2
1 Chaꞌstzun te tan tuꞌ yi at kachꞌiw te yi jun balaj itzꞌajbilaꞌtz chicyajscyenuꞌ cyakil ajtzaꞌkl cachiꞌ. Quiꞌt choꞌcuꞌ tan chisubleꞌn wunak. Quiꞌt chibanuꞌ eꞌchk takleꞌn yi chiwutz tuwuꞌ yi chiplaj tuwuꞌ. Chicyajscyenuꞌ yi chiꞌch cꞌuꞌlal yi na jal tan paj yi quinin na chicambajuꞌ yi cyeruꞌ cyajbiluꞌ. Quiꞌt choꞌcuꞌ tan telseꞌn kꞌej junt. 2 Ma na tajweꞌn yil choꞌcuꞌ il tan xtxumleꞌn yi yol Kataj. Choꞌkuꞌ bin chi taneꞌn jun tal niꞌ yi anaꞌ cunin mitzꞌij, yi nternin na el talmaꞌ te xtxuꞌtx. Elk bin cyalmaꞌuꞌ te yi jun balaj txuꞌtxaꞌtz yi chin tzꞌaknak cuꞌn, yi iꞌtz yi yol Kataj. Na kol choꞌcuꞌ il tan xtxumleꞌn yi jun yolaꞌtz, ẍchiquiwixkuꞌ, nin ẍchiclaxkuꞌ. 3 Ẍchiclaxkuꞌ na tzꞌelepon chitxumuꞌ tetz, yi chumbalaj nin talmaꞌ Kajcaw skibaj.Yi xeꞌ yi cmon creyent iꞌtz Cristo
4 Chiẍkansquen quibuꞌ te Kajcaw Jesucristo, na niꞌcuꞌn iꞌ tu jun cꞌub yi at xac. At xac iꞌ, na txaꞌijt tan Ryos tan xconeꞌn tan tkꞌol kutzꞌajbil. Ẍchiwutz yi eꞌ mas wunak, quiꞌc muꞌẍ xac iꞌ, 5 poro skawutz ketz niꞌcuꞌn iꞌ tu jun cꞌub yi wiꞌnin walor. Nchaꞌtz yi eꞌ cyeruꞌ niꞌcuꞌn eꞌuꞌ tu jun cꞌub yi at xac yi na xcon tan banleꞌn jun templo. Cyakꞌeꞌ bin quibuꞌ tetz Ryos tan chixconeꞌnuꞌ tetz tan banleꞌn jun balaj cmon yi caꞌl Ryos taneꞌn. Nchaꞌtz cyakꞌeꞌ quibuꞌ tetz Ryos tan chixconeꞌnuꞌ taꞌn tetz jun kꞌuꞌj paleꞌ yi chin xan nin eꞌ, jun kꞌuꞌj paleꞌ yi na cyoy balaj oy tetz Ryos yi iꞌtz yi chikꞌajsbiluꞌ. Ej nin nternin na tzatzin Ryos te yi jun jilwutz oyaꞌtz, tan tuꞌ yi mbi cuꞌn banak Jesucristo. 6 Na je jun xtxolbil yi tzꞌibaꞌnt cyen:
“Bitwok tzaj.
Jeꞌnak intxaꞌol jun yaj yi wiꞌnin kꞌej, jun yaj yi at xac.
Xconk waꞌn, chi na xcon jun cꞌub tetz xeꞌtzbil xeꞌ jun caꞌl.
Xconk waꞌn tetz xeꞌ incmon.
Nin cyakil yi eꞌ yil kꞌukeꞌ chicꞌuꞌl te iꞌ,
quil tzꞌel chitxꞌix.”a
7 Wiꞌnin kꞌej yi junaꞌtz yi cꞌub taneꞌn. At xac iꞌ tetz cyeruꞌ, yi eꞌuꞌ yi kꞌuklij chicꞌuꞌluꞌ teꞌj. Poro apart xtxolbil scyetz yi eꞌ yi qui kꞌuklij chicꞌuꞌl teꞌj, na je junt xtxolbil yi tzꞌibaꞌnt cyen:
“Yi cꞌub yi quiꞌc xac ẍchiwutz yi eꞌ bnol caꞌl,
yaꞌstzun yi cꞌub yi mas tcuꞌn kꞌej njal.”b
8 Nchaꞌtz at junt xtxolbil yi tzꞌibaꞌnt cyen yi na tal:
“Chijepon tzotp wunak te ẍchusuꞌn yi junaꞌtz yi cꞌub taneꞌn.
Nin tan paj yi chijepon tzotp nchiben tul il.”c
Yi na elepont yi xtxolbilaꞌseꞌj iꞌtz, yi at wunak yi ja chijeꞌ tzotp, nin ja chiben tul il, tan paj yi quinin ncyocsaj yi yol Ryos. Poro txumijt tan Ryos tan chibeneꞌn tul il tan paj yi quinin ncyocsaj yi yol iꞌ.
Yi eꞌ yi ateꞌ tetz tajal Ryos
9 Poro yi eꞌ cyeruꞌ, eꞌuꞌ jun jilwutz wunak yi txaꞌij cheꞌtuꞌ tan Ryos. Eꞌ cuꞌnuꞌ paleꞌ yi na chixcon swutz yi wiꞌtz rey. Ej nin yi eꞌ cyeruꞌ eꞌuꞌ jun jilwutz wunak yi txaꞌij cheꞌtuꞌ tan Ryos tan chixconeꞌnuꞌ tetz. Nin ateꞌuꞌ tajal Ryos, nin txaꞌij cheꞌtuꞌ tan xtxoleꞌn yi eꞌchk balaj takleꞌn yi bnixnak tan Ryos, yi Ryos yi nxcyeꞌ tan cyelseꞌneꞌl tzajuꞌ tul tzꞌoꞌtz wutzil, nin tan teleꞌn pacx wutz cyajtzaꞌkluꞌ. 10 Sajleꞌn quibeꞌuꞌ tetz tajal Ryos, poro yi jaluꞌ ateꞌuꞌ tetz tajal. Sajleꞌn cyaꞌl jun meꞌl kꞌajab scyeꞌjuꞌ, poro yi jaluꞌ ja el kꞌajab Ryos scyeꞌjuꞌ.
Tajweꞌn tan kachajol kabalajil ẍchiwutz wunak
11 I bin jaluꞌ, na cuꞌ inwutz ẍchiwutzuꞌ eꞌuꞌ kajwutz, yi eꞌuꞌ yi awer nak quitaneꞌnuꞌ tzoneꞌj wi munt, yi eꞌuꞌ yi nkꞌeraꞌtz yi mero chinajbiluꞌ yi munteꞌj. Na cuꞌ inwutz ẍchiwutzuꞌ tan chimakol quibuꞌ te eꞌchk ajtzaꞌkl cachiꞌ yi na xcyeꞌ tan kapoꞌtzeꞌn. 12 Chichajeꞌuꞌ chibalajiluꞌ ẍchiwutz yi eꞌ yi nkꞌeꞌtz eꞌ creyent. Quiꞌc na ban ko na chitzan tan chiyolcheꞌnuꞌ jaluꞌ, na ko na quil yi bintzinin eꞌuꞌ balaj, scyakꞌeꞌ chikꞌajsbil tetz Ryos yil tzꞌoc iꞌ tan pujleꞌn xtisyaꞌ.
13 Choꞌkuꞌ bin jakꞌ chicaꞌwl yi eꞌ ajcaw tetz tnum. Choꞌkuꞌ cꞌulutxum jakꞌ caꞌwl yi wiꞌtz ajcaw. 14 Nin choꞌkuꞌ cꞌulutxum jakꞌ chicaꞌwl yi eꞌ gobernador yi bixbaꞌn cheꞌ tan yi wiꞌtz ajcawaꞌtz. Choꞌkuꞌ cꞌulutxum jakꞌ chicaꞌwl, na bixbaꞌn cheꞌ tan takꞌleꞌn chicaws yi eꞌ mal nak nin tan takꞌleꞌn chikꞌej yi eꞌ yi na chiban jun baꞌn. 15 Chibneꞌuꞌ bin taneꞌn, na yaꞌstzun yi xtxolbil yi nternin na tzatzin Ryos teꞌj, na yi tajbil iꞌ iꞌtz yil chixcyeꞌuꞌ tan makleꞌn chitziꞌ yi eꞌ txalcꞌnak tan yi eꞌchk takleꞌn balaj yi na chibanuꞌ.
16 Bintzi elnakeꞌuꞌ liwr jakꞌ chicaꞌwl cyakil wunak, poro qui na yub yi nink cyaluꞌ: “Kabneꞌ yi ketz kajbil na ja wiꞌt keꞌl liwr jakꞌ eꞌchk caꞌwl,” cheꞌchkuꞌ sban. Quiꞌc rmeril, na ateꞌuꞌ bin tkꞌab Ryos. Ateꞌuꞌ jakꞌ caꞌwl iꞌ. 17 Ma na mas balaj yi nink cyakꞌuꞌ chikꞌej cyakil wunak. Chichajeꞌuꞌ lokꞌ ib scyetz eꞌ mas kajwutz. Cyekeꞌuꞌ ẍchiꞌ Ryos. Cyakꞌeꞌuꞌ kꞌej yi gobierum, yi wiꞌtz ajcaw.
Tajweꞌn kamucꞌ qꞌuixcꞌuj chi banak Cristo
18 Nchaꞌtz eꞌuꞌ mos, choꞌkuꞌ cꞌulutxum jakꞌ caꞌwl chipatrónuꞌ. Tajweꞌn yil cyekuꞌ chichiꞌ. Quiꞌc na ban yi ko eꞌ balaj nak nka quiꞌ. 19 Kol chimucꞌuꞌ qꞌuixcꞌuj yi quiꞌc chipajuꞌ teꞌj, tan tuꞌ yi na el chitxumuꞌ tetz yi yaꞌstzun yi tajbil Ryos, sjalok tzun chibanluꞌ swutz iꞌ. 20 Poro quiꞌc nin ltakꞌ scyeruꞌ kol chimucꞌuꞌ qꞌuixcꞌuj ẍchikꞌab chipatrónuꞌ yi ko chipaj ninuꞌ. Poro ko na oc chibuchleꞌnuꞌ, nin quiꞌc chipajuꞌ teꞌj, sjalok chibanluꞌ swutz Ryos kol tzꞌicyꞌpon cyaꞌnuꞌ. 21 Txaꞌij choꞌt tan Ryos tan mucꞌleꞌn qꞌuixcꞌuj, na yaꞌstzun banak Cristo. Ja mucꞌ qꞌuixcꞌuj tan kaclaxeꞌn. Nchaꞌtz oꞌ ketz, tajweꞌn lkamucꞌ qꞌuixcꞌuj chi banak Cristo. 22 Quiꞌc muꞌẍ tal til teraꞌtz, nin cyaꞌl cunin el tzit jun laꞌjil le stziꞌ. 23 Nin yi cyoqueꞌn yi eꞌ wunak tan jisleꞌn, quinin stzol iꞌ yi chiyol. Yi cyoqueꞌn wunak tan biyleꞌn, quinin tal: “Chꞌiwwok bajx. Wicyꞌseꞌ incꞌuꞌl tziteꞌj,” ma na choꞌn na tabnaj tib mas tkꞌab Ryos, yi pujul xtisyaꞌ yi qui na xom wiꞌ te jun. 24 Ej nin iteꞌn nin Cristaꞌtz yi icyꞌan nin cyakil yi kil yi quimeꞌn iꞌ swutz pasyon. Yi quimeꞌn iꞌ, niꞌcuꞌn yi yaꞌtzk kaquimeꞌn ketz swutz yi kil. Chaꞌstzun te quiꞌct ltaj quen yi juchleꞌn il skeꞌj jaluꞌ. Ja keꞌl liwr tzakꞌ caꞌwl yi jun ajtzaꞌkl cachiꞌ yi cyꞌaꞌn kaꞌn. Ej nin ja kitzꞌij junt tir tan kabnol taneꞌn eꞌchk takleꞌn balaj. Na tan tuꞌ yi qꞌuixcꞌuj yi tij Jesús, ja ul yos skuchꞌ ketz. 25 Niꞌcuꞌn eꞌuꞌ sajleꞌn chi jun cꞌoloj cneruꞌ yi txꞌakxnakeꞌ. Poro yi jaluꞌ ja wiꞌt chuꞌluꞌ ticyꞌleꞌn tan chixomeꞌnuꞌ te yi kapstor, yi qꞌuicyꞌlom ketz.