Jalt Jesús koꞌc tan xtxumleꞌn
12
1 Ja bin kil yi at jun cꞌoloj wunak yi nternin kꞌukeꞌ chicꞌuꞌl te Ryos. Chaꞌstzun te chin tajweꞌn cunin yil kil cyen cyakil yi eꞌchk kajtzaꞌkl cachiꞌ yi cyꞌaꞌn kaꞌn, yi niꞌcuꞌn tu jun ektz yi chin al nin, yi na xcyeꞌ tan kabatzleꞌn. Tajweꞌn tan cyajeꞌn cyen kilol yi kajtzaꞌkl yi na xcyeꞌ tan kasucpeꞌn cuꞌn. Ma na quin skawutz tan kaxcyeweꞌn tan xajpeꞌn cyen yi beꞌ yi at skawutz. 2 Ntin katxumeꞌ Jesús, na iꞌ yi ketz kaꞌajxetzeꞌl te yi na kocsaj, nin iteꞌn nin iꞌ yi jun yi na tzan tan kanucꞌleꞌn tan koqueꞌn tetz tzꞌaknak cuꞌn. Quinin tajlaj iꞌ yi jun quimichil yi chin txꞌixwil nin, ma na ja el xtxum tetz yi ko tzꞌicyꞌpon qꞌuixcꞌuj taꞌn sjalok jun chin tzatziꞌn tetz talmaꞌ. Nin ja xcyeꞌ teꞌj na yi jaluꞌ choꞌn cꞌolchij iꞌ jalen tziꞌn tcyaꞌj xlaj Kataj.3 Chaꞌstzun te eꞌuꞌ kajwutz chimuqꞌueꞌuꞌ qꞌuixcꞌuj chi banak Jesús, na yi iꞌ tetz mucꞌnak wiꞌnin qꞌuixcꞌuj chikꞌab yi eꞌ juchul il. Qui chicabejuꞌ chicꞌuꞌluꞌ te yi na kocsaj, nin quil chicotxcaxuꞌ tan chixomeꞌnuꞌ te tajtzaꞌkl Cristo. 4 Na txeꞌn cunin quim jun ẍchixoꞌluꞌ tan tuꞌ yi na chipil quibuꞌ tu yi ajtzaꞌkl cachiꞌ. 5 ¿Ja ptzun el te chicꞌuꞌluꞌ yi ẍeꞌn na ban Ryos tan takꞌleꞌn kajtzaꞌkl, yi oꞌ yi oꞌ nitxajil iꞌ? Na je bin yol iꞌ yi tzꞌibaꞌnt cyen:
“Axwok inmeꞌl incyꞌajl, in Itajcawil.
Tajweꞌn bin tan imucꞌul yi tzꞌuꞌm yi na oc waꞌn tziteꞌj.
Qui tzun tzicabej icꞌuꞌl, yil noꞌc tan makleꞌn iwutz.
6 Na yi in wetz, na noꞌc tan chinucꞌleꞌn yi eꞌ yi na chimpekꞌ scyeꞌj.
Na ilenin na oc chitzꞌuꞌm yi eꞌ inmeꞌl incyꞌajl waꞌn.”
7 Chaꞌstzun te yil tzꞌul chitzꞌuꞌmuꞌ tan Ryos quil baj chicꞌuꞌluꞌ swutz, na tan tuꞌ yi at chitzꞌuꞌmuꞌ taꞌn na elepont yi eꞌuꞌ nitxajil iꞌ. 8 Na ko qui na tzan Ryos tan takꞌleꞌn chitzꞌuꞌmuꞌ chi na takꞌ scyeꞌj cyakil yi eꞌ tetz nitxajil, na tzun elepont yi nkꞌeꞌtz eꞌuꞌ nitxajil iꞌ, ma na eꞌuꞌ tuꞌ chacꞌ taneꞌn. 9 Ej nin je junt xtxolbileꞌj: Yi oꞌ tzaj tal juy ja cawun yi kataj skeꞌj, nin ja kek ẍchiꞌ iꞌ. Pyor tzun Kataj Ryos yi at jalen tziꞌn tcyaꞌj tajweꞌn tan kekal ẍchiꞌ iꞌ bantz kacambal yi jun itzꞌajbil tetz ben kꞌej ben sak. 10 Yi eꞌ kataj tetz tzoneꞌj wuxtxꞌotxꞌ na chicawun skeꞌj tetz cobox ntziꞌ tiemp. Ej nin yi na chicawun skeꞌj ntin na chixom te yi na el chitxum tetz. Poro yi Kataj Ryos yi at jalen tziꞌn tcyaꞌj na takꞌ iꞌ katzꞌuꞌm tan takꞌoneꞌn baꞌn sketz, nin tan jaleꞌn kabalajil chi taneꞌn yi tetz balajil. 11 Bintzi nin cyaꞌl jun na tzatzin yi na oc tzꞌuꞌm teꞌj, na chꞌon. Poro yi na el tiemp na el katxum tetz yi na akꞌon baꞌn sketz. Na tan tuꞌ yi tzꞌuꞌm yi na oc skeꞌj na koꞌc tetz balaj, nin na jal tzatzin paz kaꞌn.
12 Chaꞌstzun te eꞌuꞌ wajwutz quiwit bin, chijoyeꞌuꞌ puntil tan jaleꞌn chiwaloruꞌ bantz chiquiwixeꞌnuꞌ. 13 Chijoyeꞌuꞌ yi ajtzaꞌkl yi jicyuch teꞌj. Ej nin ko yaꞌtz chibanuꞌ ẍchiquiwixk tzun yi eꞌ cotxcoj, nin quil chipoꞌtij.
Wiꞌnin xtxintxal ko quil jal kabalajil
14 Chijoyeꞌuꞌ bin puntil tan jaleꞌn yi tzatzin pazaꞌtz. Nin chijoyeꞌuꞌ puntil tan quichꞌeyal quibuꞌ tan cyoqueꞌnuꞌ tetz balaj, nin tan chixansal quibuꞌ. Na ko quil koꞌc tetz balaj quiꞌc kopombil tu Ryos. 15 Or bin quiluꞌ, ko tzun quil chitzꞌamuꞌ yi oy yi na tzan Kataj tan toyeꞌn sketz tan tuꞌ banl talmaꞌ iꞌ. Nin or quiluꞌ, cyaꞌlk jun ẍchixoꞌluꞌ choꞌnk sban chi taneꞌn jun jilwutz xtzeꞌ yi chin xkolum nin, nin yi chin wenen nin. Na yi ko yaꞌtz taneꞌn jun, xcyek tan chipoꞌtzeꞌn, nin tan chixiteꞌn yi eꞌ mas. 16 Na or quiluꞌ, cyaꞌlk jun ẍchixoꞌluꞌ ben tan jopol wutzajiꞌn. Nin cyaꞌlk jun tzꞌelsan kꞌej yi sukiꞌnt tan Ryos tetz, chi banak Esaú yi beneꞌn cꞌayil yi tetz kꞌej tetz bajx cyꞌajol. Na tan tuꞌ muꞌẍ tal cumir beneꞌn cꞌayil iꞌ yi tetz kꞌej. 17 Ej nin elnak chitxumuꞌ tetz yi toqueꞌn iꞌ tan jakleꞌn yi kꞌej tetz yi taj quiꞌt akꞌlij tetz. Wiꞌnin cweꞌn wutz, nin wiꞌnin tokꞌeꞌn iꞌ, poro quinin jal puntil takꞌun tan xiteꞌn yi tajtzaꞌkl yi nsken cyen cyaj nucꞌul.a
18 Qui bin kaxajslen kib te yi na kocsaj na nkꞌeꞌtz niꞌcuꞌn kutaneꞌn ketz chi banakeꞌ yi eꞌ xonl Israel tentz. Na yi eꞌ cyetz oc chiẍkansal quib te jun wutz tuꞌ yi baꞌn na maclij, yi na tzan kꞌaꞌkl, nin yi chin tzꞌoꞌtz nin teꞌj, nin yi wiꞌnin xumcaneꞌn cyekꞌekꞌ tu xlitzꞌ solteꞌj. 19 Ej nin quibit jun chin chun yi na ẍchꞌin tu yi wiꞌ Ryos yi jilon tzaj scyetz. Ej nin yi eꞌ yi quibit yi wiꞌ Ryosaꞌtz cuꞌ chitziꞌ tan quiꞌt quibital mas, 20 tan tuꞌ yi xoꞌw yi ateꞌ cuꞌnt. Na chin xoꞌwbil nin yi caꞌwl iꞌ yi ben quibital: “Mpe itawun tlen tuꞌk jetzaj te yi wutzeꞌj, tajweꞌn tan teleꞌn cuꞌn swutz tan cꞌub nka tan lans,” chij Ryos bantz scyetz. 21 Chin xoꞌw nin ateꞌ cuꞌnt yi nquil nin yi mbi na bajij. Nchaꞌtz Moisés, xob iꞌ, na je yol iꞌeꞌj: “Na chinlucneꞌ tan xoꞌw,” chij Moisés ban.b
22 Poro yi acꞌaj trat yi mbnix tan Ryos nkꞌeꞌtz xoꞌwbil. Na nternin ja kocopon te yi luwar kale najleꞌt iꞌ yi na biꞌaj wutz Sión. Nin ja wiꞌt kocopon le tnum kale najleꞌt yi Ryos yi itzꞌ, nin yi tnum yi na biꞌaj yi acꞌaj Jerusalén yi choꞌn at tcyaꞌj nin kale ateꞌt jat loꞌ mil ángel tan cꞌuꞌlajeꞌn Ryos. 23 Ja wiꞌt kocopon chixoꞌl yi cmon tetz Ryos yi eꞌ bajx nitxajil iꞌ yi cuꞌnak chibiꞌ jalen tziꞌn tcyaꞌj. Ej nin ja wiꞌt kocopon swutz yi Ryos yi pujul xtisyaꞌ scyetz cyakil wunak. Nin ja wiꞌt kocopon ẍchixoꞌl yi eꞌ balaj almaꞌ yi ajnakeꞌ te Kataj, yi eꞌ yi ja wiꞌt choꞌc tetz tzꞌaknak cuꞌn. 24 Nin ja wiꞌt kocopon xlaj Jesús, yi kayolol te yi acꞌaj trat yi ja bixeꞌ skaxoꞌl tu Ryos. Iꞌtz yi tetz ẍchꞌel yi el kojxuj tetz senil yi acꞌaj trataꞌtz. Ej nin mas baꞌn tcuꞌn yi xtxolbil yi na cuꞌ wutz yi ẍchꞌel Cristo tan jakleꞌn, swutz yi cuꞌnak wutz yi ẍchꞌel Abel tan jakleꞌn.c
25 Chaꞌstzun te eꞌuꞌ wajwutz, or bin quiluꞌ. Eliꞌch len kꞌej Kataj Ryos cyanuꞌ yi na cuꞌ wutz tan kamoxeꞌn. Na yi eꞌ wunak yi eꞌ oc tan telseꞌn kꞌej Ryos yi jiloneꞌn iꞌ tzoneꞌj wuxtxꞌotxꞌ quinin eꞌ el swutz chicaws. Pyor tzun oꞌ ketz, ẍeꞌn keꞌl liwr swutz yi kacaws ko ntin katzejbaj nin wutz kacoc tetz Kataj Ryos yi choꞌn na jilon tzaj sketz tcyaꞌj.d 26 Na yi jiloneꞌn Ryos tentz ja yucan cyakil yi wuxtxꞌotxꞌ. Poro yi jaluꞌ na tal: “Yucank junt tir yi wuxtxꞌotxꞌ waꞌn nin nkꞌeꞌtz ntin wuxtxꞌotxꞌ ma na nchaꞌtz yi tcyaꞌj,” chij Ryos banak. 27 Ma jaluꞌ tan yi jun xtxolbilaꞌtz na elepont yi copon xitul Ryos cyakil yi eꞌchk takleꞌn yi bnixnak taꞌn, bantz jalt yi acꞌaj cyaj cyen, yi quiꞌt xit sbneꞌ opon tunintz. 28 Nin yi oꞌ ketz sketzajeꞌ yi jun amaꞌlaꞌtz yi quil xit. Ko yaꞌtz, katyoẍink bin tetz Kataj Ryos. Nin kakꞌeꞌ kib tan cꞌuꞌlajeꞌn iꞌ tetz cuꞌn kalmaꞌ nin kekeꞌ ẍchiꞌ iꞌ. 29 Na yi ketz kaRyosil niꞌcuꞌn iꞌ tu kꞌakꞌ yi baꞌn stzꞌeꞌsaj cyakil.