Yi xtxolbil yi ben stzꞌibal Waꞌn tetz yi cmon creyent le tnum Sardis
3
1 “I bin jaluꞌ tzꞌib nin yi junt xtxolbileꞌj tetz yi inchakum yi na tzan tan qꞌuicyꞌleꞌn yi cmon creyent le tnum Sardis: Je yi xtxolbileꞌj yi na waj yil tzatzꞌib nin: ‘Yi yoleꞌj iꞌtz yol yi jun yi cyꞌaꞌn yi juk Espíritu tetz Ryos taꞌn, tuml yi juk txꞌuml: Yi in wetz na wil cyakil yi na ibanwok. Ej nin nchaꞌtz na wil yi quimnak quix taneꞌn. Wech na na aꞌlchij yi chumbalaj nin axwok. 2 Poro elk watl itajtzaꞌkl. Quiwswok itib te muꞌẍ tal ibalajil yi at, yi muꞌẍ tal ibalajil yi txant tan teleꞌn cꞌuꞌl. Or tzitilwok na na wil yi qui na yub yi eꞌchk takleꞌn yi na ibanwok, na qui na iban taneꞌn yi tajbil Ryos. 3 Ulk bin txꞌakx ticꞌuꞌl yi chusuꞌn yi itbitnak. Quiwit bin te yi na itocsaj. Txꞌixpeꞌnwok yi itajtzaꞌkl. Na ko quiꞌ, nopontz tan icawseꞌn. Qui tzꞌicyꞌ tzitetz yil nopon, na nopontz chi na opon jun alkꞌom yi quiꞌc stziblal. 4 Poro ilenin at cobox tzixoꞌl yi cyaꞌl cunin na chisukꞌ wit quib tan banleꞌn jun eꞌchk takleꞌn cachiꞌ. Yi eꞌaꞌtz, yaꞌstzun yi eꞌ yi kaben tan xoꞌn scyuchꞌ. Nin chin stum nin sbneꞌ yi beꞌch cyetz, na chumbalaj nin eꞌ. 5 Cyakil yi eꞌ yil chixcyeꞌ te kacontr tzꞌocopon jun beꞌch cyetz yi chin skoj nin. Ej nin kol chixcyeꞌ te kacontr quil tzintzajsaj yi chibiꞌ tul yi planiy, kale tzꞌibaneꞌt chibiꞌ yi eꞌ yi ẍchicambok te yi itzꞌajbil yi qui nin bajsbeꞌn tetz. Ej nin kol chixcyeꞌ te kacontr swaleꞌ tetz Intaj nin swaleꞌ scyetz yi eꞌ ángel, yi jun cuꞌn eꞌ wetz yi eꞌaꞌtz. 6 Ko at jun yi na el talmaꞌ tan teleꞌn xtxum te yi xtxolbileꞌj tajweꞌn yil tzꞌoc il tan xtxumleꞌn yi mbi na tzan yi Espíritu Sant tan talcheꞌn scyetz cyakil cmon creyent.’Yi ajtzaꞌkl yi ben stzꞌibal Waꞌn tetz yi cmon creyent le tnum Filadelfia
7 “I bin jaluꞌ tzꞌib nin yi jun xtxolbileꞌj tetz yi inchakum yi na tzan tan qꞌuicyꞌleꞌn yi cmon creyent le tnum Filadelfia. Je wajbileꞌj: ‘Yi yoleꞌj iꞌtz yol yi jun yi chin xan nin, nin yi bintzi na jilon, yi jun yi at caꞌwl tkꞌab chi banak Luwiy tentz, yi jun aj laweꞌ yi ko na taj sjop puert, cyaꞌl xcyeꞌ tan jakleꞌn. Ej nin ko na taj sjak, cyaꞌl xcyeꞌ tan jopleꞌn: 8 Na wil cyakil yi na ibanwok. Ej nin na el intxum tetz yi axwok quiw muꞌẍ tal. Chaꞌstzun te ¡bitwok tzaj yi xtxolbileꞌj! Jakij jun puert tziwutz, nin cyaꞌl nin jun xcyeꞌ tan jopleꞌn. Nkꞌeꞌtz chin quiw nin axwok poro ja cxomwok te inchusuꞌn, nin quinin cxtxꞌixwijwok tan talcheꞌn yi xomquixwok sweꞌj. 9 I bin jaluꞌ at jun cmon tetz Baybaꞌn yi na cyal: Yi oꞌ ketz, oꞌ yi mero judiy, poro quiꞌ, wicyakꞌ tuꞌ, na eꞌ tajlal yi cmon Baybaꞌn. ¡Bitwok tzaj! Chincawunk nin scyeꞌj tan chimejeweꞌn cuꞌn tziwutz bantz teleꞌn chitxum tetz yi na chimpekꞌ tziteꞌj. 10 Ma jaluꞌ tan tuꞌ yi xomquixwok te incaꞌwl, nin muqꞌuij qꞌuixcꞌuj itaꞌn, xincoleꞌwok tkꞌab yi jun chin qꞌuixcꞌuj yi at tulbil squibaj cyakil wunak yi najlcheꞌ beneꞌn tziꞌn wi munt. Tzꞌul jun chin qꞌuixcꞌujaꞌtz waꞌn tan chipileꞌn kol chitxꞌixpuj yi cyajtzaꞌkl nka quiꞌ. 11 ¡Bitwok tzaj! Txant tan wuleꞌn junt tir. Quil tzitzakplen tkanil yi na itocsaj, bantz cyaꞌl junt camban tetz yi oy yi tzꞌakꞌlok tzitetz. 12 Cyakil yi eꞌ yil chixcyeꞌ te yi kacontr chocopon waꞌn chi taneꞌn jun balaj tkan caꞌl le caꞌl Ryos. Ej nin quiꞌt cheꞌl tetz tajal Ryos. Nchaꞌtz tzintzꞌibeꞌ quen yi biꞌ yi kaRyosil scyeꞌj tuml yi biꞌ yi tetz tnum yi na biꞌaj Acꞌaj Jerusalén, yi choꞌn lsaj tcyaꞌj kale atit Ryos. Nchaꞌtz tzꞌocopon intzꞌibal yi acꞌaj imbiꞌ scyeꞌj yi eꞌaꞌs. 13 Ko at jun yi na el talmaꞌ tan teleꞌn xtxum te yi xtxolbileꞌj, tajweꞌn yil tzꞌoc il tan xtxumleꞌn yi mbi na tzan yi Espíritu Sant tan talcheꞌn scyetz cyakil cmon creyent.’
Yi xtxolbil yi ben stzꞌibal Waꞌn tetz yi cmon creyent le tnum Laodicea
14 “I bin jaluꞌ, tzꞌib nin yi xtxolbileꞌj tetz inchakum yi na tzan tan qꞌuicyꞌleꞌn yi cmon creyent le tnum Laodicea. Je yi wajbileꞌj: ‘Yi yoleꞌj iꞌtz yi yol yi jun yi na biꞌaj AMEN, yi jun yi baꞌn kꞌukeꞌ kacꞌuꞌl teꞌj, yi jun yi txumul tetz cyakil eꞌchk takleꞌn yi at: 15 Na el intxum tetz yi ẍeꞌn itaneꞌnwok. Nkꞌeꞌtz axwok contr sweꞌj. Poro nchaꞌtz quiꞌc nin muꞌẍ iẍcꞌatnakil. Lastum qui na bixeꞌ itxumuꞌn, na atixcuntuwok. 16 Chaꞌstzun te cxelepon intzubil le intziꞌ. Cxeleponwok te wajal. 17 Wech na italwok: Chin ric nin oꞌ. Wiꞌnin kamebiꞌl. Nchaꞌtz na italwok: Quiꞌc tajweꞌn sketz. Poro yi mero bintzi iꞌtz yi quiꞌc ixac swutz Ryos, na chin mebaꞌ nin axwok. Niꞌcuꞌn axwok tu jun moyiꞌẍ. Niꞌcuꞌn yi txꞌanl quix cuntuꞌkwok. 18 Chaꞌstzun te je jun itajtzaꞌkleꞌj: Baꞌn tcuꞌn yi nink tzilokꞌwok balaj oro swuchꞌ yi quiꞌc paltil. Sjalok tzun imebiꞌl. Ej nchaꞌtz baꞌn tcuꞌn yi nink tzilokꞌwok beꞌch itetz swuchꞌ, yi chin stum nin, bantz iwekxeꞌn, na chin txꞌixwil nin itaꞌn. Baꞌn tcuꞌn yi nink tzilokꞌwok tzꞌacꞌbil wutzaj swuchꞌ tan jakxeꞌn iwutz. Cxmayink tzunwoktz. 19 Ma yi eꞌ yi na chimpekꞌ wetz scyeꞌj, na oc chitzꞌuꞌm waꞌn tan makleꞌn chiwutz. Chaꞌstzun te cꞌasok icꞌuꞌl nin txꞌixpeꞌnwok itajtzaꞌkl tan ixomeꞌn sweꞌj. 20 Bitwok tzaj. Atin tzi puert, nin na chintzan tan cꞌonleꞌn quen. Alchok scyetz yil tbit inwiꞌ nin kol sjakeꞌn yi puert, nocopon tzuntz teꞌj, nin skawank jun tuchꞌ. 21 Cyakil yi eꞌ yil chixcyeꞌ te kacontr, swakꞌeꞌ amaꞌl scyetz tan chicꞌoleweꞌn tzinxlaj tan kacawuneꞌn scyuchꞌ. Yi in wetz ja chinxcyeꞌ te incontr chaꞌstzun te ja chincꞌoleꞌ xlaj Intaj tan cawuꞌn. Iteꞌn nin tzimbneꞌ tziteꞌj kol xcyeꞌwok te kacontr. 22 Ma jaluꞌ, ko at jun yi na el talmaꞌ tan teleꞌn xtxum te yi xtxolbileꞌj tajweꞌn yil tzꞌoc il tan xtxumleꞌn yi mbi na tzan yi Espíritu Sant tan talcheꞌn scyetz cyakil cmon creyent,’ ” stzun iꞌ ban swetz.