10
1 I bin jaluꞌ tan yi xtxolbilaꞌseꞌj ja el katxum tetz yi eꞌchk ley yi akꞌlij tetz Moisés iꞌtz elsawutzil tuꞌ te yi mbi lbajij. Teblal tuꞌ taneꞌn. Chaꞌstzun te quil xcyeꞌ yi eꞌchk leyaꞌtz tan cyoqueꞌn tetz tzꞌaknak cuꞌn yi eꞌ yi na cyaj chiẍkans quen quib kloꞌ te Ryos. Quinin xcyeꞌ chitxꞌixwatz yi ncyoy cyakil yob tan cyocseꞌn tetz tzꞌaknak cuꞌn. 2 Na yi jak xcyeꞌ ja kloꞌ chitaneꞌ tan toyeꞌn, nin ja kloꞌ chinachon te yi quiꞌc quil. 3 Poro quinin xcyeꞌ, ma na ntin ja xcon tan tulseꞌn txꞌakx yi quil ẍchicꞌuꞌl. 4 Na qui na xcyeꞌ yi ẍchꞌel jun tor nka yi ẍchꞌel jun chiw tan stzajseꞌn yi kil.5 Chaꞌstzun te yi tulakeꞌn Cristo tzoneꞌj wuxtxꞌotxꞌ, tal yi xtxolbileꞌj tetz Ryos:
“Nkꞌeraꞌtz tajbiluꞌ yi eꞌchk txꞌixwatz tu eꞌchk oy yi na oyij teruꞌ.
Chaꞌstzun te ja xtxumuꞌ inwankil tan xconeꞌn tetz jun chitxꞌixwatz wunak.
6 Na qui na tzatzinuꞌ te eꞌchk oy yi na patij.
Nin qui na tzatzinuꞌ te eꞌchk txꞌixwatz
yi na chiquimsij tan stzajseꞌn kloꞌ yi quil wunak.
7 Chaꞌstzun te walol teruꞌ:
‘List atineꞌt Taꞌ tan banleꞌn yi teruꞌ tajbiluꞌ chi tzꞌibaꞌnt cyen le tuꞌjuꞌ.’ ”a
8 Bajx cunin talol Cristo yi quinin tzatzin Ryos te eꞌchk oy yi na cyakꞌ wunak. Ej nin qui na tzatzin Ryos te eꞌchk txꞌixwatz, mpe ik yi eꞌchk txꞌixwatz yi na chipat tan stzajseꞌn quil, wech na yaꞌstzun na tal yi ley yi tajweꞌn tan chibnol taneꞌn. 9 Ej nin nchaꞌtz talt Cristo: “List atineꞌt Taꞌ tan banleꞌn yi teruꞌ tajbiluꞌ.” Yi na elepont yi yolaꞌtz, iꞌtz yi ja ul iꞌ tan xiteꞌn yi bajx xtxolbil yi txumijt cyen, nin ja ul iꞌ tan bixbajeꞌn junt acꞌaj trat. 10 Ej nin tan tuꞌ yi bnol taneꞌn Jesucristo yi tajbil Ryos, yi tkꞌol tib tan quimeꞌn tetz katxꞌixwatz, ja tzun koꞌ xansaj Ryos. Ej nin nkꞌeꞌtz chokxoꞌl cuntuꞌ ban Cristo yi xtxolbileꞌj, ma na jun ntziꞌ tir quimeꞌn iꞌ.
11 Ma chipaleꞌil yi eꞌ judiy na chiban yi cyetz chimunl cyakil kꞌej, nin na cyoy eꞌchk chitxꞌixwatz tetz Ryos, wech na qui na xcyeꞌ tan stzajseꞌn quil. 12 Poro Cristo jun ntziꞌ tir ntakꞌ tib tetz katxꞌixwatz tan stzajseꞌn kil tetz ben kꞌej ben sak. Ej nin yi bnixeꞌn yi munl iꞌ taꞌn ja cꞌoleꞌ le sbal Kataj Ryos. 13 At nin iꞌ te Ryos tan ẍchꞌiweꞌn yi tiemp yil choꞌc yi eꞌ contr iꞌ tzakꞌ tkan. 14 Nkꞌeꞌtz tajweꞌn tan quimeꞌn Jesucristo alaꞌ tir, ma na jun ntziꞌ tir takꞌ tib iꞌ tetz katxꞌixwatz yi oꞌ yi xansaꞌn choꞌt. Ej nin ja takꞌ tib iꞌ tan koqueꞌn ketz tetz tzꞌaknak cuꞌn tetz ben kꞌej ben sak. 15 Nchaꞌtz yi Espíritu Sant yaꞌstzun talnak, na je yol iꞌ yi tzꞌibaꞌnt cyen:
16 “Je yi trateꞌj yi tzinbixbajeꞌ skaxoꞌl scyuchꞌ tzantzaj, jalen yil tzajpon wiꞌ yi eꞌchk kꞌejaꞌtz,” chij Kataj Ryos. “Swakꞌeꞌ cyen incaꞌwl te cyalmaꞌ, nin tzintzꞌibeꞌ cyen incaꞌwl te cyajtzaꞌkl.”
17 Ej nin nchaꞌtz tal:
“Quiꞌt tzꞌul txꞌakx yi quil tincꞌuꞌl.
Nin quiꞌt tzintxum yi eꞌchk takleꞌn cachiꞌ yi nchiban.”b
18 Chaꞌstzun te yi ko ja wiꞌt cuylij kapaj, nkꞌeꞌtz tajweꞌn tan biyleꞌn mas katxꞌixwatz.
Baꞌn kaẍkanseꞌ quen kib te Ryos jaluꞌ
19 Chaꞌstzun te eꞌuꞌ kajwutz, tan tuꞌ yi ẍchꞌel Jesucristo ja wiꞌt jakxij yi kabeꞌ tan kocomponeꞌn swutz Ryos. Qui bin kacabej kacꞌuꞌl tan kocomponeꞌn le Amaꞌl Yi Wiꞌnin Xanil. 20 Kaxomok te yi acꞌaj beꞌ yi ja jakxij taꞌn, yi beꞌ kale na jaleꞌt itzꞌajbil. Kaxomok teꞌj, na baꞌn kocopon tul yi amaꞌlaꞌtz na ja jakxij yi xbuꞌk yi nxcon sajleꞌn tan makleꞌn yi beꞌ. Na tan tuꞌ yi ntij yi wankil Jesús qꞌuixcꞌuj, ja jakxij yi jun beꞌaꞌtz. 21 Nin Jesús yaꞌstzun yi wiꞌtz ketz kapaleꞌil, yi oꞌ yi atoꞌ tajal Ryos. 22 Chaꞌstzun te kaẍkanseꞌ quen kib te Ryos tetz cuꞌn kalmaꞌ nin quiꞌt kacabej kacꞌuꞌl teꞌj, nin skoj cuꞌn te kalmaꞌ nin na kanachon teꞌj yi quiꞌct kil. Nin nchaꞌtz kawankil ja txꞌajxij taneꞌn tan jun aꞌ yi chin skoj nin. 23 Quiwit bin, benk kukan ttxꞌotxꞌ te yi na kocsaj. Quil kacabej kacꞌuꞌl, na tzꞌelepon kꞌab Ryos te yi alijt taꞌn. 24 Ej nin chin tajweꞌn cunin yil kajoy puntil tan kaquiwsal kib skibil kib. Nin tajweꞌn kalokꞌ kib skibil kib. Tajweꞌn kaban jun baꞌn skibil kib. 25 Nchaꞌtz oꞌ xomiꞌch te yi cyajtzaꞌkl yi eꞌ yi qui na cyojkel yi cultiꞌn. Ma na kaquiwsaj kib skibil kib, lmal jaluꞌ na txant tan tuleꞌn Kajcaw Jesucristo.
26 Kaquiwsaj kib, na ko kajbilt nin kaben tan juchleꞌn mas kil yi nsken el katxum te yi bintzi, quiꞌc junt katxꞌixwatz at tan ẍchojleꞌn kil. 27 Ntin txꞌaklij kacaws, nin txꞌaklij yi jun chin kꞌakꞌ skawutz, yi kꞌakꞌaꞌtz yi banijt tan chixiteꞌn cyakil yi eꞌ contr Ryos. 28 Na yi na oc jun tan pajleꞌn yi caꞌwl Moisés, nin ko at cob nka ox stiw yi na cyal yi bintzi nin ja juch yaj til, na akꞌlij caws yi junaꞌtz tan teleꞌn cuꞌn swutz, nin cyaꞌl jun na el kꞌajab teꞌj. 29 Pyor tcunin chicaws yi eꞌ yi quiꞌc kꞌej yi Cyꞌajl Ryos ẍchiwutz, yi eꞌ yi quiꞌc xac yi ẍchꞌel Cristo ẍchiwutz, yi eꞌ yi na choꞌc tan jisleꞌn yi Espíritu yi na akꞌon yi banl Kataj skibaj. Wech na iꞌtz yi ẍchꞌel Cristo yi nxcyeꞌ tan bixbajeꞌn yi acꞌaj trat yi na kocsaj. Ej nin iꞌtz yi ẍchꞌel Cristo yi nxcon tan katxaꞌleꞌn, tan kaxconeꞌn tetz Ryos. 30 Nchaꞌtz elnak katxum tetz yi yol yi alijt cyen tan Kajcaw yi na tal: “Atin cuꞌn tan chicawseꞌn yi eꞌ mal wunak. Wicyꞌseꞌ incꞌuꞌl scyeꞌj.” Nchaꞌtz at junt xtxolbil yi cyaj tlol: “Wutzileꞌn cuꞌn Kajcaw tzꞌocopon tan takꞌleꞌn chicaws yi eꞌ tetz nitxajil.” 31 Chin xoꞌwbil nin scyetz yi eꞌ yi ẍcheꞌ cawseꞌ Ryos, yi Ryos yi itzꞌ nin tetz.
32 Ma yi eꞌ cyeruꞌ, ulk txꞌakx ẍchicꞌuꞌluꞌ yi mbi mbajij scyeꞌjuꞌ sajleꞌn, yi teleꞌn cuꞌn pacx te chiwutzuꞌ. Ja icyꞌ pon wiꞌnin eꞌchk qꞌuixcꞌuj cyanuꞌ. 33 Nin at jujun ẍchixoꞌluꞌ yi ja chijislij nin ja chibuchlij ẍchiwutz cuꞌn cyakil wunak. Ej nin at eꞌuꞌ yi quinin nchixobuꞌ tan quichꞌeyeꞌn yi eꞌ kajwutzaꞌtz yi yaꞌstzun nchuꞌlij. 34 Ej nin nchaꞌtz at eꞌuꞌ yi el chikꞌajabuꞌ scyeꞌj yi eꞌ yi ocnakeꞌ xetzeꞌ. Ej nin at eꞌuꞌ yi quinin nchibisunuꞌ yi mmeꞌl ticyꞌleꞌn cyakil yi chimebiꞌluꞌ. Na elnak chitxumuꞌ tetz yi ẍchicambokuꞌ te jun chimebiꞌluꞌ yi mas baꞌn tcuꞌn swutz yi mebiꞌl tetz tzoneꞌj wuxtxꞌotxꞌ. Nin elnak chitxumuꞌ tetz yi jun chimebiꞌluꞌaꞌtz, yi at tziꞌn tcyaꞌj, iꞌtz tetz ben kꞌej ben sak. 35 Qui bin chicabejuꞌ chicꞌuꞌluꞌ te yi na chiwutz cyenuꞌ teꞌj, na at jamel quikanuꞌ. 36 Poro tajweꞌn yi nimit cuntunin chicꞌuꞌluꞌ tan banleꞌn taneꞌn yi tajbil Ryos, bantz chicambaluꞌ yi jun chin oy yi sukiꞌnt tan Ryos sketz. 37 Na tzꞌibaꞌnt cyen le tuꞌj Kataj:
“Txant cuntuꞌ tan tuleꞌn yi jun yi at tulbil.
Quiꞌt ampon tiemp tan tuleꞌn.
38 Poro ntin yi eꞌ balaj,
yi eꞌ yi choꞌn kꞌuklij chicꞌuꞌl sweꞌj,
yaꞌstzun yi eꞌ yi ẍchicambok te jun itzꞌajbilaꞌtz.
Poro ko at eꞌ yil chipakxij,
quil chintzatzin scyeꞌj.”
39 Poro yi oꞌ ketz nkꞌeꞌtz niꞌcuꞌn oꞌ scyuchꞌ yi eꞌaꞌtz yi na chipakxij, na yi oꞌ ketz, kꞌuklij kacꞌuꞌl, nin skaclaxok. Poro yi eꞌ cyetz, tzꞌaklok cyetz chicawsaꞌtz.