Yil tzꞌakꞌlij kꞌej Ryos tcyaꞌj
4
1 Itzun bantz yi nsken wiꞌt aꞌlchij yi xtxolbilaꞌseꞌj swetz, nintzun ben wilol yi jakij yi puertil tcyaꞌj. Nin ben wital junt tir yi wiꞌ yi jun yi nsken cyen jilon swetz. Chin wiꞌ nin iꞌ tan yol, chi wiꞌ jun chun. Itzun saj tlol swetz: “Cajen tzaj tzoneꞌj, nin tzinchajeꞌ tzatz yi mbi xomtzaj yil tzꞌicyꞌ yi eꞌchk takleꞌnaꞌtz yi mawil.” Iteꞌn nin tkujaꞌtz innachoneꞌn te yi at porer yi Espíritu Sant sweꞌj. 2 Ej nin wil jun balaj cꞌolchbil, chi taneꞌn cꞌolchbil jun wiꞌtz ajcaw. 3 Ej nin yi jun yi cꞌolchij tibaj, niꞌcuꞌn yubil wankil chi taneꞌn yubil yi jun jilwutz balaj cꞌub yi na biꞌaj jaspe, tu yi cꞌub yi na biꞌaj cornalina. Ej nin wil solteꞌj yi jun cꞌolchbilaꞌtz yi at jun arco iris, yi wiꞌnin litzꞌuneꞌn chi litzꞌunil yi jun jilwutz cꞌub yi na biꞌaj esmeralda. 4 Ej nin solteꞌj len muꞌẍ yi jun cꞌolchbilaꞌtz wil junak cyajt cꞌolchbil, kale cꞌolẍcheꞌt junak cyaj wiꞌ banl wiꞌ yi sak cuꞌn beꞌch cyetz. Ateꞌn jujun coron chiwiꞌ yi oro cuꞌn. 5 Nin ben wilol te yi jun balaj cꞌolchbilaꞌtz yi wiꞌnin teleꞌn tzaj eꞌchk xlitzꞌ, nin wiꞌnin jincaneꞌn chi na jincan kꞌancyok. Ej nin swutz, at juk txekbil yi na tzan kꞌaꞌkl, yaꞌstzun yi juk espíritu Ryos. 6 Nchaꞌtz wil jun amaꞌl swutz yi cꞌolchbilaꞌtz yi i cunin mar taneꞌn yi piꞌl cuntuꞌ. Niꞌcuꞌn tu spej, yi baꞌn na icyꞌ kawutz tul. Ej nin xlajak yi jun cꞌolchbilaꞌtz wil cyaj ẍchakum Ryos,a yi alaꞌ len bakꞌ chiwutz at te chiwankil. At ẍchiwutz nin at wutz chicoc. 7 Jun scyeri yi eꞌ ẍchakum Ryosaꞌtz i cunin balum. Nin junt i cunin jun mam tor. Ej nin junt niꞌcuꞌn wutz tu wutz wunak, ma yi cyajeꞌn, i cunin jun chin qꞌuilqꞌuitx yi elnak tu liꞌt yi xicyꞌ. 8 Yi cyaj ẍchakum Ryosaꞌtz, at len wukak chixicyꞌ. Nin wutzaj cuntunin teꞌjak chiwankil, nchaꞌtz teꞌjak chixicyꞌ. Skꞌejl tu lakꞌbal quinin na chitaneꞌ tan takꞌleꞌn kꞌej Ryos, nin je chiyoleꞌj:“Santo, santo, santo,
Kajcaw, chin cham nin iluꞌ teruꞌ.
Iẍnin atuꞌ-tz sajleꞌn, nin sbneꞌ opon tunintz.”
9 Ej nin yi jun yi cꞌolchij tib yi jun cꞌolchbilaꞌtz, iꞌtz Ryos, yi jun yi quiꞌc quimbil, tetz ben kꞌej ben sak. 10 Ej nin cyakil nin tir yi na choꞌc yi cyaj chakumaꞌtz tan takꞌleꞌn kꞌej Ryos, nin tan takꞌleꞌn chikꞌajsbil tetz nin tan tyoẍiꞌn tetz, nchaꞌtz yi junak cyaj wiꞌ banl wiꞌ, nin na chimejeꞌ cuꞌn tan takꞌleꞌn kꞌej nin tan cꞌuꞌlajeꞌn Kataj Ryos. Nin na chicyꞌajlen chicoron, nin na cyakꞌ cuꞌn swutz yi cꞌolchbil Kajcaw. Nin je tzun chiyoleꞌj yi na cyal:
11 “Kajcaw, iluꞌ kaRyosil.
Chin tzꞌaknak cunin iluꞌ teruꞌ Taꞌ.
Chin cham nin teruꞌ Taꞌ.
Chaꞌstzun te na katzan tan takꞌleꞌn kakꞌajsbil teruꞌ.
At poreruꞌ tan cawuꞌn.
Chaꞌstzun te na katzan tan takꞌleꞌn kꞌejuꞌ Taꞌ.
Na iluꞌ bnol tetz cyakil yi eꞌchk takleꞌn yi at.
Nin iluꞌ xicyol tetz cyakil,
Ja bnix cyakil tan tuꞌ yi banl talmaꞌuꞌ, nin tan tuꞌ yi yaꞌtz tajbiluꞌ,”
cheꞌch yi junak cyaj wiꞌ banl wiꞌaꞌtz.