Yi juk sello
6
1 Beneꞌn tzun wilol yi toqueꞌn yi Katxꞌixwatz tan lochꞌeꞌn len jun scyeri yi juk sello. Ej nin wit yi jiloneꞌn jun scyeri yi eꞌ chakum. Chumam nin wiꞌ ban tan yol. Niꞌcuꞌn chi na jincan kꞌancyok. Itzun taltz: “¡Catzam tzoneꞌj!” 2 Beneꞌn tzun wilol jun chej yi sak teꞌj. Ej nin yi jun yi ateꞌn te yi chejaꞌtz, cyꞌaꞌn jun maꞌcl taꞌn yi na biꞌaj arco yi xconak taꞌn tetz oyintziꞌ. Nin akꞌlij jun coron tetz yi na ẍchaj yi iꞌ aj txꞌaconl. Beneꞌn tzun iꞌ tan oyintziꞌ, nin xcyeꞌ te yi eꞌ contr. Nin inin tunin ban iꞌ-tz, cyaꞌl nin jun na xcyeꞌ quen teꞌj.3 Yi toqueꞌn yi Katxꞌixwatz tan lochꞌeꞌn len yi caꞌp sello, jiloneꞌn tzaj tzun yi caꞌp chakum. Itzun taltz: “¡Catzam tzoneꞌj!” 4 Beneꞌn tzun wilol junt chej yi cyak teꞌj. Nin akꞌlij amaꞌl tetz yi jun yi ateꞌn te yi jun chejaꞌtz tan toqueꞌn tan xiteꞌn yi tzatzin paz yi at wi munt. Oc iꞌ tan cꞌopeꞌn quen le chiwiꞌ wunak tan chibiyol quib squibil quib. Ej nin akꞌlij jun chin spar tetz.
5 Yi toqueꞌn Katxꞌixwatz tan lochꞌeꞌn len yi toxiꞌn sello, jiloneꞌn tzun yi toxiꞌn ẍchakum Ryos. Itzun taltz: “¡Catzam tzoneꞌj!” Beneꞌn tzun wilol junt chej yi kꞌek teꞌj. Ej nin yi jun yi ateꞌn teꞌj, cyꞌaꞌn jun pẍuꞌbil taꞌn. 6 Nin ben wital jun yi jiloneꞌn tzaj chixoꞌl yi cyaj ẍchakum Ryos yi ateꞌ-tz, itzun taltz: “Tul tzꞌel quen tuꞌ yi jamel kꞌej jun yaj tan lokꞌcheꞌn cob liwr ixiꞌn triw, ma yi cebada kak ntziꞌ liwr. Pyor yi vino tu yi aceit tetz cumir, quiꞌt ljal.”
7 Yi toqueꞌn yi Katxꞌixwatz tan lochꞌeꞌn len yi cyajiꞌn sello, jiloneꞌn tzun yi cyajiꞌn chakum. Itzun taltz: “¡Catzam tzoneꞌj!” 8 Beneꞌn tzun wilol junt chej yi way teꞌj. Ej nin yi jun yi ateꞌn teꞌj na biꞌaj Quimichil. Ej nin ateꞌn junt wutz coc iꞌ, yi na biꞌaj taw yi amaꞌl kale ateꞌt yi eꞌ almaꞌ. Inti yi bajx yi ateꞌn te chej akꞌlij amaꞌl tetz tan toqueꞌn tan chibiyleꞌn cuꞌn jun cuarto tetz yi tajlal yi eꞌ wunak yi najlcheꞌ wi munt. Nin akꞌlij amaꞌl tetz tan chixuxeꞌn wunak tan cyoqueꞌn tan oyintziꞌ bantz chibiyol quib squibil quib. Nchaꞌtz at eꞌ eꞌ quim tan weꞌj. Nin at eꞌ eꞌ quim tan yabil. Ej nin at eꞌ eꞌ quim tan smaron txuc.
9 Yi toqueꞌn yi Katxꞌixwatz tan lochꞌeꞌn len yi toꞌiꞌn sello beneꞌn tzun wilol yi eꞌ almaꞌ yi quimnakeꞌ tan paj xtxoleꞌn yi tajbil Ryos. Choꞌn ateꞌ jak yi altar yi at tcyaꞌj. Ja chibiylij tan paj yi cyoqueꞌn tan xtxoleꞌn yi mbi na cyocsaj. 10 Chin chiwiꞌ nin eꞌaꞌtz tan yol. Itzun na cyaltz: “Kajcaw chin xan nin iluꞌ. Nin na el kꞌabuꞌ te yoluꞌ. ¿Tonaꞌ tzun tzꞌocuꞌ tan chicawseꞌn yi eꞌ yi ateꞌ wuxtxꞌotxꞌ, yi eꞌ yi ocnakeꞌ tan kabiyleꞌn?” —cheꞌch.
11 Nintzun akꞌlij jujun beꞌch cyetz yi sak yubil, nin oc scyeꞌj. Ej nin aꞌlchij scyetz yi tajweꞌn tan cyujeweꞌn jun tkuj jalen cuꞌn jepon cyajlal yi eꞌ yi at chiquimbil tan tuꞌ yi xomcheꞌ te Cristo, yi eꞌ yi ẍchiquimok chi nchiban cyetz.
12 Beneꞌn tzun wilol yi toqueꞌn Katxꞌixwatz tan lochꞌeꞌn len yi kakiꞌn sello. Xeꞌteꞌn tzun jun chin wutzileꞌn coblajnob. Nin oc tzꞌoꞌtz wutz yi kꞌej. Chin tzꞌoꞌtz nin bantz. Ej nin chin cyak nin ban wutz yi xaw, chi yubil chichꞌ. 13 Ma yi txꞌuml yi ateꞌ tcyaꞌj eꞌ baj saj txꞌakx. Choꞌn cunin ban chi na ban jun wiꞌ loꞌbaj yi na cuꞌ txꞌakx yi tal neꞌẍ wutz tan jun chin wutzileꞌn cyekꞌekꞌ. 14 Ej nin yi tcyaꞌj tzajt cuntunin chi na toleꞌn tib jun uꞌj. Ej nin cyakil yi eꞌchk wutz tu yi eꞌchk isla baj el len tulak eꞌchk chiluwar kale ateꞌt. 15 Ej nin cyakil yi eꞌ rey yi ateꞌ wuxtxꞌotxꞌ scyuchꞌ yi eꞌ yi wiꞌnin chikꞌej, scyuchꞌ yi eꞌ ric, scyuchꞌ yi eꞌ cham, nin cyakil yi eꞌ esclaw scyuchꞌ yi eꞌ yi na chicaw quib chichuc, cyakil yi eꞌaꞌtz eꞌ baj len cyewal quib xoꞌl cꞌub nin lakak picy, xoꞌlak wutz. 16 Wiꞌnin cweꞌn chitziꞌ tetz yi eꞌchk wutz tu eꞌchk cꞌub kale cyewaneꞌt quib. Itzun cyaltz: “¡Niloꞌnk tzaj skibaj tan keweꞌn swutz yi jun yi cꞌolchij tib yi jun balaj cꞌolchbil! ¡Niloꞌnk tzaj skibaj bantz keleꞌn swutz yi jun chin wutzileꞌn qꞌuixcꞌuj yi tzꞌul tan yi jun yi takꞌnak tib tetz chitxꞌixwatz wunak! 17 ¡Niloꞌnk tzaj skibaj na ja ul yi kꞌejlalaꞌtz tan ticyꞌsal Ryos cꞌuꞌl skeꞌj! ¡Cyaꞌl jun yi nink xtxꞌaj yi jun cawsaꞌtz!”