Yi cob balaj stiw
11
1 Sajeꞌn tzun takꞌleꞌn jun maꞌlbil swetz, chi taneꞌn jun waꞌj aj. Itzun aꞌlchij swetz: “Txiclijeꞌn, cun maꞌlaj yi amaꞌl yi mas xan yi at xe caꞌl Ryos, tuml yi amaꞌl kale atit yi altar. Ej nin ajlweꞌ jatnaꞌ chixoneꞌn yi eꞌ yi na chitzan tan cꞌuꞌlajeꞌn Ryos tul yi jun amaꞌlaꞌtz. 2 Poro qui na waj yil cẍoꞌc tan maꞌleꞌn yi amaꞌl yi at solteꞌj yi jun luwaraꞌtz na tzꞌakꞌlok amaꞌl scyetz yi eꞌ awer nak, tan chibnol yi cyetz cyajbil tcꞌuꞌl. Nchaꞌtz stzꞌakꞌlok amaꞌl scyetz tan telseꞌn kꞌej yi tnum yi wiꞌnin xanil. Tul caꞌwnak cob xaw ẍchibneꞌ yi cyetz cyajbil tul yi jun amaꞌlaꞌtz nin tul yi tnumaꞌtz. 3 Poro nchiben inchakol cob instiw tan xtxoleꞌn yi wetz wajbil scyetz yi wunak yi najlcheꞌ-tz le jun tnumaꞌtz. Ẍchitxoleꞌ yi wetz wajbil scyetz tul jun mil tu cob cient tu ox cꞌal kꞌej. Ej nin yi beꞌch cyetz yi cob instiwaꞌtz iꞌtz yi beꞌchok yi na ẍchaj bis.”4 Ej nin yi cob stiwaꞌtz yaꞌstzun yi cob wiꞌ olivo tu yi cob txekbil yi ateꞌ swutz Kajcaw yi taw wuxtxꞌotxꞌ.a 5 Ej nin cyakil yi eꞌ yi ẍchijoyeꞌ puntil tan chibiyleꞌn cuꞌn, ẍchiquimok cyaꞌn, na tzꞌelepon kꞌakꞌ le chitziꞌ tan chibiyleꞌn cyakil chicontr. 6 Nchaꞌtz stzꞌakꞌlok caꞌwl scyetz tan makleꞌn yi abal, nin ẍchixcyek tan xtxꞌixpeꞌn yi aꞌ tetz chichꞌ. Ej nin ko na cyaj, baꞌn tzꞌul alchok jilwutz chicaws yi eꞌ wunak cyakꞌun. 7 Poro yil chixcyeꞌ te chimunl yi tzꞌakꞌlok scyetz, tzꞌocopon yi yaj yi txuc taneꞌn yi choꞌn jeꞌ ul tjul tan oyintziꞌ scyeꞌj. Ej nin xcyek tan chibiyleꞌn cuꞌn. 8 Tul cyaj tuꞌ chiwankil tbeꞌ, tul yi jun chumam tnum yi at na ban cuꞌnt na aꞌlchij Sodoma nka Egipto tetz. Yi jun tnumaꞌtz iꞌtz kale quimeꞌt Kajcaw swutz pasyon. 9 Cyakil jilwutz wunak yi ateꞌ beneꞌn tziꞌn wi munt squileꞌ chiwankil yi sanlcheꞌ tbeꞌ. Ox kꞌej tu niꞌcy chixmayeꞌ chiwankil yi cob inchakumaꞌtz na quil tzꞌakꞌlij amaꞌl tan chimukxeꞌn. 10 Ej nin cyakil wunak yi ateꞌ wuxtxꞌotxꞌ chitzatzink yil chiquim yi cob chakumaꞌtz. Ej nin tan yi tzatzin yi ateꞌ cuꞌnt, scyoyeꞌ eꞌchk oy squibil quib. Ẍchitzatzink, na stakꞌeꞌ chꞌon scyetz yil choꞌc yi cob chakumaꞌtz tan chibuchleꞌn.
11 Poro yi ticyꞌeꞌn yi ox kꞌejaꞌtz tu niꞌcy, eꞌ itzꞌijt junt tir tan porer Ryos. Nin ẍchiwutz cuꞌn cyakil wunak yi chijeꞌn txiclok. Wiꞌnin tzun eꞌ xobeꞌn cyakil wunak yi quilol yi quitzꞌeꞌn junt tir yi cob chakumaꞌtz. 12 Beneꞌn tzun quibital yi cob chakumaꞌtz jun yol yi choꞌn sajeꞌn tcyaꞌj. Je yoleꞌj: “Cajenwok tzaj tzoneꞌj.” Ej nin ẍchiwutz cuꞌn cyakil chicontr yi cyajeꞌn tcyaꞌj. Choꞌn cyajeꞌn tul noc sbakꞌ. 13 Ej nin te yi jun tkujaꞌtz, bajij jun chin wutzileꞌn coblajnob, nin wiꞌnin caꞌl baj loꞌon. Juk mil wunak eꞌ quim tan yi jun coblajnobaꞌtz. Ej nin tan yi xoꞌw yi ateꞌ cuꞌnt yi eꞌ mas wunak yi qui eꞌ quim, cyoqueꞌn tzuntz tan takꞌleꞌn chikꞌajsbil tetz yi kaRyosil yi at tziꞌn tcyaꞌj.
14 Yaꞌstzun yi caꞌp il yi sbajok. Poro at junt yi xomt tzaj.
Yi mbi sbajok yil tzꞌoc yi jukiꞌn chun
15 Ma yi toqueꞌn yi jukiꞌn ángel tan tocseꞌn yi tetz chun, nintzun ben wital yi na chitzan tan yol tcyaꞌj. Ej nin chin chiwiꞌ nin eꞌ bantz tan yol. Je xtxobil yi cyaleꞌj:
“Ja choꞌc cyakil tnum yi at wuxtxꞌotxꞌ,
jakꞌ caꞌwl yi ketz kajcawil,
nin jakꞌ caꞌwl yi jun yi bixbaꞌnt taꞌn.
Nin scawunk iꞌ tetz ben kꞌej ben sak.”
16 Ma yi junak cyaj wiꞌ banl wiꞌ yi cꞌolẍcheꞌ swutz Ryos nin eꞌ cuꞌ joklok swutz Ryos tan cꞌuꞌlajeꞌn iꞌ. 17 Itzun cyaltz:
“Taꞌ, chin cham nin iluꞌ teruꞌ.
At nin teruꞌ-tz sajleꞌn tunintz.
Ej nin cyaꞌl nin jun yi nink xcyeꞌ teꞌjuꞌ.
Ntyoẍ teruꞌ Taꞌ,
na ja xcon yi poreruꞌ,
nin ja xeꞌtijuꞌ tan cawuꞌn wuxtxꞌotxꞌ.
18 Wiꞌnin na chiꞌch chicꞌuꞌl cyakil yi wunak teꞌjuꞌ.
Poro ja opon yi tiempil tan toqueꞌnuꞌ tan chicawseꞌn.
Ntyoẍ teruꞌ Taꞌ,
na ja opon yi tiempil tan toqueꞌnuꞌ tan xtisyaꞌiꞌn scyeꞌj yi eꞌ almaꞌ.
Ej nin ja opon yi tiempil tan tkꞌoluꞌ yi oy scyetz yi eꞌ ẍchakumuꞌ yi ja chitxol yi tajbiluꞌ.
Ntyoẍ teruꞌ Taꞌ,
na ja opon yi tiempil tan tkꞌoluꞌ eꞌchk oy scyetzak yi eꞌ yi xansaꞌn cheꞌ, yi eꞌ yi na cyek ẍchiꞌuꞌ.
Quiꞌc na ban ko eꞌ nim nka eꞌ juy,
na stkꞌeꞌuꞌ jun oy scyetz chicyakil cuꞌn.
Ntyoẍ teruꞌ Taꞌ,
na ja opon yi tiempil tan chixiteꞌn cuꞌn cyakil yi eꞌ yi na chitzan tan poꞌtzeꞌn yi munt,”
cheꞌch yi junak cyaj wiꞌ banl wiꞌaꞌs.
19 Jakxeꞌn tzun yi templo, yi caꞌl Ryos, yi at jalen tziꞌn tcyaꞌj. Ej nin lajluch cuꞌn ban yi caẍaꞌ kale colijeꞌt yi quiwel yi yol yi sukiꞌnt tan Ryos scyetz wunak. Wiꞌnin xlitzꞌ baj cuꞌ-tz nin wiꞌnin jincaneꞌn ban. Nchaꞌtz wiꞌnin kꞌancyok cuꞌ. Ej nin icyꞌ jun chin coblajnob wuxtxꞌotxꞌ tu jun chin wutzileꞌn cꞌub abal.