Hebreos 9

1 I bin jaluꞌ at wiꞌnin puntil yi bajx xtxolbil yi xomnakeꞌ yi eꞌ paleꞌ teꞌj yi cyoqueꞌn tan banleꞌn yi chimunl swutz Ryos. Nin at jun mantial yi chin xan nin yi xconak cyaꞌn tan cꞌuꞌlajeꞌn Ryos tzoneꞌj wuxtxꞌotxꞌ. 2 Nin yi biꞌ yi bajx cuart te jun mantialaꞌtz iꞌtz, Yi Amaꞌl Yi Xan. Nin tul yi jun cuartaꞌtz yaꞌstzun atit yi cantil tu yi mes kale ateꞌeꞌnt yi pam yi na xansij tetz Ryos. 3 Nin yi caꞌp cuart choꞌn at wutz coc yi bajx. Nin xbuꞌk tuꞌ at tetz jatxbil xoꞌl. Yaꞌstzun yi luwar yi na biꞌaj, Yi Amaꞌl Yi Wiꞌnin Xanil. 4 Nin tul yi jun cuartaꞌtz yaꞌstzun kale atit yi altar yi oro cuꞌn teꞌj, kale na chipatwit insens tibaj. Nin tul yi jun cuartaꞌtz choꞌn at yi caẍaꞌ yi oro cuꞌn teꞌj, kale at cuꞌnt yi bajx xtxolbil yi takꞌ Ryos tetz Moisés. Ej nin tcꞌuꞌl yi jun caẍaꞌaꞌtz yaꞌstzun kale at cuꞌnt jun xaruꞌ yi oro cuꞌn. Nin tcꞌuꞌl yi xaruꞌaꞌtz at maná. Ej nin nchaꞌtz tcꞌuꞌl yi jun caẍaꞌaꞌtz, yaꞌstzun kale at cuꞌnt yi xtxꞌamij Aarón yi xlumin swutz Faraón tentz, tu yi cob lepaj cꞌub kale tzꞌibaneꞌt yi bajx xtxolbil yi takꞌnak Ryos. 5 Ma tib yi caẍaꞌ yaꞌstzun kale ateꞌeꞌnt yi cob querubin, yi nchixcon tan ẍchajleꞌn yi yaꞌstzun kale najleꞌt Ryos. Elnak liꞌt chixicyꞌ tetz mujil yi jun caẍaꞌaꞌtz kale na cuyleꞌt chipaj yi eꞌ wunak. At mas xtxolbil poro stzicuꞌn te yi ja wiꞌt wal scyeruꞌ.

6 Ma yi nsken nucꞌxij yi eꞌchk takleꞌn tul yi cob amaꞌlaꞌtz kalenaꞌs tzun cyoqueꞌn yi eꞌ paleꞌ tul yi bajx cuart tan banleꞌn chimunl swutz Ryos. 7 Ma yi caꞌp cuart ntin yi wiꞌtz paleꞌ at cu tan toqueꞌn. Nin jun ntziꞌ kꞌej tul jun yob na oc iꞌ. Nchaꞌtz, tajweꞌn yi cyꞌaꞌn ẍchꞌel yi xtxꞌixwatz iꞌ taꞌn, tu yi ẍchꞌel yi chitxꞌixwatz yi eꞌ mas wunak tan toyeꞌn tetz, bantz cuyul Ryos yi tetz paj tu cyakil chipaj yi eꞌ mas wunak yi quinin tzꞌicyꞌ scyetz yi nchijuch quil.

8 I bin jaluꞌ na xcon yi eꞌchk xtxolbilaꞌseꞌj tan yi Espíritu Sant tan ẍchajleꞌn sketz yi quiꞌc cu tan toqueꞌn jun tul yi luwar yi chin xan tcunin, na ntin nxcon yi bajx cuart kale na chibanwit chimunl cyakil kꞌej swutz Ryos. 9 Nin cyakil yi eꞌchk takleꞌnaꞌtz yi nchiban, iꞌtz jun elsawutzil tetz ketz jaluꞌ, na quinin xcyeꞌ yi eꞌchk oyaꞌtz tu yi eꞌchk txꞌixwatz tan cyoqueꞌn tetz tzꞌaknak cuꞌn swutz Ryos. 10 Na cyakil yi eꞌchk chimunlaꞌtz yi nchiban cyen chi taneꞌn yi waꞌaꞌn, yi ucꞌaꞌaꞌn, tu yi xtxꞌajleꞌn chiwankil, quinin xcyeꞌ tan xtxꞌixpeꞌn cyajtzaꞌkl tan chixansal quib. Ma na jalen cuꞌn tucumuleꞌn yi tiempil yi njal junt xtxolbil mas balaj.

11 Na yi jaluꞌ at Jesucristo. Nin iꞌ yi wiꞌtz kapaleꞌil yi xcyek tan takꞌleꞌn yi eꞌchk takleꞌn balaj sketz. Nin mas baꞌn tcuꞌn yi amaꞌl kale na banwit yi ketz kapaleꞌil yi tetz munl, ẍchiwutz yi eꞌ paleꞌaꞌtz tentz. Na yi amaꞌl kale oqueꞌt yi ketz kapaleꞌil tan banleꞌn yi tetz munl, nkꞌeꞌtz wunak bnol tetz. Nin nkꞌeꞌtz choꞌn at tzoneꞌj wuxtxꞌotxꞌ. 12 Nin yi tocomponeꞌn Cristo tul, quinin xcon ẍchꞌel chiw taꞌn tetz katxꞌixwatz, nin quinin xcon yi ẍchꞌel cneꞌr taꞌn tetz katxꞌixwatz. Ma na iteꞌn nin yi tetz ẍchꞌel xcon taꞌn. Nin tpombil nin iꞌ bantz yi tocomponeꞌn tul yi jun amaꞌlaꞌtz tan kalokꞌcheꞌn ketz tetz ben kꞌej ben sak. 13 Bintzi at ekaꞌn tan chiẍchꞌel yi eꞌ tor yi nchibiylij tetz chitxꞌixwatz wunak, nin at ekaꞌn tan chiẍchꞌel yi eꞌ chiw. Nin nchaꞌtz at ekaꞌn tan eꞌ neꞌẍ wacẍ yi nchipatij wi altar. Nin at ekaꞌn tan yi chitzaꞌjil yi ja ben chitij squibaj yi eꞌ pajol caꞌwl. At ekaꞌn taꞌn, na ja xcyeꞌ tan chixansal quib taneꞌn. Nin ja xcyeꞌ tan xtxꞌajleꞌn chiwankil taneꞌn. Poro solteꞌj tuꞌ, na qui na xcyeꞌ tan xtxꞌixpeꞌn cyajtzaꞌkl. 14 Poro ko at ntakꞌ yi eꞌchk xtxolbilaꞌtz inin tzun pyor yi ẍchꞌel Cristo, na mas baꞌn yi tetz ẍchꞌel tetz katxꞌixwatz. Na, takꞌ tib iꞌ tetz katxꞌixwatz swutz Ryos tan porer yi Espíritu Sant. Nin quiꞌc muꞌẍ tal yanaꞌsil iꞌ. Nin ja xcyeꞌ yi tetz ẍchꞌel yi el kojxuj tan xtxꞌajleꞌn cunin te kalmaꞌ, nin tan telseꞌn len yi eꞌchk yab ajtzaꞌkl yi na xcyeꞌ tan kapitleꞌn nin tkꞌab quimichil, nin yaꞌstzun tulej bantz kaxconeꞌn tetz yi Ryos yi itzꞌ nin tetz.

15 Chaꞌstzun te at wiꞌnin kꞌej yi ẍchꞌel Cristo yi kayolol skaxoꞌl tu Ryos te yi acꞌaj trat. Nin iꞌ chiyolol cyakil yi eꞌ antiw wunak. Na ja quim iꞌ tan jaleꞌn cuybil chipaj cyakil antiw wunak yi xomnakeꞌ te yi bajx xtxolbil. Nin nchaꞌtz ja quim iꞌ tetz kaxel yi oꞌ yi chakij choꞌ taꞌn. Ej nin tan iꞌ skacambajeꞌ yi herens yi sukiꞌnt taꞌn tetz ben kꞌej ben sak. 16 Je jun elsawutzileꞌj tan lajluchaxeꞌn yi xtxolbil skawutz: Elnak katxum tetz yi at na ban cuꞌnt na bnix cyen jun uꞌj tan jun yaj yi ntaxk quim tan ẍchajleꞌn yi mbiꞌtz yi tajbil iꞌ te yi mebiꞌl yil quim. Poro quiꞌc rmeril tan cyetzal chan yi eꞌ yi ẍchicyajk swutz, ma na jalen cuꞌn lquim yi taw. 17 Kalenaꞌs tzun jal walor yi uꞌj yi bnixnak cyen tan yi taw luwar. 18 Niꞌcuꞌn tzun yi bajx xtxolbil yi txumijt cyen tan Ryos. Quinin bixeꞌ jalen cuꞌn quimeꞌn chitxꞌixwatz, nin yi beneꞌn tzꞌituꞌn yi ẍchꞌel squibaj. 19 Na yi wiꞌt tlol Moisés cyakil eꞌchk caꞌwlaꞌtz scyetz yi eꞌ wunak, kalenaꞌs tzun jeꞌn tcyꞌal jun quitxaj xiꞌil cneꞌr yi cyak yubil tu jun tal kꞌab hisopo. Nin cuꞌ muꞌul tul chiẍchꞌel eꞌ neꞌẍ wacẍ, tu yi chiẍchꞌel yi eꞌ chiw yi yujuꞌn tib tu aꞌ. Nintzun oc tan stzꞌiteꞌn cuꞌn tib yi liwr kale tzꞌibaneꞌt yi caꞌwl Ryos, nin nchaꞌtz oc tan stzꞌiteꞌn nin squib yi eꞌ wunak. 20 “Yi chichꞌeꞌj yaꞌstzun yi techl yi ja bixeꞌ yi xtxolbil yi ja cawun Ryos tan kabnol taneꞌn,” stzun Moisés bantz scyetz. 21 Nchaꞌtz baj stzꞌitul Moisés tul yi luwar yi chin xan nin, nin tibaj yi eꞌchk maꞌcl yi xcon cyaꞌn tan banleꞌn chimunl. 22 Na yi cyetz chiley iꞌtz yi jalen yil xansij cobox maꞌcl tan chichꞌ, kalenaꞌs tzun na xcontz cyaꞌn tan banleꞌn chimunl. Nin ko qui na el ẍchꞌel jun chitxꞌixwatz quiꞌc cuybil chipaj.

Jun ntziꞌ tir quim Cristo tan ẍchojleꞌn kil

23 Tajweꞌn bin tan xconeꞌn ẍchꞌel yi chitxꞌixwatz tan xansajeꞌn yi maꞌcl yi xconak cyaꞌn tan banleꞌn chimunl. Poro yi eꞌchk maꞌclaꞌtz yi xconak cyaꞌn, teblal tuꞌ yi mero maꞌcl yi at jalen tziꞌn tcyaꞌj. Poro quil xcyeꞌ yi chitxꞌixwatzaꞌtz yi na xcon tzoneꞌj wuxtxꞌotxꞌ tan xansajeꞌn yi mero maꞌcl yi at jalen tziꞌn tcyaꞌj. Ma na tajweꞌn cuꞌn junt txꞌixwatz yi mas baꞌn tcuꞌn tan xansajeꞌn. 24 Chaꞌstzun te yi ja xcon Cristo. Nin quinin oc iꞌ tul yi amaꞌl yi wiꞌnin xanil yi at tzoneꞌj wuxtxꞌotxꞌ, yi wunak tuꞌ bnol tetz, yi teblal tuꞌ yi eꞌchk maꞌcl yi at tcyaꞌj, ma na choꞌn tocomponeꞌn iꞌ swutz Ryos jalen tziꞌn tcyaꞌj. Ej nin yi munl iꞌ yi tocomponeꞌn iꞌtz tan toqueꞌn tetz ketz kapaleꞌil. 25 Yi eꞌ wiꞌtz chipaleꞌil yi eꞌ judiy, tul yobiꞌn na choꞌc le Amaꞌl Yi Wiꞌnin Xanil, tan toyeꞌn chichꞌ yi nkꞌeꞌtz cyetz. Poro Cristo quinin xom te jun ajtzaꞌklaꞌtz, ma na jun ntziꞌ tir suk tib. 26 Na yi nink suk tib wiꞌnin tir, tajweꞌn tzun kloꞌ tan quimeꞌn iꞌ alaꞌ tir jetz yi cuꞌleꞌn wuxtxꞌotxꞌ, poro quiꞌ. Quinin ban iꞌ yi xtxolbilaꞌtz, ma na yi jeꞌn poneꞌn tampuj yi eꞌchk tiemp, ja ulak tzoneꞌj wuxtxꞌotxꞌ. Na ja takꞌ tib iꞌ tetz katxꞌixwatz tan ẍchojleꞌn yi kil.

27 Jun ntziꞌ tir na kaquim ketz, nin xom tzaj yi maꞌleꞌn kajtzaꞌkl. 28 Niꞌcuꞌn tzun bajij te Jesucristo, na jun ntziꞌ tir ja quim iꞌ tan ẍchojleꞌn quil jun cꞌoloj wunak. Ej nin tzꞌul iꞌ junt tir. Poro nkꞌeꞌtz tan ẍchojleꞌn yi kil, ma na tan takꞌleꞌn yi itzꞌajbil yi quinin bajsbeꞌn tetz scyetz yi eꞌ yi nternin na el cyalmaꞌ tan quilol wutz iꞌ.