Yi jun cient tu caꞌwnak cyaj mil wunak yi baj oc len cyechl
7
1 Itzun bantz yi wiꞌt bajeꞌn yi eꞌchk xtxolbilaꞌtz, nintzun ben wilol cyaj ángel yi txicl cheꞌ-tz. Choꞌn ateꞌ xtxꞌuꞌcak yi munt. Eꞌ makol tetz yi cyaj tojkbil cyekꞌekꞌ. Quinin cyakꞌ amaꞌl tan sajeꞌn yi eꞌchk cyekꞌekꞌaꞌtz wuxtxꞌotxꞌ, wi mar, mpe ik te jun wiꞌ tzeꞌ.2 Nchaꞌtz bent wilol junt ángel yi choꞌn sajeꞌn jalen teleꞌn tziꞌn. Cyꞌaꞌn yi sello Ryos taꞌn, yi Ryos yi itzꞌ nin tetz. Chin wiꞌ nin tzun yi jun ángelaꞌtz bantz tan yol scyetz yi cyajt ángel yi ateꞌ xtxꞌuꞌcak yi munt, yi eꞌ yi akꞌlij porer scyetz tan poꞌtzeꞌn yi wuxtxꞌotxꞌ tu yi mar. Itzun taltz scyetz: 3 “Quil choꞌc chanuꞌ tan poꞌtzeꞌn yi wuxtxꞌotxꞌ tu yi mar mpe junk wiꞌ tzeꞌ, jalen yil tzꞌoc jun cyechl yi eꞌ ẍchakum yi kaRyosil kaꞌn, na tzꞌocopon jun cyechl kaꞌn swutzak chiplaj.
4 Beneꞌn tzun wital yi cyajlal yi eꞌ yi oc cyechl scyeꞌj. Iꞌtz jun cient tu caꞌwnak cyaj mil wunak. Yi jun cꞌoloj wunakaꞌtz choꞌn chijaleꞌn ẍchixoꞌl yi eꞌ xonl Israel.
5 Coblaj mil oc cyechl ẍchixoꞌl yi eꞌ xonl Judá. Nin coblaj mil ẍchixoꞌl yi eꞌ xonl Rubén. Nin coblaj mil ẍchixoꞌl yi eꞌ xonl Gad.
6 Nin coblaj mil ẍchixoꞌl yi eꞌ xonl Aser. Nin coblaj mil ẍchixoꞌl yi eꞌ xonl Neftalí. Nin coblaj mil ẍchixoꞌl yi eꞌ xonl Manasés.
7 Nin coblaj mil ẍchixoꞌl yi eꞌ xonl Simón. Nin coblaj mil ẍchixoꞌl yi eꞌ xonl Leví. Nin coblaj mil ẍchixoꞌl yi eꞌ xonl Isacar.
8 Nin coblaj mil ẍchixoꞌl yi eꞌ xonl Zabulón. Nin coblaj mil ẍchixoꞌl yi eꞌ xonl Ẍep. Nin coblaj mil ẍchixoꞌl yi eꞌ xonl Benjamín.
Yi jun chin cꞌoloj wunak yi sak cuꞌn beꞌch cyetz
9 Itzun bantz yi wiꞌt bajeꞌn yi xtxolbilaꞌseꞌj, beneꞌn tzun wilol jun chin cꞌoloj wunak yi sak cuꞌn beꞌch cyetz. Jilwutz cuꞌn wunak ateꞌ-tz. At tetz cyakil jilwutz nación, nin tetz cyakil jilwutz tnum, nin tetz cyakil jilwutz yol yi na chiyolbej beneꞌn tziꞌn wi munt. Cyakil yi jun cꞌoloj wunakaꞌtz txicl cheꞌ swutz yi jun cꞌolchbilaꞌtz nin swutz yi Katxꞌixwatz. Cyꞌaꞌn len jujun xak xaꞌj cyaꞌn. Ej nin qui nin ajlbeꞌn cyetz yi jun cꞌoloj wunakaꞌtz. 10 Chin chiwiꞌ nin tzun bantz tan takꞌleꞌn chikꞌajsbil tetz Ryos, itzun cyaltz:
“Ja kaclax tan tuꞌ porer kaRyosil yi cꞌolchij wi balaj cꞌolchbil nin tan porer yi Katxꞌixwatz,”
cheꞌch yi jun cꞌoloj wunakaꞌtz.
11 Ma yi eꞌ ángel yi txicl cheꞌ ẍchixlaj yi eꞌ wiꞌ banl wiꞌ, nin ẍchixlaj yi cyaj ẍchakum Ryos yi ateꞌ solteꞌj yi jun chumbalaj cꞌolchbilaꞌtz, eꞌ baj cuꞌ joklok tan cꞌuꞌlajeꞌn Ryos. 12 Itzun cyaltz:
“¡Amén! Kakꞌeꞌ kakꞌajsbil tetz Kataj.
Kakꞌeꞌ kꞌej iꞌ na chin tzꞌaknak cuꞌn iꞌ.
Katyoẍink tetz, na wiꞌnin kꞌej iꞌ.
Wiꞌnin porer iꞌ, nin chin cham nin iꞌ
tetz ben kꞌej ben sak. Amén,”
cheꞌch eꞌ ángelaꞌtz.
13 Sajeꞌn tzun jakol jun scyeri yi eꞌ wiꞌ banl wiꞌ swetz, i tzun taltz: “Yi wunakeꞌj yi sak cuꞌn beꞌch cyetz, ¿na peꞌ el atxum tetz yi naꞌ scyetz eꞌ nin naꞌ nchisiteꞌt?” 14 “Quiꞌ Taꞌ, qui wajskeꞌn chiwutz. Ntin iluꞌ teruꞌ na el xtxumuꞌ tetz yi naꞌ scyetz eꞌ nin naꞌ nchisiteꞌt,” chinch wetz bantz. “Yaꞌstzun yi eꞌ yi ja chimucꞌ nin yi ja icyꞌpon yi jun chin wutzileꞌn qꞌuixcꞌuj cyaꞌn. Yaꞌstzun yi eꞌ yi txꞌajijt yi beꞌch cyetz, nin chin skoj nin ban tan ẍchꞌel yi Katxꞌixwatz.
15 “Chaꞌstzun te ateꞌ tzoneꞌj swutz yi cꞌolchbil Ryos.
Skꞌejl tu lakꞌbal na chitzan tan cꞌuꞌlajeꞌn iꞌ tzoneꞌj le amaꞌl yi chin xan nin.
Ej nin ẍchicolxok tan yi porer yi jun yi cꞌolchij.
16 Quiꞌt chitij weꞌj. Quiꞌt chitij saktziꞌ.
Quiꞌt chitij kꞌej. Nin quiꞌct tzꞌaꞌ ẍchitijeꞌ.
Quiꞌct chitij jun qꞌuixcꞌuj.
17 Quiꞌt chitij qꞌuixcꞌuj.
Na yi Katxꞌixwatz yi at xlaj yi jun balaj cꞌolchbileꞌj, iꞌ qꞌuicyꞌlom cyetz.
Ẍcheꞌ qꞌuicyꞌleꞌ chi na ban jun pstor tan chiqꞌuicyꞌleꞌn yi eꞌ tetz tawun.
Nchiben tcyꞌal kale atit jun balaj aꞌ yi na takꞌ itzꞌajbil.
Iteꞌn nin Ryos tzꞌocopon tan seleꞌn tꞌaꞌal chiwutz.
Nin quiꞌct bis oꞌkl tzꞌul ẍchiwutz.”