Yi xtxolbil yi ben stzꞌibal Waꞌn tetz yi cmon creyent le tnum Efeso
2
1 “I bin jaluꞌ tzꞌib nin yi xtxolbileꞌj tetz inchakum yi na tzan tan qꞌuicyꞌleꞌn yi cmon creyent le tnum Efeso. Je wajbileꞌj: ‘Je yol yi jun yi tzꞌamij yi juk txꞌuml taꞌn, nin yi na xon xoꞌl yi juk cantil yi oro cuꞌn: 2 Na wil cyakil yi na icyꞌpon itaꞌn te yi itakꞌun. Ej nin na wil cyakil yi qꞌuixcꞌuj yi na imucꞌ tan banleꞌn yi imunl. Ej nin na el intxum tetz yi qui na itakꞌ amaꞌl scyetz yi eꞌ mal wunak, na ocnakquix tan maꞌleꞌn cyajtzaꞌkl yi eꞌ yi na cyal yi eꞌ apostol, poro quiꞌ, eꞌ tuꞌ laꞌj. 3 Nchaꞌtz na el intxum tetz yi at wiꞌnin ipasens na ja imucꞌ wiꞌnin qꞌuixcꞌuj tan tuꞌ yi xomquixwok sweꞌj. Nin quinin micyꞌ ipaj swutz. 4 Poro ilenin at ipaltil tzinwutz. Je yi ipaltileꞌj: Quiꞌt na cxpekꞌwok sweꞌj, chi sajleꞌn. 5 Ulk txꞌakx ticꞌuꞌl yi ẍeꞌn itaneꞌn sajleꞌn, nin ẍeꞌn itaneꞌn jaluꞌ, na ja cxplojinwok. Txꞌixpeꞌnwok itajtzaꞌkl. Xomenwok te yi balaj ajtzaꞌkl chi mibanwok sajleꞌn. Poro ko quil cxomwok te inyol, nopontz tan xiteꞌn cuꞌn icantil. 6 Poro ilenin at muꞌẍ ibalajil na qui na cxpekꞌ scyeꞌj yi eꞌ yi na xom chiwiꞌ te cyajtzaꞌkl yi eꞌ nicolaíta, na nchaꞌtz in qui na chimpekꞌ scyeꞌj. 7 Ma jaluꞌ, ko at jun yi na el talmaꞌ tan teleꞌn xtxum tetz yi xtxolbilaꞌseꞌj tajweꞌn yil tzꞌoc il tan xtxumleꞌn yi mbi ntal yi Espíritu Sant scyetz cyakil cmon creyent. Je yol iꞌeꞌj: Cyakil yi eꞌ yil chixcyeꞌ te kacontr swakꞌeꞌ amaꞌl scyetz tan bajseꞌn yi loꞌbaj yi na takꞌ itzꞌajbil, yi loꞌbaj yi na jal te jun wiꞌ tzeꞌ yi at tcyaꞌj le cojbil Ryos.’Yi xtxolbil yi ben stzꞌibal Waꞌn tetz cmon creyent le tnum Esmirna
8 “I bin jaluꞌ, tzꞌib nin yi xtxolbileꞌj tan tponeꞌn tkꞌab yi inchakum yi at tan qꞌuicyꞌleꞌn yi cmon creyent le tnum Esmirna. Je xtxolbileꞌj yi na waj yil tzatzꞌib nin: ‘Yi yoleꞌj iꞌtz yol yi jun yi at nintz le xeꞌtzbil tzaj, yi ntaxk jal jun eꞌchk takleꞌn, nin yi iẍnin lcyaj cyen yil sotz cyakil eꞌchk takleꞌn yi at wi munt; yi jun yi nquim poro itzꞌij junt tir: 9 Na wil cyakil yi qꞌuixcꞌuj yi atix cuꞌnt, nin na wil yi imebaꞌil. Poro yi mero xtxolbil iꞌtz yi axwok ric tkꞌab Ryos. Nchaꞌtz na wit yi eꞌchk jisbil itetz yi na chitzan yi eꞌ judiy tan talcheꞌn. Poro yi eꞌaꞌs nkꞌeꞌtz eꞌ mero judiy, na nkꞌeꞌtz eꞌ tetz Ryos, ma na eꞌ tetz Baybaꞌn. 10 Quil cxbisunwok tan yi eꞌchk qꞌuixcꞌuj yi tzꞌul chan tziwutz. ¡Bitwok tzaj! Jeꞌj sbajok tziteꞌjeꞌj. Tzꞌul pilbil itetz, na at cobox tzixoꞌl yi tzꞌocopon chipileꞌn na chocopon xetzeꞌ tan yi Baybaꞌn. Tzitijeꞌwok qꞌuixcꞌuj tetz cobox kꞌej. Poro quil cxbisunwok, ma na benk itkan ttxꞌotxꞌ jalen yil xquim. Swakꞌeꞌ tzun jun oy tzitetz. Yi jun oyaꞌtz, iꞌtz yi itzꞌajbil yi qui nin bajsbeꞌn tetz. 11 Ma jaluꞌ ko at jun yi na el talmaꞌ tan teleꞌn xtxum tetz yi xtxolbilaꞌseꞌj tajweꞌn yil tzꞌoc il tan xtxumleꞌn yi mbiꞌtz na tzan yi Espíritu Sant tan talcheꞌn scyetz cyakil cmon creyent. Yi eꞌ yi chixcyek te yi kacontr, yaꞌstzun yi eꞌ yi quil chitij yi caꞌp quimichil.’
Yi xtxolbil yi ben stzꞌibal Waꞌn tetz yi cmon creyent le tnum Pérgamo.
12 “I bin jaluꞌ tzꞌib nin yi xtxolbileꞌj tan tponeꞌn tkꞌab yi inchakum yi na tzan tan qꞌuicyꞌleꞌn yi cmon creyent le tnum Pérgamo. Je yi xtxolbileꞌj yi na waj yil tzatzꞌib nin: ‘Yi yoleꞌj iꞌtz yol yi jun yi niꞌcuꞌn yol tu jun spar yi chin aꞌ nin wiꞌ, nin cabil len xlaj atit wiꞌ: 13 Na wil yi choꞌn najlquixwok tul jun tnum kale na cawuneꞌt Baybaꞌn. Poro quiw cuntunin axwoktz tan ixomeꞌn sweꞌj, na cyaꞌl jun tzitetz yi mpakxij yi toqueꞌn biyleꞌn Antípas, yi jun balaj inchakum. 14 Poro ilenin at cobox ipaltil, na at eꞌ tzixoꞌl yi na chixom te yi tajtzaꞌkl Balaam yi ocnak tan ẍchusleꞌn Balac te yi ẍeꞌn sban iꞌ tan chipoꞌtzeꞌn yi eꞌ aj Israel tentz. Nchaꞌtz oc iꞌ tan talcheꞌn scyetz yi baꞌn chibajsaj yi ẍchibel yi eꞌchk chitxꞌixwatz wunak yi na oyij swutz yi chiryosil yi banij tuꞌ taneꞌn. Nin oc iꞌ tan talcheꞌn scyetz yi nkꞌeꞌtz xan yi yajiꞌn tu xnaꞌniꞌn. 15 Poro lastum, at eꞌ tzixoꞌlwok yi na chixom te yi jun ajtzaꞌklaꞌtz. Nchaꞌtz at eꞌ tzixoꞌlwok yi na chixom te yi cyajtzaꞌkl yi eꞌ nicolaíta, yi apart na cyocsaj. 16 Txꞌixpeꞌn binwok itajtzaꞌkl, na ko quiꞌ, nopon chan tziteꞌj, nin snoꞌyintzink scyuchꞌ yi eꞌ yi na xom chiwiꞌ scyeꞌj eꞌ nicolaítaꞌtz. Tzinxconseꞌ inyol yi tzꞌibaꞌnt cyen tul uꞌj tan oyintziꞌ scyuchꞌ na niꞌcuꞌn inyolaꞌtz tu jun spar. 17 Ma jaluꞌ, ko at jun yi na el talmaꞌ tan teleꞌn xtxum te yi xtxolbilaꞌseꞌj, tajweꞌn yil tzꞌoc il tan xtxumleꞌn yi mbi na tzan yi Espíritu Sant tan talcheꞌn scyetz cyakil cmon creyent. Ej nin yi eꞌ yi chixcyeꞌk te kacontr, swakꞌeꞌ amaꞌl scyetz tan chiwaneꞌn te yi maná yi colij waꞌn jalen tziꞌn tcyaꞌj. Nchaꞌtz swakꞌeꞌ jujun tal balaj cꞌub scyetz yi sak teꞌj,a kale tzꞌibaneꞌt jun acꞌaj chibiꞌ. Ej nin cyaꞌl jun tzꞌel xtxum tetz, ma na ntin cuꞌn yi tzꞌamon tetz yi jun cꞌubaꞌtz.’
Yi xtxolbil yi ben tzꞌibal Waꞌn tetz yi cmon creyent le tnum Tiatira.
18 “I bin jaluꞌ tzꞌibnin yi xtxolbileꞌj tetz inchakum yi na tzan tan qꞌuicyꞌleꞌn yi cmon creyent le tnum Tiatira. Je yi xtxolbileꞌj yi na waj yil tzatzꞌib nin: ‘Yi yoleꞌj iꞌtz yi yol yi Cyꞌajl Ryos, yi na txekun yi bakꞌ wutz chi taneꞌn kꞌakꞌ, nin yi chin litzꞌun nin tkan, chi na litzꞌun bronce: 19 Na el intxum tetz cyakil yi eꞌchk takleꞌn balaj yi na ibanwok. Nin na el intxum tetz yi kꞌuklij icꞌuꞌl sweꞌj. Nchaꞌtz na el intxum tetz yi at ipasens. Nin na el intxum tetz yi na itakꞌ itib tan ixconeꞌn swetz. Ej nin na el intxum tetz yi mas na cxoꞌcwok il tan banleꞌn yi eꞌchk takleꞌnaꞌtz jaluꞌ swutz yi sajleꞌn. 20 Poro ilenin at cobox ipaltil tzinwutz. Je ipaltileꞌj: Kꞌuꞌjaꞌn cuntunin yi jun xnaꞌn itaꞌn, yi niꞌcuꞌn tajtzaꞌkl tu yi tajtzaꞌkl Jesabel,b na na tocsaj tib tetz elsanl stziꞌ Ryos. Poro tan yi tetz ẍchusuꞌn na tzan tan chisubleꞌn yi eꞌ wetz yi ateꞌ jakꞌ incaꞌwl. Na tzan iꞌ tan chisubleꞌn, na na tal iꞌ yi nkꞌeꞌtz xan yi xnaꞌniꞌn tu yajiꞌn, nin nkꞌeꞌtz xan yi kol chibajsaj yi ẍchibel chitxꞌixwatz wunak yi na cyoy swutz chiryosil yi banij cuntuꞌ. 21 Ja wakꞌ amaꞌl tetz yi xnaꞌnaꞌtz tan jeꞌn kloꞌ xtxꞌixpul yi tajtzaꞌkl, poro qui na xtxꞌixpuj. 22 Chaꞌstzun te ¡bitwok tzaj! Je tzimbneꞌeꞌj te yi jun xnaꞌnaꞌtz: Copon bocꞌl tan jun chin yabil. Ej nin nchaꞌtz cheꞌ incawseꞌ yi eꞌ yi na xom chiwiꞌ teꞌj, na ko quil chitxꞌixpuj cyajtzaꞌkl, chicopon bocꞌl tan jun chin yabil. Ej nin ẍchitijeꞌ wiꞌnin qꞌuixcꞌuj. 23 Nchaꞌtz cyakil yi eꞌ tal yi jun xnaꞌnaꞌtz, ẍchiquimok len. Yaꞌstzun tzimbneꞌ-tz bantz teleꞌn chitxum cyakil yi eꞌ cmon creyent lakak eꞌchk amaꞌl, yi na el intxum tetz yi mbi na icyꞌ tcꞌuꞌl jun yaj. Ijunalen swakꞌeꞌ icaws. Tul xomquen tuꞌ te yi mbi mbaj ibnol. 24 Poro at wiꞌnin axwok yi qui na cxomwok te yi jun chusuꞌnaꞌtz yi chin juntlen nin, na quinin itakꞌ amaꞌl scyetz yi eꞌ yi na cyal: At wiꞌnin ekaꞌn tan yi ẍchusuꞌn Baybaꞌn, yi na kaxom ketz teꞌj, cheꞌch. 25 Poro yi axwok itetz quil wakꞌ mas itarey te yi ja wiꞌt itbitwok. Ntin quil tzitzakplen tkanil yi balaj ajtzaꞌkl yi xomquixwok teꞌj. Ma na iẍnink xomquixwok teꞌj yil nuꞌl tzaj junt tir. 26 Na cyakil yi eꞌ yil chixcyeꞌ te yi kacontr, nin yil chiban taneꞌn yi wetz wajbil sbneꞌ opon tunintz, swakꞌeꞌ amaꞌl scyetz tan chicawuneꞌn squibaj cyakil jilwutz wunak yi ateꞌ beneꞌn tziꞌn wi munt. 27 Chi ban Intaj yi tkꞌol amaꞌl swetz tan incawuneꞌn, nchaꞌtz tzimbneꞌ wetz. Swakꞌeꞌ amaꞌl scyetz tan chicawuneꞌn. Chin cham nin ẍchibneꞌ tan cawuꞌn, nin cyaꞌl nin jun xcyek tan xiteꞌn chicaꞌwl. Ẍchiloꞌonk yi eꞌ chicontr cyaꞌn chi na cuꞌ pokꞌloꞌn jun ẍwokꞌ yi txꞌotxꞌ tuꞌ. 28 Sjalok chikꞌej nin chitxekunk sbneꞌ opon tunintz chi na ban yi xkisum. 29 Nin ko at jun yi na el talmaꞌ tan teleꞌn xtxum tetz yi xtxolbilaꞌseꞌj tajweꞌn yil tzꞌoc il tan xtxumleꞌn yi mbi na tzan yi Espíritu Sant tan talcheꞌn scyetz cyakil cmon creyent.’