Yi jukiꞌn sello tu yi patbil incens yi oro cuꞌn
8
1 Itzun yi toqueꞌn Katxꞌixwatz tan lochꞌeꞌn len yi jukiꞌn sello yi at te yi jun toloj uꞌjaꞌtz, quiꞌc nin jun jumiꞌn bajij tcyaꞌj. Numl cuntuꞌ bantz tetz meꞌ loꞌ or.2 Beneꞌn tzun wilol jukt ángel yi txicl cheꞌ swutz Ryos. Nin akꞌlij jujun chun scyetz. 3 Tuleꞌn tzaj tzun junt ángel yi cyꞌaꞌn jun patbil incens taꞌn yi oro cuꞌn. Choꞌn tzun xcyeweꞌn cuꞌn swutz yi altar yi oro cuꞌn. Ej nin akꞌlij wiꞌnin incens tetz tan pateꞌn wi yi jun altaraꞌtz yi at swutz yi cꞌolchbil Ryos. 4 Akꞌlij yi incensaꞌtz tetz tan pateꞌn bantz tponeꞌn yi sibel tuml chiꞌoración cyakil yi eꞌ xansaꞌncheꞌ swutz Ryos. 5 Cweꞌn tzun nojsal yi ángelaꞌtz yi patbil incens tan xtxakꞌakꞌ yi at tib yi altar nintzun saj joꞌliltz wuxtxꞌotxꞌ. Yi cweꞌn muleꞌn wuxtxꞌotxꞌ ja xeꞌtij jun chin wutzileꞌn coblajnob, nin wiꞌnin kꞌancyok tu xlitzꞌ baj cuꞌ, nin wiꞌnin jincaneꞌn ban.
Yi toqueꞌn yi eꞌchk chun
6 Itzun yi juk ángelaꞌtz yi nsken baj akꞌlij yi jujun chun scyetz nintzun eꞌ ban list quib tan tocseꞌn yi chun.
7 Yi toqueꞌn yi chun tan yi bajx ángel, cweꞌn tzun jun chin cꞌub abal wuxtxꞌotxꞌ. Yujuꞌn tib yi cꞌub abal tu kꞌakꞌ nin chichꞌ. Wiꞌnin tzun amaꞌl tzꞌeꞌ beneꞌn tziꞌn wuxtxꞌotxꞌ. Txant nin qui nicyꞌan cyakil yi wuxtxꞌotxꞌ. Nchaꞌtz wiꞌnin eꞌchk tzeꞌ tzꞌeꞌ. Txant nin qui nicyꞌan cyakil. Ma yi txaꞌx chꞌim, tircuꞌn stzꞌeꞌeꞌn.
8 Ma toqueꞌn yi caꞌp ángel tan tocseꞌn yi tetz chun, sajeꞌn tzun joꞌliꞌn jun takleꞌn chi jun chumam wutz yi na tzan kꞌaꞌkl. Choꞌn cweꞌn wi mar. Yi cweꞌn, nim cunin mar oc tetz chichꞌ. Txant qui nicyꞌan cyakil yi mar taꞌn. 9 Wiꞌnin tzun txuc eꞌ quim xe mar. Nchaꞌtz wiꞌnin barc nchiloꞌon. Txant qui nicyꞌan yi tajlal yi eꞌchk barc yi baj loꞌon. 10 Ma yi toqueꞌn yi toxiꞌn ángel tan tocseꞌn yi tetz chun, sajeꞌn tzun txꞌakx jun chumam txꞌuml tcyaꞌj yi na tzan kꞌaꞌkl. Choꞌn cweꞌn tibaj yi eꞌchk tzanlaꞌ tu eꞌchk tal aꞌ yi na mulkꞌineꞌl tzaj lakak eꞌchk luwar. 11 Yi biꞌ yi jun txꞌumlaꞌtz iꞌtz cꞌaꞌ. Na chin cꞌaꞌ nin ban yi aꞌ taꞌn. Wiꞌnin aꞌ poꞌtij tan yi jun txꞌumlaꞌtz. Nin wiꞌnin wunak eꞌ baj quim yi bajeꞌn yi jun aꞌaꞌtz cyaꞌn, na chin xkolum nin ban yi aꞌ.
12 Ma yi cyajiꞌn ángel, nintzun oc yi tetz chun taꞌn. Kꞌekaxeꞌn nintzun ban yi kꞌej. Txant nin qui nicyꞌan tan kꞌekal. Nchaꞌtz iteꞌn nin bajij te yi xaw. Nin wiꞌnin txꞌuml quiꞌt nchitxekun mas. Ja tzun tzꞌoꞌtzax muꞌẍ yi wuxtxꞌotxꞌ. Nin nchaꞌtz nin ban lakꞌbal yi xaw tu eꞌchk txꞌuml, quiꞌct mas ntxekun.
13 Beneꞌn tzun wilol junt ángel yi na xicyꞌin tcyaꞌj chi na ban jun qꞌuilqꞌuitx. Ej nin je yol iꞌeꞌj yi ntal: “¡Lastum yi eꞌ wunak yi ateꞌ wuxtxꞌotxꞌ! ¡Lastum yi eꞌ wunak! ¡Lastum eꞌ! Na chin xoꞌwbil nin sbneꞌ yil tzꞌoc yi oxt chun cyakꞌun yi oxt ángel.”