Yi jun toloj uꞌj
5
1 Nintzun ben wilol jun toloj uꞌj yi tzꞌamij tan yi jun yi cꞌolchij tibaj yi jun cꞌolchbilaꞌtz. Yi jun toloj uꞌjaꞌtz tzꞌibaꞌn len yi wutz cabil xlaj, nin ocnak lacꞌbaꞌn juk sello tan jopleꞌn.2 Beneꞌn tzun wilol jun ángel yi chin cham nin yi na tzan tan jakleꞌn scyetz cyakil: “¿At peꞌ jun skaxoꞌl yi at kꞌej tan lochꞌeꞌn len yi eꞌchk sello bantz jeꞌn ẍchitpul yi jun toloj uꞌjeꞌj?” 3 Poro quinin jal jun yi atk kꞌej tan jeꞌn ẍchitpul yi jun toloj uꞌjaꞌtz mpe ik tan xmayeꞌn. Quinin jal jun tcyaꞌj nka jun wuxtxꞌotxꞌ, mpe ik jakꞌ txꞌotxꞌ yi at kꞌej tan jakleꞌn yi jun toloj uꞌjaꞌtz. 4 Ej nin tan paj yi cyaꞌl nin jaleꞌt jun yi at kꞌej tan jeꞌn ẍchitpul nin tan siꞌleꞌn yi jun uꞌjaꞌtz, wiꞌnin tzun wokꞌeꞌn wetz, na cyaꞌl jaleꞌt jun mpe ik tan xmayeꞌn quen tuꞌ teꞌj. 5 Jiloneꞌn tzaj tzun jun scyeri yi eꞌ wiꞌ banl wiꞌ swetz, itzun taltz: “Yaj, quil cẍokꞌ, na at jun yi xcyeꞌnak te kacontr. Iꞌtz yi chireyil yi eꞌ aj Judá, yi Balum na aꞌlchij tetz, yi jun xlumil kꞌajtzun rey Luwiy. Baꞌn tzꞌoc iꞌ tan lochꞌeꞌn len yi eꞌchk sello, nin tan jeꞌn ẍchitpul yi jun toloj uꞌjaꞌtz,” stzun iꞌ bantz swetz.
6 Beneꞌn tzun wilol Katxꞌixwatz.a Choꞌn at iꞌ xlaj yi jun balaj cꞌolchbil ẍchixoꞌl yi cyaj ẍchakum yi ateꞌ chinicyꞌal yi junak cyaj wiꞌ banl wiꞌ. At ticyꞌleꞌn chichꞌ teꞌj yi na ẍchaj sketz yi quim iꞌ. Nchaꞌtz wil yi at juk tucꞌ nin juk bakꞌ wutz yi katxꞌixwatzaꞌtz. Yi juk bakꞌ wutzaꞌtz, iꞌtz jun elsawutzil yi juk espíritu Ryos yi chakijt tzaj taꞌn tan xmayeꞌn cyakil yi mbi na bajij wuxtxꞌotxꞌ.
7 Beneꞌn tzun yi Katxꞌixwatzaꞌtz tan ticyꞌleꞌn tzaj yi jun toloj uꞌj, yi tzꞌamij tan yi jun yi cꞌolchij le balaj cꞌolchbil. 8 Ma yi jeꞌn tcyꞌal yi jun toloj uꞌjaꞌtz, chicweꞌn tzun mejlok yi cyaj chakumaꞌtz swutz iꞌ. Nchaꞌtz eꞌ ban yi junak cyaj wiꞌ banl wiꞌ. Cyꞌaꞌn len jujun arpa cyaꞌn. Nchaꞌtz cyꞌaꞌn len jujun patbil incens cyaꞌn yi oro cuꞌn. Yi incens iꞌtz jun elsawutzil yi chi oración yi eꞌ yi ateꞌ tajal Ryos. 9 Nin eꞌ octz tan bitzeꞌn jun acꞌaj bitz. Je chiyoleꞌj:
“Ntin iluꞌ at kꞌejuꞌ tan jeꞌn stzꞌamoluꞌ yi jun toloj uꞌj.
Ntin iluꞌ at kꞌejuꞌ tan lochꞌeꞌn len eꞌchk sello.
Ntin iluꞌ at kꞌejuꞌ, na cuꞌnak biyijuꞌ.
Ej nin tan yi ẍchꞌeluꞌ yi el kojxuj,
ja cheꞌ lokꞌuꞌ jun cꞌoloj wunak ẍchixoꞌl cyakil jilwutz wunak yi ateꞌ beneꞌn tzin wi munt.
Quiꞌc na ban yi mbi jilwutz yolil na chiyol.
Quiꞌc na ban yi mbi jilwutz wunakil eꞌ,
na ja cheꞌ lokꞌuꞌ chicyakil tan yi ẍchꞌeluꞌ.
10 Nin iluꞌ nchoꞌcsan tetz rey nin tetz paleꞌ tan chixconeꞌn swutz kaRyosil, nin tan chicawuneꞌn beneꞌn tziꞌn wi munt,”
—cheꞌch yi junak cyaj wiꞌ banl wiꞌaꞌtz.
11 Beneꞌn tzun wilol jun cꞌoloj ángel yi ateꞌ wutz chicoc yi eꞌ wiꞌ banl wiꞌaꞌtz scyuchꞌ yi eꞌ chakum yi ateꞌ xlaj yi cꞌolchbil. Jat loꞌ millón chixoneꞌn. 12 Chin chiwiꞌ nin tan yol. Itzun cyaltz:
“¡At wiꞌnin kꞌej yi jun chitxꞌixwatz wunakeꞌj yi ncuꞌ biyij.
At kꞌej iꞌ tan toqueꞌn tan cawuꞌn.
At kꞌej iꞌ tan tetzal cyakil mebiꞌl.
Na chin tzꞌaknak cuꞌn iꞌ tu tajtzaꞌkl.
Chin cham nin iꞌ.
Baꞌn kakꞌ kꞌej iꞌ.
Baꞌn kakꞌ kakꞌajsbil swutz iꞌ!”
—cheꞌch yi jun cꞌoloj ángelaꞌtz.
13 Nchaꞌtz wit yi chiwiꞌ cyakil jilwutz txuc yi bnixnakeꞌ tan Ryos. Na ja wit chiwiꞌ cyakil yi eꞌ yi ateꞌ tcyaꞌj, scyuchꞌ yi eꞌ yi ateꞌ wuxtxꞌotxꞌ nin scyuchꞌ cyakil yi eꞌ yi ateꞌ xe mar. Nin je chiyoleꞌj:
“¡Kakꞌeꞌ kakꞌajsbil tetz yi jun yi cꞌolchij tibaj yi jun balaj cꞌolchbileꞌj.
Kakꞌeꞌ kakꞌajsbil tetz yi txꞌixwatz yi at xlaj.
Kakꞌeꞌ chikꞌej na chin cham nin eꞌ.
Kabitzink ẍchiwutz, na at chikꞌej tetz ben kꞌej ben sak!” —cheꞌch tzun bantz.
14 Itzun yi quibital yi cyaj chakum yi eꞌchk yolaꞌseꞌj, nintzun cyaltz: “Amén. Yaꞌstzunk sbantz,” cheꞌch. Ma yi eꞌ wiꞌ banl wiꞌ nintzun eꞌ cuꞌ mejlok nin eꞌ octz tan cꞌuꞌlajeꞌn yi jun yi quil sotz tetz ben kꞌej ben sak.