YI CAꞌP CART YI BNIXNAK TAN WAꞌN
1
1 I bin jaluꞌ, wutzileꞌn cuꞌn in na chintzan tan stzꞌibeꞌn nin yi carteꞌj. Nin iꞌtz tetz cyakil eꞌuꞌ cmon yi txꞌajij cheꞌtuꞌ tan Ryos. Niꞌcuꞌn eꞌuꞌ tkꞌab Cristo chi taneꞌn jun xnaꞌn yi wiꞌnin kꞌej. Nchaꞌtz yi carteꞌj iꞌtz tetz cyakil yi eꞌuꞌ, yi eꞌuꞌ tal yi jun xnaꞌnaꞌtz taneꞌn. Wiꞌnin na chimpekꞌ scyeꞌjuꞌ. Poro nkꞌeꞌtz ntin in na chimpekꞌ scyeꞌjuꞌ, poro nchaꞌtz cyakil yi eꞌ yi ja el chitxum te yi bintzi. 2 Na kapekꞌ len scyeꞌjuꞌ, tan tuꞌ yi ja el katxum te yi bintzi. Ej nin yi jun bintzijaꞌtz quil tzꞌel te kacꞌuꞌl. 3 Stkꞌeꞌ Kataj Ryos tu Kajcaw Jesucristo yi Cyꞌajl iꞌ, yi banl tu tzatzin paz squibuꞌ. Nchaꞌtz kol chixomuꞌ te yi bintzi, nin kol jal lokꞌ ib ẍchixoꞌluꞌ tzꞌelepon kꞌajab scyeꞌjuꞌ.4 Ja chintzatzin yi wilol yi at cobox taluꞌ taneꞌn yi nternin na chixom te yi bintzi, chi alijt cyen tan Kataj sketz.
5 Ma jaluꞌ, yi eꞌuꞌ cmon creyent na cuꞌ inwutz scyeruꞌ. Kalokꞌeꞌ kib skibil kib. Nin yi xtxolbileꞌj yi na wal nin scyeruꞌ, nkꞌeꞌtz jun acꞌaj caꞌwl, ma na iteꞌn nin caꞌwlaꞌtz yi bitaꞌnt cyanuꞌ jetz yi cyocsal cuninuꞌ. 6 Na ko na kalokꞌ kib skibil kib na tzun katzantz tan banleꞌn taneꞌn yi caꞌwl Kataj.
Yi eꞌ subul nak
7 Poro eꞌuꞌ wajwutz, or quiluꞌ na at wiꞌnin subul nak yi na chixon beneꞌn tziꞌn. Nin yi eꞌaꞌtz, qui na cyocsaj yi ja itzꞌij Cristo chi wunak taneꞌn. Nin cyakil yi eꞌ yi na chitzan tan xtxoleꞌn yi jun xtxolbilaꞌtz yaꞌstzun eꞌ subul nakaꞌtz, nin yaꞌstzun yi eꞌ contr Cristo. 8 Or bin quiluꞌ, quil chixomuꞌ te cyetz cyajbil, na ko yaꞌtz quiꞌc chicambajuꞌ te yi cuꞌs kꞌej yi eꞌ banakuꞌ sajleꞌnix tunintz. Ma na choꞌkuꞌ il te yi na kocsaj bantz chicambaluꞌ jamel chikꞌejuꞌ te yi cuꞌs kꞌej yi ja wiꞌt chibanuꞌ sajleꞌn tunintz.
9 Na cyakil yi eꞌ yi na oc stzꞌaꞌpl yi yol Kataj cyaꞌn nin yi quinin na chixom te yi ẍchusuꞌn Cristo, nkꞌeꞌtz eꞌ tetz Ryos. Poro cyakil yi eꞌ yi na chixom te ẍchusuꞌn Cristo, yaꞌstzun yi eꞌ yi ateꞌ cwent Ryos tu yi tetz Cyꞌajl. 10 Chaꞌstzun te, kol tzꞌopon jun yaj tan xtxoleꞌn scyeruꞌ, nin ko qui na xom te ẍchusuꞌn Cristo, quil cyakꞌuꞌ amaꞌl tetz. Nin quil cyaluꞌ: “Takꞌ tzaj Kataj banl tibuꞌ.” 11 Na kol kajak yi banl Kataj tibaj yi jun jilwutz wunakaꞌtz na elepont yi niꞌcuꞌn tzun kajtzaꞌkl tuchꞌ.
Stzajsbil wiꞌ yol
12 Wiꞌnin xtxolbil na waj lwal scyeruꞌ, poro quil tzintzꞌib tan tint tul jun uꞌj. Na at inchꞌiw tan woponeꞌn tan chixajseꞌnuꞌ nin tan yol scyeruꞌ, nin yil nopontz skatzatzink jun scyuchꞌuꞌ.
13 Yi eꞌ quitzꞌunuꞌ yi ateꞌ tzoneꞌj, na cyal nin jun yos scyeruꞌ, na nchaꞌtz eꞌ txaꞌij cheꞌt tan Kataj. Amén.