9
1 Ma yi toqueꞌn yi toꞌiꞌn ángel tan tocseꞌn yi tetz chun, nintzun ben wilol jun txꞌuml yi nsken ul txꞌakx wuxtxꞌotxꞌ, yi choꞌn nsaj tcyaꞌj. Nintzun akꞌlij yi laweꞌil yi jul yi chin xeꞌ nin, tetz. 2 Toqueꞌn tzun iꞌ-tz tan jakleꞌn yi puertil yi jun chin julaꞌtz. Ma yi jeꞌn jakol, teleꞌn tzaj tzun juc jun cꞌoloj sib, chi na el te jun patbil xcꞌoꞌn. Cuꞌ tunin jopx wuxtxꞌotxꞌ tan yi jun cꞌoloj sibaꞌtz. Ej nin quiꞌt nin quil wunak wutz kꞌej. 3 Ej nin tcꞌuꞌl yi jun chin sibaꞌtz yaꞌstzun eꞌ eltzit jun chin cꞌoloj txuc chi taneꞌn sacꞌ. Eꞌ baj el tunin xit beneꞌn tziꞌn wuxtxꞌotxꞌ. Akꞌlij len quipisyoꞌ tan chiꞌoꞌn chi na chiban sinaꞌj. 4 Poro nin aꞌlchij scyetz yi quiꞌc cu tan bajeꞌn yi chꞌim cyaꞌn nka alchok jilwutz xtzeꞌ nka alchok jilwutz xak tzeꞌ. Ma na ntin at cu tan cyoqueꞌn tan chichiꞌleꞌn yi eꞌ wunak yi quiꞌc techl Ryos wutz chiplaj. 5 Nchaꞌtz quinin akꞌlij amaꞌl scyetz tan chibiyleꞌn cuꞌn yi eꞌ wunak, ma na ntin tan takꞌleꞌn qꞌuixcꞌuj scyetz tetz oꞌ xaw. Ej nin yi qꞌuixcꞌuj yi nchitij niꞌcuꞌn tꞌaꞌweꞌn tu ẍchiꞌbeꞌn jun sinaꞌj.6 Yil tzꞌul yi jun tiempaꞌtz ẍchicꞌucheꞌ wunak quimichil. Poro quil chiquim.
7 Niꞌcuꞌn quitaneꞌn yi eꞌ sacꞌaꞌtz chi quitaneꞌn chej yi wekijcheꞌ tan oyintziꞌ. Ej nin at len jun eꞌchk takleꞌn ẍchiwiꞌ yi niꞌcuꞌn tu jun coron yi oro cuꞌn. Nin i cunin wutz wunak yi chiwutz. 8 Ma yi xiꞌil chiwiꞌ, chin tkan nin, chi taneꞌn xiꞌil wiꞌ xnaꞌn. Ma yi cyeꞌ i cunin teꞌ balum. 9 Ej nin jokl quen jujun eꞌchk takleꞌn wutz chicꞌuꞌl tan chicolol quib. I cunin jun jokoj chꞌichꞌ taneꞌn. Ej nin yi chixicyꞌ, wiꞌnin xumcaneꞌn. I cunin yi na xumcan jun cꞌoloj careꞌt yi jutuꞌn tan jun cꞌoloj chej yi na chiben lajkeꞌl tan oyintziꞌ. 10 Yi eꞌ sacꞌaꞌtz, niꞌcuꞌn chijeꞌ chi jeꞌ sinaꞌj, na i cunin bak taneꞌn chijeꞌ. Nin akꞌlij amaꞌl scyetz tan cyoqueꞌn tan chichiꞌleꞌn wunak tetz oꞌ xaw. 11 Ej nin at jun cyajcawil yi eꞌ sacꞌaꞌtz. Iꞌtz yi ángel yi najlij tjul, yi na biꞌaj Abadón le chiyol yi eꞌ hebreo. Ma le chiyol yi eꞌ griego na biꞌaj Apolión, yi na elepont aj xitunl.
12 Yaꞌstzun yi bajx qꞌuixcꞌuj yi sbajok, poro at cobt yi at tulbil.
13 Ma yi toqueꞌn yi kakiꞌn ángel tan tocseꞌn yi tetz chun, nintzun ben wital wiꞌ jun yi choꞌn jiloneꞌn tzaj txoꞌl yi cyaj tucꞌ yi at te yi altar, yi oro cuꞌn, yi at swutz Ryos. 14 Nin je tal iꞌeꞌj tetz yi kakiꞌn ángel yi cyꞌaꞌn chun taꞌn: “Cun pujweꞌ yi cyaj ángel yi cꞌalij cheꞌ tzi yi jun chumam aꞌ yi na biꞌaj Eufrates.”
15 Beneꞌn nintzun bantz tan chipujleꞌn len yi cyaj ángelaꞌtz, na bixbaꞌnt cheꞌ tan chixconeꞌn tetz yi jun tiempaꞌtz. Bixbaꞌn cheꞌ tan chixconeꞌn tetz yi jun xawaꞌtz, tu yi jun kꞌejaꞌtz, nin yi jun oraꞌtz. Yi cyetz chitarey iꞌtz tan chibiyleꞌn cuꞌn wiꞌnin wunak. Txant nin qui nicyꞌan yi wunak yi ateꞌ wuxtxꞌotxꞌ yi eꞌ quim cyakꞌun. 16 Ma chisanlar yi eꞌ ángelaꞌtz, nin ben wital yi cyajlal yi eꞌ sanlar yi ateꞌ te chej. Iꞌtz cob cient millón chixoneꞌn.
17 Ej nin je quitaneꞌn yi eꞌ chejaꞌtz scyuchꞌ yi eꞌ sanlar yi ateꞌ te chej. Yi yubil yi jujun jokoj chꞌichꞌ yi at len wutz chicꞌuꞌl yi eꞌ sanlar iꞌtz cyak, tu txaꞌx, tu kꞌan. Ej nin yi eꞌ chej i cunin wiꞌ balum taneꞌn chiwiꞌ. Ej nin le chitziꞌ na el tzaj kꞌakꞌ tu sib, nin azufre. Yaꞌstzun yi xtxolbil yi wil tul wutzicyꞌ taneꞌn. 18 Ej nin wiꞌnin wunak eꞌ quim tan yi kꞌakꞌ tu sib nin yi azufre. Txant qui nicyꞌan cyakil wunak wi munt yi eꞌ quim takꞌun yi ox jilwutz takleꞌnaꞌtz yi meꞌl tzaj le chitziꞌ yi eꞌ chej. 19 Na ja chixcyeꞌ yi eꞌ chejaꞌtz tan chibiyleꞌn wunak tan yi kꞌakꞌ tu yi sib tu yi azufre yi el tzaj le chitziꞌ. Nchaꞌtz wiꞌnin wunak eꞌ quim tan chijeꞌ. Na yi chijeꞌ i cunin lubaj taneꞌn yi nim wiꞌ. Xcon yi chijeꞌ tan chibiyleꞌn wiꞌnin wunak.
20 Ma yi eꞌ wunak yi quinin eꞌ quim tan yi ox cawsaꞌtz yi akꞌlij, quinin chitxꞌixpuj cyajtzaꞌkl. Iẍnin na chitzan tan banleꞌn yi eꞌchk takleꞌn cachiꞌ. Ej nin quinin cyaj quilol yi cꞌuꞌlajeꞌn yi eꞌchk takleꞌn yi banij quitaneꞌn, ma na eꞌ ban seguir tan mejleꞌn swutz eꞌchk chiryosil yi oro, nka sakal, nka bronce tuꞌ, nka cꞌub nka tzeꞌ tuꞌ. Eꞌ mejeꞌ swutz eꞌchk chiryosilaꞌtz yi qui na xmayin, yi qui na tbit yol, nin yi qui na xon. 21 Nchaꞌtz quinin cyaj cyen quilol yi biyolnakiꞌn tu cunaꞌn. Ej nin quinin cyaj cyen quilol yi xnaꞌniꞌn tu yajiꞌn, tu eꞌchk alakꞌ.