Kuchꞌeyeꞌ kib skibil kib, quib yi kamunl yi akꞌij sketz tan Ryos
4
1 I bin jaluꞌ, ja kil yi icyꞌnakpon qꞌuixcꞌuj tan Jesucristo. Nchaꞌtz bin eꞌuꞌ, chibneꞌuꞌ list quibuꞌ tan tijleꞌn qꞌuixcꞌuj. Na ko na mucꞌ jun yaj qꞌuixcꞌuj, na elepont yi jun cuꞌn ja cyaj cyen tilol eꞌchk takleꞌn cachiꞌ. 2 Yi jun jilwutz wunakaꞌtz qui na cyakꞌ amaꞌl tetz yi tajbil yi chiwankil, ma na ntin na chixom te yi tajbil Ryos. 3 Stzicuꞌn cyakil eꞌchk takleꞌn cachiꞌ yi banakeꞌuꞌ tenẍchan, yi eꞌchk takleꞌn cachiꞌ yi na chipekꞌ yi eꞌ mas wunak teꞌj. Na sajleꞌn ja chibanuꞌ wiꞌnin eꞌchk takleꞌn cachiꞌ. Ja chixomuꞌ te tajbil chiwankiluꞌ, na oc aꞌ ẍchiwiꞌuꞌ. Nin chin xoꞌj nin eꞌuꞌ tan waꞌaꞌn. Tunin na chiẍekneꞌ tuninuꞌ tan paj xcꞌalaꞌiꞌn. Nin ja cyakꞌuꞌ kꞌej yi eꞌchk takleꞌn yi banij quitaneꞌn. Wech na quiꞌc cu teꞌj. 4 Poro yi jaluꞌ, na cheꞌl yab yi eꞌ wunak scyeꞌjuꞌ. Qui na pujx cyaꞌn yi mbi tzuntz yi quiꞌt na chixomuꞌ te yi cyetz cyajtzaꞌkl. Chaꞌstzun te na chitzan tan chijisleꞌnuꞌ. 5 Poro txꞌaklij xtisyaꞌiꞌn scyeꞌj, na tzꞌocopon Ryos tan maꞌleꞌn cyajtzaꞌkl cyakil yi eꞌ yi itzꞌeꞌ scyuchꞌ cyakil yi eꞌ yi quimnakeꞌ. 6 Na, txolij yi balaj stziblal scyetz yi eꞌ wunak tentz yi ntaxk chiquim. Txolij scyetz, bantz chicambal yi itzꞌajbil yi at tu Ryos. At eꞌ cyocsaj nin at eꞌ quiꞌ, poro tircuꞌn eꞌ baj quim len chi na chiquim cyakil wunak.7 Poro, eꞌuꞌ wajwutz, txant tan tuleꞌn yi tiemp yil sotz cyakil. Chaꞌstzun te tajweꞌn yi pe nin skꞌil sban yi cyajtzaꞌkluꞌ. Chiquiwsaj quibuꞌ chijunalenuꞌ tan nachleꞌn Kataj. Quil cyakꞌuꞌ amaꞌl tan xiteꞌn cyajtzaꞌkluꞌ. 8 Poro yi mas tajweꞌn iꞌtz yil jal jun chin lokꞌ ib ẍchixoꞌluꞌ, na na xcyeꞌ yi lokꞌ ib tan xiteꞌn eꞌchk il yi na jal skaxoꞌl. 9 Cyakꞌeꞌuꞌ chiposaruꞌ squibil quibuꞌ, nin quil chicabejuꞌ chicꞌuꞌluꞌ tan takꞌleꞌn. 10 Quichꞌeyeꞌ len bin quibuꞌ squibil quibuꞌ, quib yi chimunluꞌ yi akꞌij len scyeruꞌ tan Ryos. Tajweꞌn choꞌcuꞌ tetz balaj martomaꞌ tan banleꞌn taneꞌn yi chimunluꞌaꞌtz yi akꞌijt len scyeruꞌ tan Ryos. 11 Ko eꞌuꞌ aj txolinl, chixconseꞌuꞌ yi yol yi choꞌn na saj tu Ryos. Ko eꞌuꞌ bnol pawor, chibneꞌuꞌ chimunluꞌ quib yi ajtzaꞌkl yi akꞌij len scyeruꞌ tan Ryos. Lok chibanuꞌ cyakil eꞌchk takleꞌnaꞌtz tan porer Jesucristo, tan jaleꞌn mas kꞌej Kataj. Kakꞌeꞌ bin kakꞌajsbil tetz, na iꞌ yi wiꞌtz ajcaw tetz ben kꞌej ben sak. Amén.
Quil katxꞌixwij kol tzꞌaꞌlchij yab sketz
12 Eꞌuꞌ jun cꞌoloj wajwutz, eꞌ eliꞌch len yabuꞌ te yi eꞌchk qꞌuixcꞌuj yi chin xoꞌwbil nin yi na tzan tan chipileꞌnuꞌ, na tetz nin teraꞌstz. 13 Baꞌn tcuꞌn lchitzatzinuꞌ tkꞌab, na yaꞌstzun banak Cristo. Ko quil cheꞌl yabuꞌ te yi qꞌuixcꞌujaꞌtz, nternin ẍchitzatzinkuꞌ yil lajluchax yi kꞌej Cristo yil tzꞌul tzaj iꞌ junt tir. 14 Baꞌn cyeruꞌ ko na chitzan wunak tan chijisleꞌnuꞌ tan tuꞌ yi xomcheꞌuꞌ te Cristo, na iꞌtz jun techl yi xomij yi Espíritu Ryos scyeꞌjuꞌ, yi kaRyosilaꞌtz yi at wiꞌnin kꞌej. 15 Poro ko na chitzanuꞌ tan tijleꞌn qꞌuixcꞌuj tan paj yi eꞌuꞌ malnak nka tan paj yi eꞌuꞌ biyolnak, nka tan paj yi eꞌuꞌ alkꞌom, qui na yub. Nchaꞌtz qui na yub ko na chitzanuꞌ tan tijleꞌn qꞌuixcꞌuj tan tuꞌ yi na chipit quibuꞌ txoꞌl eꞌchk oyintziꞌ tu eꞌchk suntiꞌn yi quiꞌc cyocleꞌnuꞌ teꞌj. 16 Poro quiꞌc txꞌixwil teꞌj ko na chitzanuꞌ tan tijleꞌn qꞌuixcꞌuj tan tuꞌ yi eꞌuꞌ tetz Cristo. Quil cheꞌl yabuꞌ teꞌj, ma na cyakꞌeꞌuꞌ chikꞌajsbiluꞌ tetz Ryos tan tuꞌ yi yaꞌtz na bajij scyeꞌjuꞌ.
17 Ja wiꞌt xeꞌtij Ryos tan kapileꞌn bantz lajluchaxeꞌn ko oꞌ cꞌulutxum jakꞌ caꞌwl iꞌ nka quiꞌ. Ko yaꞌtz sbajok skeꞌj ketz, pyor sbneꞌ iꞌ scyeꞌj yi eꞌ yi qui na cyocsaj yi balaj stziblal tetz kaRyosil. 18 Na ko kaleꞌn nin il skaclaxok ketz yi oꞌ balaj, pyor nin ẍchibneꞌ yi eꞌ yi qui na cyek ẍchiꞌ Ryos, yi eꞌ juchul il. 19 Chaꞌstzun te ko yaꞌtz tajbil Ryos tan kamucꞌul eꞌchk qꞌuixcꞌuj jaluꞌ, tajweꞌn yi quil tzꞌicyꞌ kapaj tan mucꞌleꞌn nin tan banleꞌn taneꞌn yi eꞌchk takleꞌn balaj. Tajweꞌn bin yil kabnaj yi kalmaꞌ tkꞌab Ryos, na iꞌ bnol ketz, nin ilenin na el kꞌab iꞌ te yol.