YI TOXIꞌN CART YI BNIXNAK TAN WAꞌN
Yi takꞌleꞌn kꞌej kajwutz Gayo
1
1 Ma jaluꞌ wajwutz Gayo, wutzileꞌn cuꞌn in na chintzan tan stzꞌibeꞌn nin yi carteꞌj tzatz. Na wiꞌnin okꞌleꞌn awutz waꞌn. 2 Aẍ jun cꞌoloj wajwutz, na chintzan tan nachleꞌn Kataj tzawibaj. Nin yi wetz yi na cuꞌ intziꞌ taꞌn iꞌtz yi baꞌniẍ cuntuꞌk te awakꞌun, chi awutaneꞌn tkaꞌb Kataj. 3 Ja takꞌ wiꞌnin tzatzin swetz yi cyulakeꞌn cobox kajwutz tan xtxoleꞌn swetz yi ẍeꞌn taneꞌn yi acꞌulutxumil, nin yi ẍeꞌn cuꞌn xomquiẍ te yi bintzi. 4 Quiꞌc nin junt tzatzin yi niꞌcuꞌnk tu yi tzatzin yi na takꞌ swetz yi na wit yi xomcheꞌ yi eꞌ witzꞌun te yi bintzi.5 Aẍ jun cꞌoloj wajwutz, awakꞌoꞌnt awib tan quichꞌeyeꞌn yi eꞌ kajwutz, pyor nin na aban tan quichꞌeyeꞌn yi eꞌ kajwutz yi choꞌn na chisaj joylaj. 6 Yi eꞌ yi eꞌ ulak tzoneꞌj, ja cyal ẍchiwutz yi cmon yi ẍeꞌn cuꞌn awutaneꞌn tan ẍchajleꞌn yi lokꞌ ib scyetz. Tzincꞌucheꞌ bin jun pawor tzawetz, yil chicyꞌakt junt tir yi eꞌ kajwutzaꞌtz tan axajseꞌn, joyaj puntil tan takꞌleꞌn muꞌẍ tal ẍchꞌeybil cyetz tan quichꞌeyeꞌn te chipyaj. Baꞌn tzawakꞌ muꞌẍ ẍchꞌeybil cyetz yi stzatzink Ryos teꞌj. 7 Na tan tuꞌ yi na chipekꞌ yi cobox kajwutzaꞌtz te Jesucristo na chixon tan chixconeꞌn tetz, nin qui na chijak muꞌẍ ẍchꞌeybil cyetz scyetz yi eꞌ yi qui na cyocsaj. 8 Chaꞌstzun te yi oꞌ ketz, tajweꞌn tan cheꞌ kuchꞌeyal tan chibeneꞌn tan xtxoleꞌn yi chusuꞌn yi bintzinin tetz.
Cachiꞌ tajtzaꞌkl Diótrefes
9 Benak intzꞌibal jun uꞌj scyetz yi cmon creyent kale atixeꞌt. Poro yi Diótrefes qui na tzatzin skeꞌj na yi tetz tajbil iꞌtz yil cawun iꞌ tu yi tetz tajtzaꞌkl. 10 Chaꞌstzun te yil nopon, nocopon tan makleꞌn wutz, na na tzan tan ẍchaqꞌueꞌn yol nin tan xtxumleꞌn eꞌchk laꞌjil skeꞌj. Ej nin nkꞌeꞌtz ntin yi ajtzaꞌkleꞌj, ma na nchaꞌtz qui na takꞌ amaꞌl scyetz yi eꞌ kajwutz yi na chopon tan ixajseꞌnwok. Nin na cheꞌ lajlen yi eꞌ yi na cyakꞌ chiposar yi eꞌ kajwutz yi na chopon.
11 Aẍ jun cꞌoloj wajwutz quil cxom te eꞌchk yab ajtzaꞌklaꞌtz, ma na xomen te yi balaj ajtzaꞌkl. Na cyakil yi eꞌ yi na chixom te yi balaj ajtzaꞌkl, eꞌ cuꞌn tetz Ryos. Ma yi eꞌ yi na chixom te yi cachiꞌ ajtzaꞌkl, qui na el chitxum te yi tajbil Ryos.
Chumbalaj nin Demetrio
12 Ma yi kajwutz Demetrio, cyakil wunak na cyal yi chumbalaj nin iꞌ. Bintzinin chiyol, na iteꞌn yaj na chajon tetz. Ej nin nchaꞌtz oꞌ ketz, na kil yi chumbalaj nin iꞌ. Nin elnak atxum tetz yi nkꞌeꞌtz oꞌ laꞌj tu kayol.
Stzajsbil wiꞌ yol
13 At wiꞌnin eꞌchk takleꞌn yi tajweꞌn tan walol tzatz, poro qui na waj tzintzꞌib nin tul uꞌj. 14 Poro tzinjoyeꞌ puntil tan woponeꞌn tan axajseꞌn. Kalenaꞌs tzun kajilontz tzawuchꞌ.
15 Takꞌ tzaj Kataj Ryos yi tzatzin paz tzawibaj. Nin yi eꞌ kajwutz yi eꞌ awamiw, yi ateꞌ tzoneꞌj, na cyal nin jun yos tzawetz. Banaj jun pawor swetz tan talcheꞌn quen jun yos scyetz cyakil yi eꞌ kajwutz yi kamiw kib scyuchꞌ yi ateꞌ-tz kale atiẍeꞌt.