APOCALIPSIS
Yi eꞌchk xtxolbil yi aꞌlchij tetz apostol Waꞌn
1
1 Yi xtxolbileꞌj, iꞌtz yi xtxolbil yi tal Ryos tetz Jesucristo, bantz lajluchaxeꞌn ẍchiwutz yi eꞌ tetz ẍchakum yi mbi sbajok chan. Ej nin ja xcon jun ángel taꞌn tan talcheꞌn tetz Waꞌn, yi ẍchakum iꞌ. 2 Ej nin clar cunin talol Waꞌn yi yol Ryos yi ntal Jesucristo tetz.3 Baꞌn cyeri eꞌ yil choꞌc tan siꞌleꞌn yi xtxolbileꞌj scyetz eꞌ mas wunak, nin baꞌn cyeri eꞌ yil cyakꞌ amaꞌl tan tbiteꞌn, nin tan banleꞌn taneꞌn yi eꞌchk chusuꞌn yi at tul yi liwreꞌj, na txant tan kocomponeꞌn xeꞌ cyen yi tiemp yil bajij yi xtxolbileꞌj.
Yi beneꞌn stzꞌibal Waꞌn yi jujun cart scyetz yi juk cmon creyent.
4 I bin jaluꞌ, i inaꞌtz in Waꞌn, nin na chintzan tan stzꞌibeꞌn nin yi carteꞌj tetz cyeruꞌ yi eꞌuꞌ yi ateꞌuꞌ tajlal yi juk kꞌuꞌj cmon creyent yi ateꞌ lakak tnum cwent yi amaꞌl Asia. Takꞌ tzaj Kataj yi banl tu tzatzin paz squibuꞌ, yi Kataj Ryosaꞌtz yi at nintz sajleꞌn tunintz, nin yi at tulbil junt tir. Nin nchaꞌtz takꞌ tzaj yi juk espíritu yi ateꞌ tcyaꞌj swutz yi cꞌolchbil iꞌ, yi banl tu yi tzatzin paz squibuꞌ. 5 Nchaꞌtz takꞌ tzaj Kajcaw Jesucristo yi banl tu yi tzatzin paz squibuꞌ, na iꞌ yi stiw yi baꞌn kꞌukeꞌ kacꞌuꞌl teꞌj. Nchaꞌtz iꞌ yi jun yi bajx mitzꞌij ẍchixoꞌl almaꞌ. Ej nin iꞌ yi wiꞌtz ajcaw ẍchiwutz cyakil yi eꞌ ajcaw yi ateꞌ tzoneꞌj wuxtxꞌotxꞌ. Kakꞌeꞌ bin kꞌej iꞌ na wiꞌnin na pekꞌ skeꞌj. Ej nin kakꞌeꞌ kꞌej iꞌ na iꞌ ntzajsan cyakil yi kil, tan yi tetz ẍchꞌel yi el kojxuj swutz pasyon. 6 Kakꞌeꞌ bin kꞌej iꞌ, na ja wiꞌt koꞌc ketz tetz ajcaw taꞌn, nin ja wiꞌt koꞌc tetz paleꞌ taꞌn bantz kaxconeꞌn tetz Ryos, yi Taj iꞌ. Ej nin nchaꞌtz kakꞌeꞌ yi kꞌej iꞌ, na scawunk iꞌ tetz ben kꞌej ben sak. Amén.
7 ¡Quibit tzajuꞌ! At tulbil Cristo junt tir.
Ej nin yil tzꞌul, choꞌn tzꞌul tibaj noc sbakꞌ.a
Quiꞌc nin jun wunak yi quiꞌk til wutz iꞌ.
Mpe ik yi eꞌ yi ocnakeꞌ tan biyleꞌn, squileꞌ wutz.
Nin ẍchokꞌok cyakil jilwutz wunak yi ateꞌ beneꞌn tziꞌn wi munt yil quilnin wutz iꞌ.
Jun cuꞌn yaꞌstzun sbajok.
8 Je yol Kajcaweꞌj: “Yi in wetz, in yi xeꞌtzbil, nin in yi wiꞌtzbil te cyakil, chi taneꞌn yi letra A jalen Z,” chij Kajcaw yi kaRyosil, yi jun yi at sajleꞌn tunintz, nin yi at jaluꞌ, nin sbneꞌ opon tunintz; yi jun yi cyaꞌl na xcyeꞌ quen teꞌj.
Yi tilol Waꞌn kꞌej Cristo.
9 Ma yi in wetz, in Waꞌn, kitzꞌun kutzicy kib scyuchꞌuꞌ tkꞌab Kataj. Nchaꞌtz nkꞌeꞌtz chichucuꞌ tan mucꞌleꞌn qꞌuixcꞌuj ma na nchaꞌtz in, na wiꞌnin qꞌuixcꞌuj na intij. Ej nin ja lajluchax yi junit oꞌ scyuchꞌuꞌ jakꞌ caꞌwl Ryos, tan tuꞌ yi nkanimsaj len kacꞌuꞌl tan mucꞌleꞌn yi eꞌchk qꞌuixcꞌujaꞌtz tan yi porer Jesucristo.
Ma jaluꞌ, je imbanakeꞌj, yi incyajeꞌn cyen pres tul yi amaꞌleꞌj yi na biꞌaj Patmos, yi at nicyꞌal yi mar. Choꞌn tzun incyajeꞌn cyen pres tul yi jun amaꞌleꞌj tan paj yi woqueꞌn tan xtxoleꞌn yi Yol Kataj yi talnak Jesucristo. 10 Itzun bantz le jun kꞌej ujleꞌn, ja chin nachon te yi at yi porer yi Espíritu Sant sweꞌj. Nin ben wital yi jiloneꞌn tzaj jun wutz incoc. Chin wiꞌ nin bantz tan yol, chi na ẍchꞌin jun chun. 11 Ej nin je yol iꞌeꞌj yi tal swetz: “Ma jaluꞌ tzꞌib cuꞌn cyakil yi na cẍtzan tan xmayeꞌn, nin benk awaꞌn ẍchikꞌab yi juk kꞌuꞌj cmon creyent yi ateꞌ lakak amaꞌl cwent Asia. Nin je chibiꞌ yi eꞌchk tnumaꞌtz kale ateꞌt yi eꞌ cmonaꞌtz: Efeso, Esmirna, Pérgamo, Tiatira, Sardis, Filadelfia, nin Laodicea,” stzun iꞌ ban tzajtz.
12 Jeꞌn tzun insuchꞌkꞌil wibtz tan xmayeꞌn naꞌ scyetz iꞌ yi na jilon tzaj swetz. Itzun yi jeꞌn insuchꞌkꞌil wibtz, nin ben wilol juk cantil yi oro cuꞌn yi ateꞌ-tz. 13 Ej nin nicyꞌal yi juk cantilaꞌtz wil yi at jun txiclijtz. Iꞌtz yi bajx Cyꞌajol. Ej nin yi beꞌch tetz chukpiꞌn nin tuꞌ. Ma yi cꞌalbil iꞌ chin oro cunin, nin choꞌn at jalen wutz cꞌuꞌl. 14 Ma yi xiꞌil wiꞌ chin skoj nin. I cunin mojob yi chin stum nin, nka chi taneꞌn kꞌab cheꞌw. Ma yi bakꞌ wutz chin txekun nin, chi taneꞌn kꞌakꞌ. 15 Ma yi tkan, chin litzꞌun nin, chi taneꞌn yi litzꞌunil yi jun jilwutz chꞌichꞌ yi na biꞌaj bronce, yi watok cunin el tzaj wi kꞌakꞌ. Ma yi wiꞌ tan yol, wiꞌnin na wajcan, chi na wajcan jun chin tzanlaꞌ. 16 Tzꞌamij juk txꞌuml taꞌn le sbal. Ma yi yol yi na yol, niꞌcuꞌn tu jun spar yi chin aꞌ nin wiꞌ, nin cabil len xlaj atit wiꞌ. Ma yi wutz, wiꞌnin txekuneꞌn, chi taneꞌn kꞌej yi na opon chajcuꞌn.
17 Itzun yi beneꞌn wilol wutz iꞌ insaj tunin colpuj swutz. Poro nintzun jeꞌ tkꞌol iꞌ yi kꞌabtz tinwiꞌ, nintzun taltz: “Quil cxob swetz na i inaꞌtz yi jun yi at nintz le xeꞌtzbil tzaj yi ntaxk jal jun wunak, nin atin nintz sbneꞌ opon tunintz. 18 ¡Bit tzaj! Quimnakin, poro ja nitzꞌij junt tir. Nin quiꞌt chinquim tetz ben kꞌej ben sak, na in na chincawun tibaj yi quimichil. Nin in colol tetz yi laweꞌil yi amaꞌl kale ateꞌt yi eꞌ almaꞌ. 19 Tzꞌib cuꞌn bin cyakil yi eꞌchk takleꞌneꞌj yi mawil tu yi eꞌchk takleꞌn yi na cẍtzan tan tilweꞌn jalcuꞌn tu yi mbi cuꞌn tzawileꞌ. 20 Ma jaluꞌ swaleꞌ tzatz yi mbi na elepont yi juk txꞌuml yi at tinkꞌab, nin yi mbi na elepont yi juk cantil yi oro cuꞌn. Yi juk txꞌumlaꞌtz iꞌtz jun elsawutzil yi juk inchakum yi ateꞌ tan chiqꞌuicyꞌleꞌn yi juk cmon creyent nin yi juk cantil iꞌtz jun elsawutzil yi juk cmon creyentaꞌtz.