JUDAS
Qꞌuicyꞌleꞌn choꞌ tan Kataj Ryos
1
1 I bin jaluꞌ, i inaꞌtz, in Judas. In esclaw Jesucristo, nin in titzꞌun Santiago. Ej nin yi carteꞌj iꞌtz tetz cyeruꞌ yi xansaꞌncheꞌtuꞌ, yi eꞌuꞌ yi wiꞌnin okꞌleꞌn chiwutzuꞌ tan Kataj Ryos, yi eꞌuꞌ yi qꞌuicyꞌleꞌn cheꞌuꞌ tan Jesucristo. 2 Takꞌ tzaj Kataj yi banl talmaꞌ squibuꞌ. Nchaꞌtz takꞌ tzaj iꞌ wiꞌnin tzatzin paz tu lokꞌ ib scyeruꞌ.Tajweꞌn tan koqueꞌn il tan colcheꞌn yi balaj chusuꞌn yi na kocsaj
3 Eꞌuꞌ jun cꞌoloj wajwutz, sajleꞌnix tunintz ja el walmaꞌ tan stzꞌibeꞌn nin jun cart scyeruꞌ te yi claxeꞌn yi skacambajeꞌ scyuchꞌuꞌ. Poro yi jaluꞌ na wil yi tajweꞌn cunin tan beneꞌn intzꞌibal junt xtxolbil tan chiquiwseꞌnuꞌ, bantz cyoqueꞌnuꞌ il tan colcheꞌn yi chusuꞌn yi na kocsaj, yi chusuꞌn yi bixbaꞌnt cyen nin yi akꞌijt sketz, yi oꞌ yi xansaꞌn choꞌt.
Ja choꞌc pokꞌ subulnak ẍchixoꞌluꞌ
4 Tajweꞌn tan beneꞌn intzꞌibal yi xtxolbileꞌj scyeruꞌ na at eꞌ yi ewun cuꞌn nchoꞌc ẍchixoꞌluꞌ nin na chitzan tan chisubleꞌnuꞌ. Poro tzꞌibaꞌnt cyen le tuꞌj Kataj: Txꞌaklij len chicaws. Na qui na cyek ẍchiꞌ Ryos. Na le wutz cyetz cyajtzaꞌkl yi alcaweꞌt Ryos na at banl talmaꞌ iꞌ scyeꞌj. Chaꞌstzun te qui na choꞌc cꞌulutxum jakꞌ caꞌwl yi ketz Kajcawil, yi Kajcaw Jesucristo, yi ntin iꞌ na cawun skeꞌj. 5 Elnak chitxumuꞌ tetz cyakil xtxolbileꞌj yi swaleꞌ scyeruꞌ poro tzinnaꞌwseꞌ junt tir tan tuleꞌn txꞌakx ẍchicꞌuꞌluꞌ.
Txꞌaklij len chicaws, na nkꞌeꞌtz eꞌ cꞌulutxum jakꞌ caꞌwl Kataj Ryos
Yi Kataj Ryos iꞌ elsan tzaj yi eꞌ aj Israel jakꞌ chicaꞌwl yi eꞌ aj Egipto, poro yi teleꞌn tiemp nin eꞌ cuꞌ sotzal cyakil yi eꞌ yi quinin eꞌ oc cꞌulutxum jakꞌ caꞌwl iꞌ.
6 Nchaꞌtz ulk txꞌakx ẍchicꞌuꞌluꞌ yi mbi mbajij scyeꞌj yi eꞌ ángel tentz, yi eꞌ yi cyaj cyen quilol yi chimunl tu chinajbil yi akꞌij scyetz. Ateꞌ pres jaluꞌ tan Ryos, na eꞌ pajol caꞌwl. Cꞌalijcheꞌ tul tzꞌoꞌtz tan ẍchꞌiweꞌn yi kꞌejlal yil tzꞌoc Kajcaw tan pujleꞌn xtisyaꞌ. 7 Nchaꞌtz ulk txꞌakx ẍchicꞌuꞌluꞌ yi chicaws yi eꞌ aj Sodoma tu aj Gomorra scyuchꞌ yi eꞌ mas wunak yi najlcheꞌ-tz nakaꞌj. Na ja chipaj yi caꞌwl Ryos chi eꞌ ban yi eꞌ ángel. Na ja cyakꞌ quib tan xnaꞌniꞌn tu yajiꞌn, nin na chiwitbej quib yi eꞌ yaj tu yaj, nin xnaꞌn tu xnaꞌn. Siquier yi eꞌ txuc na chiban yi eꞌchk takleꞌnaꞌtz. Poro yi chicaws yi akꞌlij iꞌtz jun elsawutzil yi at tulbil chicaws yi eꞌ pajol caꞌwlaꞌtz yi ateꞌ ẍchixoꞌluꞌ. Na tzꞌopon jun kꞌej yi sticyꞌseꞌ Ryos cꞌuꞌl scyeꞌj tan chicawseꞌn tetz ben kꞌej ben sak.a
8 Poro yi eꞌaꞌtz yi ateꞌ ẍchixoꞌluꞌ, qui na choꞌc tan xtxumleꞌn yi eꞌchk techlaꞌtz. Ma na ntin na ben cyajtzaꞌkl joylaj tan xtxumleꞌn jun cꞌoloj takleꞌn. Chaꞌstzun te na chitzan tan poꞌtzeꞌn chiwankil. Nchaꞌtz qui na choꞌc cꞌulutxum jakꞌ caꞌwl jun, na na choꞌc tan chijisleꞌn yi eꞌ wiꞌtz ajcaw yi qui na cheꞌ kil tan kawutz. 9 Wech yi wiꞌtz ángel yi na biꞌaj Miguel, quinin nimsaj cꞌuꞌl tan yajleꞌn yi Baybaꞌn nicyꞌ yi na chimaj quib te yi wankil Moisés, ma na ntin tal iꞌ tetz: “Ryos lmakon wutzuꞌ.”
Alcaweꞌt Ryos le chiwutz cyetz
10 Ej nin nchaꞌtz yi eꞌaꞌtz yi ateꞌ ẍchixoꞌluꞌ qui na chixob tan telseꞌn kꞌej yi eꞌchk balaj ajtzaꞌkl, ma na xituꞌn na cyulej. Na qui na el chitxum tetz yi mbiꞌtz yi mero xeꞌ. Baꞌn nin peꞌ eꞌ txuc, at cyajtzaꞌkl yi na chitzꞌij. Nin nchaꞌtz yi eꞌaꞌtz, at cyajtzaꞌkl yi cyꞌaꞌn cyaꞌn yi na chitzꞌij, poro ntin na xcon cyaꞌn tan chipoꞌtzal quib squibil quib.
11 ¡Poro lastum eꞌ! Na na chixom te tajtzaꞌkl Caín.b Ej nin niꞌcuꞌn cyajtzaꞌkl tu tajtzaꞌkl Balaam.c Na ntin wutzcheꞌ cyen te pwok. Chaꞌstzun te choꞌn sbajok scyeꞌj chi bajij scyeꞌj eꞌ tu Coré yi sotzel chiwutz ban tan paj stzeꞌtzal yi cyajtzaꞌkl.d
Qui na cyek ẍchiꞌ Ryos
12 Nchaꞌtz yi eꞌaꞌs, niꞌcuꞌn eꞌ tu jun cꞌub yi qui lajluch yi na xcyeꞌ tan katzotpeꞌn. Na yi na bajij eꞌchk tzatziꞌn, na chocopon tan waꞌaꞌn ẍchixoꞌluꞌ. Quiꞌc muꞌẍ tal na chitxꞌixwij, na at na chiwutz cyen teꞌj. Ej nin niꞌcuꞌn eꞌ tu noc sbakꞌ yi quiꞌc aꞌ cyꞌaꞌn taꞌn yi naꞌ cuntuꞌ na aj nint tan cyekꞌekꞌ. Nin niꞌcuꞌn eꞌ tu jun wiꞌ tzeꞌ yi qui na takꞌ wutz, nin jeꞌnak bukꞌij. Quimnakeꞌ taneꞌn. 13 Nchaꞌtz niꞌcuꞌn eꞌ tu pakꞌbil mar yi chin xoꞌwbil nin, yi na ul cꞌoxeꞌ eꞌchk takleꞌn cachiꞌ wi samlicyꞌ.e Ej nin niꞌcuꞌn eꞌ tu jun txꞌuml yi tu na paꞌcaꞌb tuꞌ, nin quiꞌt na jal beꞌ taꞌn. Txꞌaklij len chicaws yi eꞌaꞌtz ẍchiwutz. Na choꞌn chopon joꞌliꞌn tul jun amaꞌl yi chin tcꞌul nin tetz ben kꞌej ben sak.
Poro alijt cyen yi txꞌaklij cyetz chicaws
14-15 At jun xtxolbil yi alijt cyen scyeꞌj yi eꞌ yajaꞌtz tan kꞌajtzun kamam Enoc, yi choꞌn titzꞌeꞌn ẍchixoꞌl yi jukiꞌn wek wunak jetz te Adam. Je yi xtxolbil yi tal iꞌeꞌj: “Bitwok tzaj inyol, na ja wil tul jun inwutzicyꞌ taneꞌn yi tuleꞌn tzaj Kajcaw. Jat nin loꞌ mil chixoneꞌn yi eꞌ ángel xomcheꞌ teꞌj. Nin ja ben wilol yi tuleꞌn iꞌ tan takleꞌn chicaws cyakil wunak tan paj yi eꞌchk takleꞌn cachiꞌ yi banakeꞌ, nin tan paj yi eꞌchk quiw yol yi na cyal tetz iꞌ,” stzun Enoc banak cyen. 16 Yaꞌstzun sbajok scyeꞌj eꞌ yajaꞌtz na eꞌ cuꞌn ajxochonl. Eꞌ cuꞌn ajxbajtziꞌinl. Ntin na chixom te cyetz cyajbil. Nin na cyocsaj quib nim tu cyetz cyajtzaꞌkl. Ntin na cyakꞌ kꞌej jun ko at chiwutz cyen teꞌj.
Nin alijt cyen cyakꞌun yi eꞌ apostl yi ẍchijalok subulnak
17 Poro eꞌuꞌ jun cꞌoloj wajwutz, ulk txꞌakx chicꞌuꞌluꞌ yi xtxolbil yi alijt cyen cyakꞌun yi eꞌ apostl cwent Kajcaw Jesucristo. 18 Je chiyoleꞌj: “Yil tzꞌopon yi tiemp yi txant tan tuleꞌn yi wiꞌtzbil kꞌejlal, ẍchijalok yi eꞌ yi chocopon tan xbajtziꞌeꞌn yi na kocsaj nin ntin ẍchixomok te cyetz cyajtzaꞌkl yi na icyꞌ ẍchicꞌuꞌl, jun ajtzaꞌkl yi qui na saj tu Ryos.” 19 Yi jun jilwutz wunakaꞌtz chixcyek tan jatxleꞌn cuꞌn yi eꞌchk cmon, na ntin chixomok te eꞌchk ajtzaꞌkl tetz tzoneꞌj wuxtxꞌotxꞌ. Na quiꞌc Espíritu Sant tetz cyalmaꞌ.
Ẍeꞌn kaban tan colcheꞌn yi chusuꞌn yi na kocsaj, nin tan chiquiwseꞌn yi eꞌ yi na cabej chicꞌuꞌl
20-21 Chaꞌstzun te eꞌuꞌ jun cꞌoloj wajwutz: Skajunal cuꞌn kaqꞌuicyꞌlej kib bantz ilenin lpekꞌ Kataj Ryos skeꞌj. Nin skajunal cuꞌn kaquiwsaj kib te yi chusuꞌn yi wiꞌnin xanil, yi choꞌn kꞌuklij kacꞌuꞌl teꞌj. Nin kanacheꞌ Kataj tan porer yi Espíritu Sant. Ej nin nchaꞌtz, elk kalmaꞌ tan ẍchꞌiweꞌn yi tulbil Kajcaw Jesucristo na tan tuꞌ yi na el kꞌajab skeꞌj, stkꞌeꞌ jun itzꞌajbil sketz yi quinin bajsbeꞌn tetz.
22-23 Nchaꞌtz choꞌkuꞌ il tan chiquiwseꞌn yi eꞌ yi na chicabej chicꞌuꞌl te yi na kocsaj, bantz chiclaxeꞌn tkꞌab yi kꞌakꞌ yi txꞌaklij ẍchiwutz. Ma yi eꞌ mas, yi qui na cyaj chitxꞌixpuj cyajtzaꞌkl, elk chikꞌajabuꞌ scyeꞌj. Poro or quiluꞌ yil choꞌcuꞌ tan chimoxeꞌn, yi quil chixomuꞌ te cyetz cyajtzaꞌkl. Mpe ik yi beꞌch cyetz quil chimacuꞌ, na cyꞌaꞌn ilcꞌol taꞌn taneꞌn tan paj yi eꞌchk takleꞌn cachiꞌ yi na chiban.
Kakꞌeꞌ kakꞌajsbil tetz Kajcaw
24 Kakꞌeꞌ bin kakꞌajsbil tetz Kataj Ryos. Na chin cham nin iꞌ tan kacolcheꞌn bantz quil kapakxij. Nin chin cham nin iꞌ tan kanucꞌleꞌn bantz baꞌn atoꞌt, nin tzatzin cuꞌn kopon swutz iꞌ tan kilol yi tetz kꞌej. 25 Na ntin iꞌ Ryos. Nin ntin iꞌ koꞌ colon tan Jesucristo yi ketz Kajcawil. Kakꞌeꞌ bin kakꞌajsbil tetz, na at kꞌej iꞌ. Na chin wutzileꞌn nin kꞌej tu pakꞌpuchal iꞌ. Nin chumam nin yi tetz porer tan chixiteꞌn yi tetz contr. Na ntin iꞌ wiꞌtz Ajcaw sajleꞌnix tunintz, nin sbneꞌ opon tunintz. Amén.