Hebreos 8

At mas kꞌej yi caꞌp xtxolbil swutz yi bajx

1 I bin jaluꞌ yi na elepont cyakil yi ja wiꞌt wal scyeruꞌ iꞌtz yi at jun ketz kapaleꞌil yi chin tzꞌaknak cunin. Ej nin choꞌn cꞌolchij iꞌ xlaj Kataj jalen tziꞌn tcyaꞌj. 2 Nin na ban iꞌ yi tetz munl tul yi mero caꞌl Ryos yi at tziꞌn tcyaꞌj, yi nkꞌeꞌtz wunak bnol tetz ma na Ryos. 3 Bixbaꞌncheꞌ yi eꞌ wiꞌtz paleꞌ tetz tzoneꞌj wuxtxꞌotxꞌ, tan toyeꞌn eꞌchk oy tu chitxꞌixwatz wunak tetz Ryos. Niꞌcuꞌn tzun yi ketz kapaleꞌil, tajweꞌn yi cyꞌaꞌn jun oy taꞌn tetz. 4 Poro yi choꞌnk at Cristo tzoneꞌj wuxtxꞌotxꞌ quiꞌc cu tan toqueꞌn iꞌ tetz paleꞌ. Na ateꞌ nin yi eꞌ paleꞌ yi bixbaꞌncheꞌ tan yi ley Moisés. Nin ntin eꞌ at cu tan cyoqueꞌn tan toyeꞌn eꞌchk oy tetz Ryos. 5 Ej nin yi altar tu eꞌchk maꞌcl yi na xcon cyaꞌn yi eꞌ paleꞌ tzoneꞌj wuxtxꞌotxꞌ iꞌtz jun tuꞌ elsawutzil te yi mero altar tu yi eꞌchk mero maꞌcl yi at tziꞌn tcyaꞌj. Na el katxum tetz yi elsawutzil tuꞌ yi bnix tan Moisés, na yi ntaxk oc Moisés tan banleꞌn yi mantial, tal Ryos tetz: “Banaj cyakil quib yi inchaj tzatz wiꞌwtz Sinaí,” stzun Ryos ban.

6 Yi xtxolbilaꞌseꞌj na elepont yi at mas kꞌej yi munl yi wiꞌtz kapaleꞌil swutz chimunl yi eꞌ wiꞌtz paleꞌ tetz tzoneꞌj wuxtxꞌotxꞌ. Nchaꞌtz na ẍchaj yi at mas kꞌej iꞌ, na iꞌ yi yolol te yi jun acꞌaj trat yi ja bixeꞌ tan kaclaxeꞌn. Yi jun xtxolbilaꞌtz mas baꞌn tcuꞌn swutz yi xtxolbil yi txumij cyen tentz, na at mas eꞌchk takleꞌn balaj yi sukiꞌnt taꞌn.

7 Ej nchaꞌtz yi quiꞌk muꞌẍ tal paltil yi bajx xtxolbil yi akꞌlij, quiꞌc kloꞌ tajweꞌn yi cweꞌn xtxumul Ryos junt acꞌaj trat. 8 Til Ryos yi at chipaltil yi eꞌ antiw nakaꞌtz, nin na el katxum tetz tan tuꞌ yi yol Kataj yi tzꞌibaꞌnt cyen yi na tal:

“Tzꞌopon jun tiemp yi sbixek jun acꞌaj trat waꞌn skaxoꞌl scyuchꞌ yi eꞌ xonl Israel, nin scyuchꞌ yi eꞌ xonl Judá.

9 Poro yi jun xtxolbilaꞌtz yi sbixek waꞌn,

nkꞌeꞌtz niꞌcuꞌn sbneꞌ tu yi jun xtxolbil

yi bnixnak waꞌn scyuchꞌ chimam chiteꞌ tentz

yi cyeleꞌn tzaj waꞌn le tnum Egipto.

Nin tan paj yi quinin chijepon tan banleꞌn taneꞌn,

quinin noꞌc il scyeꞌj.

10 Poro yi jun acꞌaj trat yi sbixek waꞌn tzantzaj scyuchꞌ yi eꞌ xonl Israel, apart puntil sbneꞌ:

Tzꞌocopon wetz incaꞌwl le chiwiꞌ.

Nin tzintzꞌibeꞌ cyen te cyalmaꞌ.

Kalenaꞌs tzun noꞌc tetz chiRyosil.

Nin yi eꞌ cyetz chocopon tetz intanum.

11 Nin yil bajij yi xtxolbileꞌj,

quiꞌc tajweꞌn tan toqueꞌn jun tan ẍchusleꞌn junt.

Na quiꞌc nin jun yi quiꞌk tzꞌel xtxum tetz

yi ẍeꞌn wutaneꞌn.

Nitxaꞌ loꞌ-tz, tijcꞌuꞌlal loꞌ-tz,

tircuꞌn eꞌ tzꞌelepon chitxum tetz yi ẍeꞌn wutaneꞌn.

12 Nin tzincuyeꞌ chipaj nin quiꞌt tzꞌul txꞌakx yi quil tincꞌuꞌl.”

Yaꞌstzun yol Ryos yi tzꞌibaꞌn cyen.

13 Ma jaluꞌ, yi beneꞌn tlol Ryos yi sbixek junt acꞌaj trat taꞌn, na tzun elepont yi ja baj walor yi bajx, nin txant tan teleꞌn cuꞌn swutz.