Ẍchijalok aj chusunl yi eꞌ laꞌj
2
1 Poro ilenin jalnakeꞌ jujun elsanl stziꞌ Ryos tentz yi eꞌ laꞌj. Nin niꞌcuꞌn sbajok ẍchixoꞌl cyeruꞌ. Na ẍchijalok aj chusunl yi eꞌ laꞌj. Chebeleꞌn cuntuꞌ lxcon chichusuꞌn cyaꞌn tan chipoꞌtzeꞌnuꞌ. Ej nin chebeleꞌn cuntuꞌ tzꞌel kꞌej chipatrón cyaꞌn, yi lokꞌol cyetz. Poro iteꞌn nin yi cyetz cyajtzaꞌkl xconk tan chipoꞌtzeꞌn. Nin qui tzꞌicyꞌ scyetz yil tzꞌul tzaj chicaws. 2 Ej nin wiꞌnin creyent ẍchixomok tan banleꞌn yi eꞌchk takleꞌn yi chin juntlen nin yi na chiban cyetz. Ej nin tan chipaj yi eꞌ laꞌjaꞌtz sjalok yolbil tetz yi beꞌ yi xomchoꞌ teꞌj, yi mero bintzi nin tetz. 3 Ej nin tan yi na el cyalmaꞌ te pwok, xconk eꞌchk balaj yol cyaꞌn tan chixileꞌnuꞌ. Poro txꞌaklij chicaws cyeraꞌtz ẍchiwutz, na tenẍchan bixeweꞌn tan Ryos tan tkꞌol chicaws.4 Quil scuy Ryos chipaj, na quinin cuynak chipaj eꞌ ángel yi chijuchnak quil swutz iꞌ tentz, ma na eꞌ ben joꞌliꞌn xetzeꞌ, tul tzꞌoꞌtz. Nin jopij cheꞌ tan ẍchꞌiweꞌn chicaws. 5 Nchaꞌtz yi eꞌ antiw wunak yi chin cachiꞌ nin eꞌ, quinin cuy Ryos chipaj. Chaꞌstzun te sajeꞌn kojol iꞌ abal squibaj. Ntin Noé clax taꞌn, yi jun yi xtxolnak scyetz yi tajweꞌn tan cyajeꞌn cyen quilol eꞌchk takleꞌn cachiꞌ nin tan cyoqueꞌn tetz balaj. Poro nkꞌeꞌtz ntin Noé clax taꞌn ma na nchaꞌtz eꞌ clax yi juk najal iꞌ.a 6 Ej nin nchaꞌtz yi eꞌ aj Sodoma tu eꞌ aj Gomorra, takꞌ Ryos chicaws cyeraꞌtz. Na tircuꞌn chitzꞌeꞌeꞌn tan kꞌakꞌ. Jalt nin stzaꞌjil yi cob tnumaꞌtz cyaj cyen.b Yaꞌstzun banak Ryos tentz tetz jun techl yi yaꞌstzun sbajok scyeꞌj cyakil yi eꞌ mal nak, yi eꞌ yi eꞌ jalnak sajleꞌnix tunintz tu yi eꞌ yi ẍchijalok sbneꞌ opon tunintz. 7 Ntin clax jun balaj yaj yi na biꞌaj Lot. Na yi jun yajaꞌtz ntin cuꞌn iꞌ bisun tan yi eꞌchk takleꞌn cachiꞌ yi na chitzan yi eꞌ mas wunakaꞌtz tan banleꞌn.c 8 Na cyakil nin kꞌej jal jun chin bis tetz talmaꞌ yi tbital nin yi tilol yi eꞌchk takleꞌn cachiꞌ yi na chitzan yi eꞌ mal nakaꞌtz tan banleꞌn. 9 Tan yi xtxolbilaꞌseꞌj na lajluchax skawutz yi na xcyeꞌ Ryos tan chicolcheꞌn yi eꞌ yi na cyek ẍchiꞌ iꞌ. Ej nin nchaꞌtz na ẍchaj sketz yi txꞌaklij chicaws yi eꞌ mal nak. Na tzꞌul jun kꞌej yil tzꞌoc Ryos tan takꞌleꞌn chicaws cyakil yi eꞌ yi na chijuch quil.
10 Pyor nin sbneꞌ Ryos tan takꞌleꞌn chicaws yi eꞌ yi na chiban yi cyetz cyajbil yi chin juntlen nin. Na chin pajol caꞌwl nin eꞌ. Qui na cyek ẍchiꞌ jun. Qui tocleꞌn jun takleꞌn te chiwiꞌ. Ej nin qui na chixob tan chijisleꞌn yi eꞌ ajcaw yi ateꞌ tcyaꞌj. 11 Wech yi eꞌ ángel yi ateꞌ nintz tcyaꞌj, at mas chikꞌej ẍchiwutz cyetz, poro qui na choꞌc cyeꞌtz tan telseꞌn kꞌej jun, nka tan chijisleꞌn yi eꞌ ajcawaꞌtz yi ateꞌ tcyaꞌj.
12 Poro yi eꞌ wunakaꞌtzeꞌj niꞌcuꞌn eꞌ tu txuc, quiꞌc cyajtzaꞌkl. Ntin ja chitzꞌij tan chiquimeꞌn chi na chiban smaron txuc ẍchikꞌab aj txuquinl. Quiꞌc cyajtzaꞌkl, na na choꞌc tan telseꞌn kꞌej eꞌchk chusuꞌn yi qui na pujx cyaꞌn. Poro yi eꞌaꞌtz ẍchiquimok chi na chiquim eꞌ smaron txuc. 13 Ẍchitijeꞌ qꞌuixcꞌuj tan yi eꞌchk takleꞌn cachiꞌ yi na chiban, na tan chipaj at kajwutz yi na chitij qꞌuixcꞌuj. Yi eꞌaꞌtz qui na chitxꞌixwij tan banleꞌn eꞌchk takleꞌn cachiꞌ. Chintxꞌixwil nin chiwutz yi na chopon ẍchixoꞌluꞌ lakak chikꞌejuꞌ na tunin na chitxꞌujt tunin tan banleꞌn eꞌchk takleꞌn cachiꞌ.
14 Nkꞌeꞌtz ntin chiwutz tan xmayeꞌn jun xnaꞌn, ma na ilenin na el nin cyalmaꞌ teꞌj. Qui na icyꞌ chipaj tan juchleꞌn quil. Nin na chixcyeꞌ tan chipoꞌtzeꞌn yi eꞌ cotxcoj. Chin list nin eꞌ tan chicambal yi cyetz cyajbil. Chin juntlen nin eꞌ. 15 Eꞌ txꞌakxnakeꞌt tan paj yi ja cyaj cyen quilol yi balaj beꞌ. Nin na chixom te yi tajtzaꞌkl kꞌajtzun Balaam, yi cyꞌajl Beor, na nin oc iꞌ tan xtxꞌacleꞌn pwok te eꞌchk ajtzaꞌkl cachiꞌ yi el talmaꞌ teꞌj. 16 Yi Balaamaꞌtz i iꞌaꞌtz yi xcyeꞌ jun ti buruꞌ tan makleꞌn wutz. Wech qui na aꞌw yol cyakꞌun yi eꞌ buruꞌ, poro jilon yi junaꞌtz chi na jilon wunak, nin xcyeꞌ iꞌ tan xiteꞌn jun rat yi yab ajtzaꞌkl yi at le wiꞌ Balaam.d
17 Yi eꞌ aj chusunlaꞌtz niꞌcuꞌn eꞌ tu jun cꞌwaꞌ yi ja skej yi quiꞌct aꞌ tul. Ej nin chaꞌtz niꞌcuꞌn cyajtzaꞌkl chi taneꞌn sbakꞌ, yi naꞌ cuntunin na aj nint tan cyekꞌekꞌ. Poro at jun amaꞌl yi bixbaꞌnt tetz cyetz, yi chin tzꞌoꞌtz nin, yaꞌstzun chicyajeꞌt tetz ben kꞌej ben sak. 18 Ej nin yi na chitxolin, na chijoy eꞌchk weltil yol yi chumbalaj nin poro quiꞌc xtxolbil, quiꞌc ekaꞌn taꞌn. Tan yi chiyol yi chin elsbil almaꞌ nin, na chixcyeꞌ tan chipoꞌtzeꞌn yi eꞌ yi cotxcoj, yi eꞌ yi pentuꞌ kꞌuklij chicꞌuꞌl. 19 Na na cyal scyetz: “Kol xom chiwiꞌuꞌ skeꞌj cheleponuꞌ tkꞌab ilcꞌol,” cheꞌch. Poro eꞌ teꞌn pres tkꞌab yi eꞌchk takleꞌn cachiꞌ yi na chiban. Na cyakil wunak eꞌ pres tkꞌab yi eꞌchk ajtzaꞌkl yi cyakꞌoꞌnt quib tan banleꞌn. 20 Poro ko at eꞌ yi ja cheꞌl tzaj tkꞌab yi ilcꞌol tan tuꞌ yi mmeꞌl chitxum tetz yi Kajcaw Jesucristo yi iꞌ yi colol cyetz, nin kol chipakxij junt tir tan banleꞌn yi eꞌchk takleꞌn cachiꞌ, pyor tcuꞌn ẍchibneꞌ swutz yi sajleꞌn yi ntaxk cyocsaj. 21 Lastum eꞌ yi elnak chitxum tetz yi balaj beꞌ tu yi caꞌwl Kataj yi chin xan nin. Mas baꞌn tcuꞌn yi quiꞌk elnak chitxum tetz. 22 Na tan yi jun ajtzaꞌklaꞌtz yi na chiban na el cuꞌn teꞌj yi jun yol yi na aꞌlchij: “Yi eꞌ txꞌiꞌ, na chixaꞌpij, nin na chaꞌjt junt tir tan bajseꞌn. Nchaꞌtz yi eꞌ boch, watok nin chijetzaj xe aꞌ nin na chitol cuꞌn quib junt tir tul xkꞌol.”e