchakol Ryos junt jilwutz paleꞌ chi taneꞌn Melquisedec? ¿Mbi tzuntz quinin xcon jun paleꞌ yi xonl Aarón? 12 Ej nin tan tuꞌ yi sajeꞌn ẍchakol junt paleꞌ yi apart, tajweꞌn tan xtxꞌixpeꞌn yi eꞌchk cstumbr yi xomcheꞌ yi eꞌ paleꞌ teꞌj. 13 Ja txꞌixpij yi eꞌchk cstumbr, na elnak katxum tetz yi nkꞌeꞌtz xonl Aarón yi Kajcaw Jesucristo. Na choꞌn titzꞌeꞌn iꞌ ẍchixoꞌl junt txꞌakaj yi quinin chixcon tetz paleꞌ. 14 Iꞌtz yi eꞌ xonl Judá. Wech qui tal Moisés le xeꞌtzbil tzaj yi at cyocbil yi eꞌ tu Judá tetz paleꞌ.
15 Ej mas tcunin na lajluchax yi ja txꞌixpij yi eꞌchk cstumbraꞌtz, na ja oc junt acꞌaj paleꞌ yi niꞌcuꞌn tu Melquisedec yi nkꞌeꞌtz xonl Leví. Wech tzꞌibaꞌnt cyen yi ntin at cu tan cyoqueꞌn yi eꞌ xonl Leví tetz paleꞌ. 16 Poro yi Jesús oc iꞌ tetz paleꞌ tan tuꞌ yi at porer iꞌ tan qui quimeꞌn tetz ben kꞌej ben sak. 17 Na yaꞌstzun talnak Ryos tetz:
“I bin jaluꞌ ja cẍbixeꞌ tetz jun paleꞌ,
tetz ben kꞌej ben sak,
chi taneꞌn Melquisedec.”b
18 Chaꞌstzun te ja xit yi eꞌchk antiw cstumbraꞌtz, na quinin xcyeꞌ tan chiclaxeꞌn wunak, na quiꞌc porer tuchꞌ. 19 Quinin xcyeꞌ yi eꞌchk antiw cstumbraꞌtz tan cyoqueꞌn wunak tetz tzꞌaknak cuꞌn swutz Ryos. Poro yi jaluꞌ at junt xtxolbil yi mas baꞌn tcuꞌn yi kꞌuklij kacꞌuꞌl teꞌj, na na xcyeꞌ tan kocseꞌn tetz tzꞌaknak cuꞌn, nin tan koponseꞌn te Ryos.
20 Nchaꞌtz at junt xtxolbil tan ẍchajleꞌn yi at mas kꞌej yi ketz kapaleꞌil nin je puntileꞌj: Wutzileꞌn cuꞌn Ryos xcon stiwil yol iꞌ taꞌn yi bixeweꞌn Jesucristo tetz kapaleꞌil. 21 Yi jun ajtzaꞌklaꞌtz qui xcon scyeꞌj yi eꞌ mas paleꞌ yi nchibixeꞌ, poro ja xcon yi bixeweꞌn Jesucristo, na je xtxolbileꞌj yi tzꞌibaꞌnt cyen:
“Xcon stiwil yi yol wutzileꞌn Kajcaw taꞌn,
nin quil xtxꞌixpuj tajtzaꞌkl.
Je yol iꞌeꞌj:
‘Ja cẍbixeꞌ jaluꞌ tetz paleꞌ tetz ben kꞌej ben sak,
chi taneꞌn Melquisedec,’ ” stzun Ryos banak cyen.c
22 Chaꞌstzun te tan yi xtxolbilaꞌseꞌj na lajluchax yi mas baꞌn tcuꞌn Jesús tetz quiwel yi acꞌaj trat yi ja bixeꞌ tan chiclaxeꞌn wunak. Mas baꞌn tcuꞌn yi jun acꞌaj trataꞌtz swutz yi xtxolbil yi xcon cyakꞌun yi eꞌ paleꞌ sajleꞌnix tunintz. 23 Alaꞌ chixoneꞌn yi eꞌ paleꞌaꞌtz yi ja chixcon sajleꞌnix tunintz, na tan paj yi na chiquim tajweꞌn tan joyleꞌn chixel. 24 Poro nkꞌeꞌtz niꞌcuꞌn Jesús scyuchꞌ yi eꞌaꞌs, na yi iꞌ tetz quiꞌc quimbil. Qui bin tajweꞌn joyleꞌn xel iꞌ. 25 Chaꞌstzun te quiꞌc stzajsbil wiꞌ yi munl iꞌ tan chicolpeꞌn yi eꞌ wunak yi na chiẍkans quen quib te Ryos tan iꞌ. Na ilenin at iꞌ tan jakleꞌn cuybil kapaj yi oꞌ yi na kaẍkans quen kib te Ryos.
26 Chaꞌstzun te eꞌuꞌ wajwutz, yi Jesúsaꞌtz, iꞌ yi paleꞌ yi tajweꞌn tetz ketz, na chin sant nin iꞌ. Quiꞌc muꞌẍ tal paltil. Quiꞌc muꞌẍ tal til iꞌ. Nkꞌeꞌtz juchul il, nin choꞌn at iꞌ jaleꞌn tziꞌn tcyaꞌj. 27 Nin yi iꞌ tetz nkꞌeꞌtz niꞌcuꞌn iꞌ chi quitaneꞌn yi eꞌ mas paleꞌ yi cyakil kꞌej tajweꞌn tan chibiyol jujun txuc tetz cyetz chitxꞌixwatz, bantz cyoqueꞌn tan toyeꞌn chitxꞌixwatz yi eꞌ mas wunak. Nkꞌeꞌtz niꞌcuꞌn iꞌ scyuchꞌ, na jun ntziꞌ tir takꞌ tib iꞌ tetz chitxꞌixwatz cyakil wunak. 28 Nin nkꞌeꞌtz niꞌcuꞌn iꞌ scyuchꞌ yi eꞌ wiꞌtz paleꞌ yi na chibixeꞌ, quib yi na cawun yi ley Moisés teꞌj, na nkꞌeꞌtz tzꞌaknak cuꞌn eꞌ. At len chipaltil. Poro yi Kataj Ryos pontzaj tlen bixeꞌ yi tetz Cyꞌajl taꞌn tetz kapaleꞌil. Nin xcon stiwil yi yol iꞌ taꞌn yi bixeweꞌn Jesús tetz paleꞌ tetz ben kꞌej ben sak. Ntin iꞌ yi chin tzꞌaknak cuꞌn tan teleꞌn cuꞌn te yi jun jilwutz munlaꞌtz.