Jun cꞌoloj wunak yi kꞌukeꞌ chicꞌuꞌl te Ryos
11
1 I bin jaluꞌ ko kꞌuklij cꞌuꞌl jun kajwutz te Ryos na elepont yi jun cuꞌn na tocsaj iꞌ yi scambok te yi na wutz cyen teꞌj. Qui na lajluchax swutz iꞌ, poro jun cuꞌn na tocsaj yi scambok te yi na wutz cyen teꞌj. 2 Na yi eꞌ kamam kateꞌ ja jal chikꞌej swutz Ryos tan tuꞌ yi kꞌukeweꞌn chicꞌuꞌl teꞌj. 3 Nin tan tuꞌ yi kꞌuklij ketz kacꞌuꞌl na el katxum tetz yi Ryos bnol tetz cyakil yi bnixnak taꞌn sajleꞌn tunintz. Nin tan tuꞌ yol iꞌ bnixeꞌt. Na quiꞌc jun eꞌchk takleꞌn at, yi toqueꞌn Ryos tan banleꞌn yi eꞌchk takleꞌn yi na kil jaluꞌ.4 Ej nin tan tuꞌ kꞌukeweꞌn cꞌuꞌl kꞌajtzun Abel te Ryos, ja takꞌ iꞌ jun txꞌixwatz yi mas balaj tcuꞌn swutz yi oy yi takꞌ Caín. Ej nin tan tuꞌ kꞌukeweꞌn cꞌuꞌl, ja jal balajil iꞌ swutz Ryos, nin ja tzatzin Ryos te yi oy yi takꞌ iꞌ. Quimnak Abel, poro tan tuꞌ kꞌukeweꞌn cꞌuꞌl, iẍnin na tzaneꞌt naꞌwseꞌn yi mbi banak iꞌ.
5 Nchaꞌtz kꞌajtzun Enoc kꞌukeꞌ cꞌuꞌl te Ryos, chaꞌstzun te itzꞌenleꞌn tajeꞌn ticyꞌleꞌn iꞌ tan Ryos. Cyaꞌl nin jaleꞌt iꞌ cyakꞌun wunak, na nsken aj tcyꞌal Ryos. 6 Ej nin te yi ntaxk aj tcyꞌal ja tzatzin Ryos teꞌj. Poro quiꞌc rmeril tan tzatzineꞌn Ryos skeꞌj ko qui kꞌuklij kacꞌuꞌl teꞌj, na yi ko na kaẍkans quen kib te iꞌ tajweꞌn cuꞌn yil kocsaj cunin yi at iꞌ, ej nin yi list iꞌ tan takꞌleꞌn eꞌchk takleꞌn balaj sketz cyakil yi oꞌ yi na koꞌc tan joyleꞌn iꞌ.
7 Nchaꞌtz kꞌajtzun Noé, kꞌukeꞌ cꞌuꞌl te Ryos. Na yi talol Ryos yi at tulbil eꞌchk takleꞌn yi qui otojt na quil wunak, nin tocsaj iꞌ. Na nin oc tan banleꞌn yi arca bantz chiclaxeꞌn yi najal. Tan tuꞌ yi kꞌukeweꞌn cꞌuꞌl iꞌ te Ryos ja lajluchax yi chipaltil yi eꞌ mas wunak yi quinin cyocsaj yol Ryos. Nin tan tuꞌ yi kꞌukeweꞌn cꞌuꞌl ja jal yi tetz balajil swutz Ryos.
8 Nchaꞌtz kꞌajtzun Abraham, kꞌukeꞌ cꞌuꞌl te Ryos. Na yi tlol Ryos tetz tan ticyꞌeꞌn iꞌ tul junt amaꞌl yi stetzajeꞌ tzantzaj, quinin paj yi caꞌwl Ryos, nin el tzaj iꞌ le tetz tanum, poro quiꞌc at le wiꞌ iꞌ yi amaꞌl kale atit tpombil. 9-10 Tan tuꞌ yi kꞌukeꞌ cꞌuꞌl Abraham te Ryos, chaꞌstzun te taꞌteꞌn iꞌ tul yi jun amaꞌlaꞌtz yi suk Ryos tetz. Poro quinin cambaj iꞌ yi jun luwaraꞌtz, ma na cyaj cyen iꞌ-tz chi jun aj posarin tuꞌ. Nin tal mantial tuꞌ xcon taꞌn tetz caꞌl iꞌ. Yaꞌstzun ban iꞌ tan tuꞌ at ẍchꞌiw tan toponeꞌn tul yi jun tnum yi Ryos txumul tetz, nin Ryos nucꞌul tetz.
Ej nin iteꞌn nin eꞌ ban Isaac tu Jacow. Ja chicyaj cyen tul iteꞌn nin amaꞌlaꞌtz tan tuꞌ yi kꞌukeweꞌn chicꞌuꞌl te yi yol Ryos yi alijt taꞌn scyetz.
11 Nchaꞌtz kꞌajtzun Sara kꞌukeꞌ cꞌuꞌl te Ryos na nsken biꞌẍin nin quiꞌc talbil iꞌ, poro tocsaj iꞌ yi yol Ryos yi ntal yi sjalok jun tal. Nin ja el cuꞌn kꞌab Ryos teꞌj na yaꞌstzun mbantz, nin itzꞌij niꞌ. Wech na nsken balkꞌij yi tiemp tan jaleꞌn jun tal. Yaꞌstzun bajijtz, na oc tetz tajal Sara yi tzꞌelepon kꞌab Ryos te yi yol iꞌ yi alijt taꞌn tetz. 12 Tan yi xtxolbilaꞌseꞌj na lajluchax skawutz yi ja jal jun chin cꞌoloj xonl jun yaj, yi nsken biꞌẍin, yi quiꞌct nin kloꞌ puntil tan jaleꞌn nitxajil iꞌ. Poro ja jal jun chin cꞌoloj xonl iꞌ chi taneꞌn yi txꞌuml tcyaꞌj tu yi samlicyꞌ yi at tzi mar, yi qui ajlbeꞌn tetz.
13 Poro quim Abraham scyuchꞌ yi eꞌ cyꞌajl yi ntaxk tetzaj yi sukiꞌnt tan Ryos scyetz. Poro te yi ntaxk chiquim nternin ajlij chicꞌuꞌl te yi na chiwutz cyen teꞌj. Nin wiꞌnin chitzatzineꞌn yi nchoꞌc tan xtxumleꞌn yi mbi tzꞌakꞌlok scyetz. Nin clar cunin cyal: Oꞌ tuꞌ aj posarinl tzoneꞌj wuxtxꞌotxꞌ, cheꞌch. 14 Tan yi jun yolaꞌtz yi el le chitziꞌ, na elepont yi choꞌn ajlij chicꞌuꞌl te junt amaꞌl tan chinajeweꞌn tul. 15 Yi choꞌnk ajlij chicꞌuꞌl te yi eꞌchk amaꞌl kale eꞌ icyꞌakt, ja kloꞌ jal puntil cyaꞌn tan chipakxeꞌn junt tir, poro quiꞌ. 16 Na yi cyetz choꞌn ajlij chicꞌuꞌl te junt najbil mas balaj swutz tzoneꞌj wuxtxꞌotxꞌ. Iꞌtz yi amaꞌl yi at jalen tziꞌn tcyaꞌj. Ej nin quinin txꞌixwij Ryos yi ncyal yi iꞌ chiRyosil na ja bnix jun amaꞌl taꞌn tetz cyetz.
17 Ej nin nchaꞌtz ja lajluchax yi kꞌuklij cꞌuꞌl Abraham te Ryos. Na yi toqueꞌn Ryos tan pileꞌn iꞌ quinin cabej cꞌuꞌl yi cweꞌn kloꞌ biyol yi jun tal ẍutuj cyꞌajl tetz xtxꞌixwatz. Wech alijt tan Ryos tetz yi tan Isaac jaleꞌt jun cꞌoloj xonl iꞌ. 18 Na je yol Ryos yi tal tetz: “Tan Isaac jaleꞌt jun cꞌoloj axonl.”a 19 Poro tan tuꞌ yi list Abraham tan biyleꞌn cuꞌn kloꞌ Isaac, na tzun elepont yi nternin kꞌuklij cꞌuꞌl iꞌ, na mpe nink quim Isaac, xcyek Ryos tan titzꞌeꞌn junt tir chixoꞌl almaꞌ. Ej nin yaꞌstzun bajijtz taneꞌn, na yi claxeꞌn Isaac, niꞌcuꞌntz chi choꞌnk mitzꞌij junt tir ẍchixoꞌl almaꞌ.
20 Nchaꞌtz kꞌajtzun Isaac kꞌukeꞌ cꞌuꞌl te Ryos, na talnak tetz Jacow tu Esaú yi at tulbil chibanl.
21 Ej nin nchaꞌtz kꞌajtzun Jacow kꞌukeꞌ cunin cꞌuꞌl teꞌj yi at tulbil yi banl Kataj squibaj yi eꞌ cyꞌajl Ẍep, na yi txant tan quimeꞌn nin tal scyetz yi at tulbil cyetz chibanl.
22 Nchaꞌtz kaꞌjtzun Ẍep, kꞌukeꞌ cꞌuꞌl te Ryos, na yi txant tan quimeꞌn iꞌ, cyaj tlol scyetz yi eꞌ tanum, yi eꞌ xonl Israel, yi at cyelbil tzaj le tnum Egipto. Nin cyaj cawul scyetz yi tajweꞌn tan beneꞌn quicyꞌal yi bakil iꞌ yil cheꞌl tzaj.
23 Nchaꞌtz yi eꞌ taj xtxuꞌ Moisés kꞌukeꞌ chicꞌuꞌl te Ryos yi xcyek iꞌ tan colcheꞌn yi niꞌ. Na yi titzꞌeꞌn Moisés quinin cuꞌ chibiyol ma na ja cyew tetz ox xaw, tan paj yi quilol yi chin yubeꞌn nin yi tal niꞌ. Ej nin tan tuꞌ yi kꞌukeweꞌn chicꞌuꞌl te Ryos quinin eꞌ xob tetz yi rey yi cawun tan chibiyleꞌn cyakil yi eꞌ tal niꞌ xicy yi eꞌ itzꞌij te tiempaꞌtz.
24 Nchaꞌtz Moisés yi yajineꞌn, ja kꞌukeꞌ cꞌuꞌl te Ryos, na mas baꞌn tcuꞌn ban swutz iꞌ yi toqueꞌn tetz nitxajil Ryos swutz yi nink aꞌlchij yi iꞌ yi tal yi meꞌl rey tetz yi tnum Egipto. 25 Na yi xtxumuꞌn iꞌ, iꞌtz yi mas baꞌn tcuꞌn yil stij iꞌ qꞌuixcꞌuj scyuchꞌ yi eꞌ yi ateꞌ tetz tajal Ryos, swutz yi nink tzatzin iꞌ tetz cobox ntziꞌ kꞌej tan banleꞌn yi tetz tajbil. 26 Na nin oc iꞌ tan xtxumleꞌn yi mas baꞌn tcuꞌn kol smucꞌ iꞌ qꞌuixcꞌuj chi ban Cristo, swutz yi nink tetzaj cyakil yi mebiꞌl yi at le tnum Egipto. Na choꞌn nin ajlij cꞌuꞌl te yi sukiꞌnt tan Ryos.
27 Ej nin tan tuꞌ yi kꞌukeꞌ cꞌuꞌl te Ryos, cyaj cyen tilol yi tnum Egipto. Chin xoꞌwbil nin yi rey poro quinin xob Moisés tetz, na jal walor iꞌ tan tuꞌ yi tocsaj cunin yi xomij Ryos teꞌj. Niꞌcuꞌntz chi tilk iꞌ wutz Ryos taneꞌn. 28 Nin tan tuꞌ yi kꞌukeweꞌn cꞌuꞌl Moisés te yol Ryos, oc iꞌ tan banleꞌn taneꞌn yi jun kꞌej Pasc yi tal Ryos tetz. Nin cawun scyetz yi eꞌ tanum tan toqueꞌn chitzꞌitul yi chichꞌ teꞌjak marquil yi puertil chicaꞌl, bantz qui chiquimeꞌn yi eꞌ bajx cyꞌajol yil tzꞌicyꞌ cuꞌn yi ángel tan chibiyleꞌn cuꞌn kloꞌ.
29 Nchaꞌtz tan tuꞌ yi kꞌukeweꞌn chicꞌuꞌl yi eꞌ xonl Israel, jeꞌ tancꞌul tib yi Cyak Mar tan quicyꞌeꞌn poneꞌn jalaj icyꞌen. Chin skej nin ban yi muꞌẍ beꞌaꞌtz kale eꞌ icyꞌeꞌt. Poro yi ticyꞌeꞌn chibnol quib yi eꞌ aj Egipto quinin eꞌ icyꞌpon, na nin eꞌ quim xe mar.
30 Nchaꞌtz tan tuꞌ yi nternin kꞌukeꞌ chicꞌuꞌl yi eꞌ kamam kateꞌ, cuꞌ woꞌc yi tapij yi at solteꞌj yi tnum Jericó. Cuꞌ woꞌc tan tuꞌ yi chixoneꞌn juk tir solteꞌj yi tnum tcꞌuꞌl juk kꞌej. 31 Nchaꞌtz Rahab, yi wiꞌtz bnol tetz, kꞌukeꞌ cꞌuꞌl te Ryos nin takꞌ chiposar yi eꞌ xkꞌukwil. Chaꞌstzun te quinin quim iꞌ tetz yi chiquimeꞌn yi eꞌ mas pajol caꞌwl.
32 Poro nkꞌeꞌtz tajweꞌn yil wal mas xtxolbil scyeruꞌ. Na quiꞌc amaꞌl tan walol cyakil yi mbi banak Gedeón, mbi banak Barac, mbi banak Sansón, mbi banak Jepté, mbi banak Luwiy, mbi banak Samuel, tu yi mbi banakeꞌ len yi eꞌ elsanl stziꞌ Ryos tentz. 33 Cyakil yi eꞌaꞌtz kꞌukeꞌ len chicꞌuꞌl te Ryos. Tan tuꞌ yi nternin kꞌukeꞌ chicꞌuꞌl te Ryos at eꞌ yi eꞌ xcyeꞌ tan cyocseꞌn junt jilwutz wunak jakꞌ chicaꞌwl. Nin at eꞌ yi chumbalaj nin eꞌ ban tan cawuꞌn. Nin at eꞌ, yi tan tuꞌ yi kꞌukeꞌ chicꞌuꞌl te Ryos, ja chicambaj yi sukiꞌnt tan Ryos scyetz. Nin nchaꞌtz at eꞌ yi eꞌ xcyeꞌ tan makleꞌn chiwutz yi eꞌ balum tan qui cyoqueꞌn tan chibajseꞌn. 34 Nin at eꞌ yi eꞌ xcyeꞌ tan stzajseꞌn kꞌakꞌ. Nin at eꞌ yi eꞌ el liwr tkꞌab spar. Nin at eꞌ cotxcoj yi quiwix chicꞌuꞌl tan oyintziꞌ, na eꞌ xcyeꞌ tan chibiyleꞌn cuꞌn yi chicontr. 35 Ej nin at eꞌ xnaꞌn yi quimnakeꞌ chixonl poro ja chitzꞌij junt tir. Nchaꞌtz at eꞌ yi eꞌ qꞌuixpij tan tuꞌ yi kꞌuklij chicꞌuꞌl te Ryos. Quinin chicꞌul tan cyeleꞌn liwr na mas baꞌn tcuꞌn le wutz cyetz cyajtzaꞌkl yi itzꞌeꞌn junt tir tan chicambal jun itzꞌajbil yi quinin bajsbeꞌn tetz swutz yi cyeleꞌn kloꞌ liwr tetz cobox ntziꞌ kꞌej. 36 Ej nin at eꞌ yi ja chimucꞌ xcyꞌaklil; at eꞌ yi eꞌ jislij; at eꞌ yi eꞌ cuꞌ tcaren; at eꞌ yi eꞌ oc xetzeꞌ; 37 at eꞌ yi eꞌ cꞌoxlij tan cꞌub; at eꞌ yi cob cun tuꞌ eꞌ el tan seruch; at eꞌ yi eꞌ biylij tan spar; at eꞌ yi ja cheꞌl ojkuj tan paj yi cyaꞌl na ajweꞌt chiwutz. Stzꞌuml cneꞌr, nka stzꞌuml chiw tlen tuꞌ xcon tetz beꞌch cyetz. Chin mebaꞌ nin eꞌ, chin buchij cheꞌ nin, wiꞌnin eꞌ yi eꞌ oc wunak tan chixuxeꞌn. 38 Lastum yi ateꞌ yi eꞌ balaj nak yi na cyocsaj Ryos ẍchixoꞌl yi eꞌ mal nak yi quiꞌc muꞌẍ chixac. Nchaꞌtz yi eꞌ balaj wunakaꞌtz ja chixon tulak eꞌchk amaꞌl yi tzꞌinunin tuꞌ, nin xoꞌlak wutz tan cyewal quib. Ja xcon eꞌchk jul tu eꞌchk picy cyaꞌn tetz chicaꞌl. 39 Poro ja lajluchax yi chumbalaj nin yi eꞌ tan tuꞌ yi kꞌukeweꞌn chicꞌuꞌl te Ryos. Quinin chicambaj yi sukiꞌnt tan Ryos scyetz. 40 Na txumijt junt xtxolbil tan Ryos yi mas balaj tcuꞌn. Ej nin iꞌtz, yi oꞌ jun ketz sbneꞌ te yi sukiꞌnt tan Ryos. Na quinin choꞌc cyetz tetz tzꞌaknak cuꞌn, ma na jalen cuꞌn yil kamol cuꞌn kib scyuchꞌ.