Coboxt ajtzaꞌkl scyetz yi eꞌ bajxom
5
1 I bin jaluꞌ swaleꞌ cobox cyajtzaꞌkluꞌ yi eꞌuꞌ wiꞌ banl wiꞌ yi ateꞌuꞌ lakak cmon creyent. Na nchaꞌtz in, in wiꞌ banl wiꞌ, nin wilnak yi qꞌuixcꞌuj yi icyꞌnakpon tan Cristo. Ej nin nchaꞌtz in, sjalok inkꞌej scyuchꞌuꞌ yil lajluchax yi kꞌej Jesucristo skawutz.2 Choꞌkuꞌ il tan quilweꞌn yi cmon creyent, yi eꞌ tawun Ryos taneꞌn. Choꞌkuꞌ il teꞌj chi na chiban yi eꞌ pstor tan chiqꞌuicyꞌleꞌn eꞌ tal cyawun. Yil choꞌcuꞌ tan banleꞌn taneꞌn yi xtxolbilaꞌseꞌj, na taj yi tetz cuꞌn cyalmaꞌuꞌ, na yaꞌstzun tajbil Ryos. Qui na yub yi ko puers tuꞌ na choꞌcuꞌ sjuꞌ takꞌun Kataj. Nin qui na yub yi ko pwok tuꞌ na chiwutz cyenuꞌ teꞌj. 3 Nchaꞌtz qui na yub kol cyocsaj quibuꞌ nim tan chicaweꞌn yi cmon creyent, ma na baꞌn tcuꞌn yi nink chichajuꞌ chibalajiluꞌ ẍchiwutz tan chixomeꞌn cyetz teꞌj. 4 Nin kol chixomuꞌ te yi jun xtxolbilaꞌtz, ẍchicambokuꞌ te jun balaj coron yil tzꞌul tzaj yi wiꞌtz kapstor yi at skibaj. Ej nin yi jun coronaꞌtz yi tzꞌakꞌlok sketz, quil sotz yi yubil tetz ben kꞌej ben sak.
5 Ma jaluꞌ, axwok jun cꞌoloj xicy, tajweꞌn yil cxoꞌcwok cꞌulutxum jakꞌ chicaꞌwl yi eꞌ wiꞌ banl wiꞌ. Nin cyakil cuꞌn eꞌuꞌ tajweꞌn tan chichajoluꞌ yi chicꞌulutxumiluꞌ squibil quibuꞌ, na at jun xtxolbil yi tzꞌibaꞌnt cyen yi na tal:
“Contr Ryos scyeꞌj yi eꞌ yi na cyocsaj quib nim tu cyajtzaꞌkl.
Poro na chꞌeyan scyeꞌj yi eꞌ yi na cyocsaj quib juy.
Nin stkꞌeꞌ iꞌ chibanl.”a \p 6 Chaꞌstzun te tajweꞌn cyocsaj quibuꞌ juy jakꞌ caꞌwl Kataj Ryos, yi jun yi chin cham nin. Ko yaꞌtz cyulejuꞌ, sjalok chikꞌejuꞌ yil tzꞌul tzaj yi balaj tiemp yi at tulbil. 7 Cyabnaj cyen binuꞌ cyakil yi sotzaj cꞌuꞌlal yi at tetz cyalmaꞌuꞌ swutz Kataj Ryos, na na el kꞌajab iꞌ skeꞌj.
8 Poro chiqꞌuicyꞌlej quibuꞌ, nin toqueꞌn cuꞌn sban cyajtzaꞌkluꞌ. Na yi Baybaꞌn, yi contr skeꞌj, na xon wi munt chi na ban jun balum yi na quim tan weꞌj, nin nternin na tzan tan joyleꞌn puntil tan katzꞌamleꞌn. 9 Poro quiwit te yi na cyocsajuꞌ nin chibneꞌ quibuꞌ tu yi Baybaꞌn, na elnak chitxumuꞌ tetz yi na chitzan yi eꞌ mas kajwutz yi ateꞌ beneꞌn tziꞌn wi munt tan tijleꞌn iteꞌnin qꞌuixcꞌujaꞌtz. 10 Chimuqꞌueꞌ binuꞌ qꞌuixcꞌuj, na quiꞌt ampon tiemp tan toqueꞌn Ryos tan chinucꞌleꞌnuꞌ tan cyoqueꞌnuꞌ tetz tzꞌaknak cuꞌn. Chin quiw nin ẍchibneꞌuꞌ taꞌn. Ban nin pe nink chicotxcaxuꞌ muꞌẍ tal. Na iꞌ yi jun yi na akꞌon tzaj kabanl. Nin iꞌ yi Ryos yi nkachakon tzaj tan katzatzineꞌn tuchꞌ, nin tu Kajcaw Jesucristo. Ej nin sjalok jun ketz kakꞌej tuchꞌ yi quil sotz tetz ben kꞌej ben sak. 11 Ntin yi ketz kaRyosilaꞌtz chin cham nin iꞌ. Kakꞌeꞌ bin kꞌej iꞌ tetz ben kꞌej ben sak. Amén.
Stzajsbil wiꞌ yol
12 I bin jaluꞌ, ja xcon Silvano waꞌn tan stzꞌibeꞌn nin yi incarteꞌj. Na iꞌ jun balaj creyent yi baꞌn kꞌukeꞌ chicꞌuꞌluꞌ teꞌj.
Ej nin yi xac yi carteꞌj iꞌtz tan cꞌaseꞌn cyajtzaꞌkluꞌ, nin tan talcheꞌn scyeruꞌ yi kol chixomuꞌ te yi xtxolbil yi at tul, sjalok yi mero banl Kataj cyanuꞌ. Quiwit bin.
13 Ma jaluꞌ, yi eꞌ mas creyent yi ateꞌ tzoneꞌj Babilonia, tu incyꞌajl Marcos, na chitzan tan talcheꞌn nin jun yos scyeruꞌ. Na nchaꞌtz eꞌ, txaꞌij cheꞌt tan Ryos chi quitaneꞌn cyeruꞌ. 14 Chikꞌajlaj quibuꞌ squibil quibuꞌ tan ẍchajleꞌn yi na chipekꞌuꞌ squibil quibuꞌ.
Takꞌ tzaj bin Kataj yi tzatzin paz squibuꞌ, yi eꞌuꞌ yi eꞌuꞌ tetz Cristo. Amén.