Yi ángel yi cyꞌanl tetz yi tal liwr
10
1 Beneꞌn tzun wilol junt ángel yi chin cham nin, yi choꞌn sajeꞌn tcyaꞌj tul sbakꞌ. Ej nin ateꞌn jun arco iris twiꞌ. Ma yi wutz iꞌ chin litzꞌunin chi na litzꞌun yi kꞌej. Ej nin yi tkan iꞌ chin txekunin chi taneꞌn kꞌakꞌ. 2 Cyꞌaꞌn jun tal toloj uꞌj taꞌn yi elnakt ẍchitpul. Itzun yi cweꞌn muleꞌn choꞌn tzun cweꞌn tkꞌol jalaj tkan yi sbal wi mar. Ma yi max choꞌn cweꞌn tkꞌol wuxtxꞌotxꞌ. Nintzun xcyeꞌ cuꞌntz. 3 Chin wiꞌ nin tzun bantz tan yol, chi na ẍchꞌin jun león. Itzun yi wiꞌt jiloneꞌn yi jun ángelaꞌtz nintzun nilcan juk kꞌancyok. 4 Itzun yi nsken wit chiyol yi juk kꞌancyokaꞌtz, woqueꞌn tzun kloꞌ tan stzꞌibeꞌn cuꞌn yi mbi cuꞌn baj cyalol. Poro ja wit junt yi choꞌn jiloneꞌn tzaj tcyaꞌj. Itzun taltz swetz: “Quil tzatzꞌib cuꞌn chiyol yi juk kꞌancyokaꞌtz, ma na aꞌtok cuntuꞌ tacꞌuꞌl.”5 Inti yi ángel yi at cuꞌn yi jalaj tkan wi mar nin yi jalajt wuxtxꞌotxꞌ, jeꞌn tzun tkꞌol yi kꞌab tcyaꞌj. 6 Itzun taltz: “Sak swutz yi jun yi at cuntunintz cyakil tiemp, yi jun yi bnol tetz yi tcyaꞌj tu yi wuxtxꞌotxꞌ, tu yi mar tu cyakil yi mbi cunin at beneꞌn tziꞌn. Sak swutz iꞌ yi bintzi nin yi yoleꞌj yi swaleꞌ. 7 Yil tzꞌoc yi jukiꞌn ángel tan tocseꞌn yi chun yi cyꞌaꞌn taꞌn, yaꞌstzun yi techl yi ja wiꞌt jepon tampuj yi tiemp yi bixbaꞌnt tan Ryos tan teleꞌn cuꞌn te cyakil yi eꞌchk takleꞌn yi alijt cyen taꞌn scyetz yi eꞌ elsanl stziꞌ iꞌ.”
8 Beneꞌn tzun wital junt tir yi yol yi jun yi choꞌn jiloneꞌn tzaj swetz tcyaꞌj. Itzun taltz: “Cun cyꞌaj yi jun tal liwr yi cyꞌaꞌn tan yi ángel yi at jalaj tkan wi mar nin yi jalajt wuxtxꞌotxꞌ,” stzun iꞌ bantz swetz.
9 Imbeneꞌn tzuntz swutz yi ángelaꞌtz nin oc injakol yi tal liwr tan tkꞌol iꞌ swetz. Itzun taltz: “Jeꞌj, tzꞌamaj, nin bajseꞌn. Chin chiꞌ nin sbneꞌ yil tzꞌocopon le atziꞌ. Ma yil tzꞌopon tacꞌuꞌl, chin cꞌaꞌ nin sbneꞌ.”
10 Sajeꞌn tzun intzꞌamol yi tal liwraꞌtz nin jeꞌ imbajsaltz. Chin cab nin yi tocomponeꞌn le intziꞌ, i cunin cabil wunak txuc. Poro yi cweꞌn pon le incꞌuꞌl, chin cꞌaꞌ nin ban. 11 Sajeꞌn tzun alijt swetz: “Tajweꞌn tan atxolil junt tir yi mbi sbajok scyeꞌj cyakil jilwutz wunak, nin scyeꞌj eꞌchk nación yi aparchklen chijilon. Nchaꞌtz tajweꞌn tan atxolil yi mbi sbajok scyeꞌj yi eꞌ rey,” stzun iꞌ ban swetz.