Jun chusuꞌn scyetz yi eꞌ umnakeꞌ
3
1 I bin jaluꞌ, eꞌuꞌ kaxnaꞌnil, choꞌkuꞌ cꞌulutxum jakꞌ caꞌwl quichmiluꞌ. Na ko at eꞌuꞌ yi nkꞌeꞌtz creyent quichmiluꞌ qui cunin batz lcyocsaj tan tuꞌ yi chicꞌulutxumiluꞌ. Ko yaꞌtz lchibanuꞌ, qui tajweꞌn tan cyoqueꞌnuꞌ tan xtxoleꞌn yol Kataj scyetz, 2 na scyocsajeꞌ yil quil yi chibalajiluꞌ, tu chicꞌulutxumiluꞌ. 3 Na qui na elepont yi at balajil jun xnaꞌn tan tuꞌ yi chin xebaꞌn nin yi xiꞌil wiꞌ nka tan tuꞌ yi chin wekoꞌn nin tib. Nin qui na elepont yi at balajil jun xnaꞌn tan tuꞌ yi na xconsaj balaj uwaj. 4 Poro na lajluchax yi chibalajil eꞌ xnaꞌn yi ko skoj cuꞌn te cyalmaꞌ, nin yi ko chin cꞌulutxum nin eꞌ. Ej nin wiꞌnin na tzatzin Ryos te jun ajtzaꞌklaꞌtz. Ej nin yi jun ajtzaꞌklaꞌtz, quil sotz, chi na sotz eꞌchk balaj beꞌch ketz. 5 Yaꞌstzun banakeꞌ yi eꞌ balaj xnaꞌn tentz, yi eꞌ yi choꞌn ajlij chicꞌuꞌl te Ryos. Eꞌ oc cꞌulutxum jakꞌ caꞌwl quichmil. Yaꞌstzun eꞌ ban tan jaleꞌn chibalajil. 6 Na yaꞌstzun banak Sara. Ocnak iꞌ jakꞌ caꞌwl Abraham. Talnak iꞌ “Wajcaw” tetz. Chaꞌstzun te kol choꞌcuꞌ cꞌulutxum, nin ko quil xit cyajtzaꞌkluꞌ tan paj alchok eꞌchk takleꞌn, eꞌ tzunuꞌ tal kꞌajtzun Sara taneꞌn, na niꞌcuꞌn cyajtzaꞌkluꞌ tuchꞌ.7 Poro nchaꞌtz eꞌuꞌ yaj, cyakꞌeꞌuꞌ chikꞌej yi quixkeluꞌ. Elk chikꞌajabuꞌ scyeꞌj. Poro nkꞌeꞌtz ntin tan paj yi eꞌ tuꞌ xnaꞌn, ma na tan paj yi nchaꞌtz eꞌ, ẍchicambok te yi itzꞌajbil tan tuꞌ banl talmaꞌ Ryos. Ej nin ko quil chixomuꞌ te yi caꞌwlaꞌseꞌj, quil stzaꞌwej Ryos yi chioracionuꞌ.
Baꞌn cyeri eꞌ yi na chitij qꞌuixcꞌuj tan yi eꞌchk takleꞌn balaj yi na chiban.
8 Junit bin sban cyajtzaꞌkluꞌ eꞌuꞌ wajwutz. Okꞌok chicꞌuꞌluꞌ squibil quibuꞌ. Chilokꞌeꞌ quibuꞌ chi ik quitzꞌun quitzicy quibuꞌ. Elk chikꞌajabuꞌ squibil quibuꞌ. Chichajeꞌuꞌ chicꞌulutxumiluꞌ squibil quibuꞌ. 9 Yi ko na bajij jun eꞌchk takleꞌn cachiꞌ scyeꞌjuꞌ, qui na yub yi niꞌcuꞌn tzꞌel cuꞌnt cyaꞌnuꞌ. Kol choꞌc wunak tan chijisleꞌnuꞌ, quil chitzolninuꞌ chiyol. Ma na chijakeꞌuꞌ chibanl tetz Ryos, na yaꞌstzun chimunluꞌ yi txaꞌij cheꞌtuꞌ teꞌj tan Ryos. Kol chixomuꞌ te cyakil eꞌchk ajtzaꞌklaꞌseꞌj, sjalok cyeruꞌ chibanluꞌ tzantzaj. 10 Na at jun xtxolbil yi tzꞌibaꞌnt cyen yi na tal:
“¿Na peꞌ itaj ben ẍkon muꞌẍt itiemp?
¿Na peꞌ itaj cxtzatzinwok coboxt kꞌej?
Makwok itziꞌ te cachiꞌ yol.
Nin quil tzijal cuꞌn jun wiꞌ itakꞌ scyetz alchok wunakil.
11 Jatxwok len itib te eꞌchk takleꞌn cachiꞌ.
Nin banwok eꞌchk takleꞌn balaj.
Nin xomenwok teꞌj.
12 Na at Kajcaw tan quichꞌeyeꞌn yi eꞌ balaj nak.
Nin na tbit iꞌ yi na chijilon tetz.
Contr iꞌ scyeꞌj yi eꞌ yi na chiban eꞌchk takleꞌn cachiꞌ.
Nin junawes na chisotz taꞌn.”a
13 Nchaꞌtz kol tzꞌel cyalmaꞌuꞌ tan banleꞌn taneꞌn eꞌchk takleꞌn balaj yi na tzatzin Ryos teꞌj, cyaꞌl jun sban jun eꞌchk takleꞌn cachiꞌ scyeꞌjuꞌ. 14 Poro ko ilenin tzꞌoc chibuchleꞌnuꞌ, at chibanluꞌ teꞌj. Chaꞌstzun te quil chixobuꞌ scyetz, nin quil chibisunuꞌ cyaꞌn, 15 ma na tetz cuꞌn cyalmaꞌuꞌ chibneꞌuꞌ taneꞌn yi caꞌwl Cristo. Nchaꞌtz tajweꞌn yi list cuꞌn tunin eꞌuꞌ tan takꞌleꞌn tajtzaꞌkl jun kol sjak scyeruꞌ yi mbiꞌtz yi at chichꞌiwuꞌ teꞌj. 16 Poro tajweꞌn yil cyocsaj quibuꞌ juy nin tajweꞌn cyakꞌuꞌ chikꞌej. Puntil cuꞌn cyulejuꞌ cyajtzaꞌkluꞌ bantz chinachoneꞌnuꞌ te yi quiꞌc chipaltiluꞌ. Na ko yaꞌtz quitaneꞌnuꞌ tkꞌab Cristo, chitxꞌixwok yi eꞌ yi na chitzan tan chijisleꞌnuꞌ, nin tan chiyolcheꞌnuꞌ.
17 Poro yi ko iꞌtz tajbil Kataj tan katijol qꞌuixcꞌuj tan eꞌchk takleꞌn balaj yi na kaban, baꞌn atit. Poro ko na chitijuꞌ qꞌuixcꞌuj tan eꞌchk takleꞌn cachiꞌ yi na chibanuꞌ, chipaj ninuꞌ tzuntz. 18 Poro ko na chitijuꞌ qꞌuixcꞌuj tan tuꞌ yi eꞌuꞌ cꞌulutxum jak caꞌwl Cristo, baꞌn atit, na yaꞌstzun banak Cristo. Quiꞌc tetz til poro quim tan stzajseꞌn kil yi oꞌ juchul il. Ntin quim iꞌ junintziꞌ tir, poro yaꞌstzun tulejtz tan kicyꞌleꞌn nin te Ryos. Bintzi ja quim yi wankil, poro yi talmaꞌ quinin quim. 19 Ej nin yi tponeꞌn talmaꞌ ẍchixoꞌl almaꞌ, nin xtxol jun xtxolbil scyetz yi eꞌaꞌtz yi ateꞌ xetzeꞌ, 20 tuml yi eꞌ yi eꞌ pajnak yi caꞌwl Ryos yi na tzan tzaj Noé tan banleꞌn yi arca. Nim cuntunin cꞌuꞌl Ryos ban squibaj yi ateꞌ tzaj wuxtxꞌotxꞌ, poro quinin chitxꞌixpuj yi cyajtzaꞌkl. Ma na ntin wajxok ntziꞌ xoneꞌn eꞌ clax. 21 Na ja chiclax tan yi aꞌ. Ej nin yi jun xtxolbilaꞌtz, iꞌtz jun elsawutzil yi bautism yi na bajij skeꞌj jaluꞌ tan kaclaxeꞌn. Poro qui na kaclax tan tuꞌ yi na xcyeꞌ yi aꞌ tan telseꞌn tzꞌil te kawankil, ma na ntin na kaclax yi ko tetz cuꞌn kalmaꞌ na kocsaj yi ja itzꞌij Cristo junt tir ẍchixoꞌl almaꞌ, 22 nin ajnak iꞌ tcyaꞌj, nin choꞌn cꞌolchij iꞌ jaluꞌ le sbal Kataj Ryos tan cawuꞌn. Cyakil yi eꞌ ángel scyuchꞌ eꞌ mas ajcaw yi ateꞌ tcyaꞌj, choꞌn cunin ateꞌ jakꞌ caꞌwl iꞌ.