Yi xnaꞌn tu yi dragón
12
1 Ẍchajol tzun tib jun xtxolbil tcyaꞌj. Iꞌtz jun elsawutzil tetz jun xnaꞌn yi i cunin kꞌej yi beꞌch tetz. Choꞌn at yi xaw jakꞌ tkan. Nin ateꞌn jun coron twiꞌ yi lacꞌchij coblaj txꞌuml teꞌj. 2 Chꞌon wiꞌ iꞌ, nin wiꞌnin na txꞌayneꞌ tan yi il yi at cuꞌnt, na txant tan tuleꞌn yos tuchꞌ. 3 Le rat nin mbajij junt xtxolbil tcyaꞌj. Iꞌtz jun chumam dragón yi cyak teꞌj. Juk cuꞌn wiꞌ at nin lajuj cuꞌn tucꞌ. Ej nin ateꞌn jujun coron te jujun wiꞌ. 4 Ej nin tan yi jeꞌ, saj masol wiꞌnin txꞌuml. Ej nin yi txꞌuml yi nsaj masol txant qui nicyꞌan cyen taꞌn. Choꞌn sajeꞌn joꞌlil jalen wuxtxꞌotxꞌ. Xcyeweꞌn cuꞌn tzun yi jun chin txucaꞌtz swutz yi xnaꞌn yi txant tan tuleꞌn yos tuchꞌ, na yi tajbil iꞌ iꞌtz yi nink baj yi tal niꞌ taꞌn yil tzꞌul itzꞌok. 5 Ma yi tuleꞌn yos tu yi xnaꞌn, xicy tzun yi niꞌ yi ul itzꞌok. Nin yi jun niꞌaꞌtz yaꞌstzun yi jun yi at tocbil tan chicaweꞌn cyakil jilwutz tnum beneꞌn tziꞌn wi munt. Chin cham nin iꞌ sbneꞌ tan cawuꞌn. Ma yi titzꞌeꞌn, jalcunin tajeꞌn majij tan toponeꞌn kale cꞌolcheꞌt Ryos tan cawuꞌn. 6 Inti xnaꞌn, nintzun el ojkujtz. Choꞌn toponeꞌn tul jun amaꞌl yi tzꞌinunin tuꞌ. Na at jun amaꞌl yi list tan Ryos kalel tzꞌaꞌteꞌt nin kalel waneꞌt tetz jun mil tu cob cient tu ox cꞌal kꞌej.7 Xeꞌteꞌn tzun jun chin oyintziꞌ tcyaꞌj. Na nin oc yi wiꞌtz ángel yi na biꞌaj Cyel scyuchꞌ yi eꞌ mas ángel yi xomcheꞌ teꞌj tan oyintziꞌ tu yi jun chin txucaꞌtz yi dragón biꞌ. 8 Oc chibnol quib tan oyintziꞌ poro quinin eꞌ xcyeꞌ yi dragón scyuchꞌ yi eꞌ tetz ángel, nin eꞌ el tzaj lajuꞌn tcyaꞌj. 9 Yi jun dragónaꞌtz, yaꞌstzun yi jun lubaj yi at nintz tiemp tzaj. Yaꞌstzun yi diablo yi Satanás, yi Baybaꞌn. Iꞌ yi jun yi na tzan tan chisubleꞌn cyakil wunak beneꞌn tziꞌn wi munt. Ja el tzaj lajuꞌn tcyaꞌj scyuchꞌ yi eꞌ tetz ángel yi xom chiwiꞌ teꞌj. Choꞌn chisajeꞌn joꞌliꞌn tzoneꞌj wuxtxꞌotxꞌ.
10 Beneꞌn tzun wital yi jiloneꞌn tzaj jun tcyaꞌj. Chin wiꞌ nin ban tan yol, itzun taltz:
“Ja wiꞌt opon yi tiempil tan chiclaxeꞌn yi eꞌ nitxajil Ryos.
Nin ja lajluchax yi bintzi nin at porer iꞌ.
Nchaꞌtz ja lajluchax yi at kꞌej Cristo tan cawuꞌn,
na ja el tzaj lajul yi jun txumul yolaꞌtz,
yi jun yi na tzan tan jaleꞌn cuꞌn quil yi eꞌ kajwutz.
Na ja el lajuꞌn yi junaꞌtz taꞌn yi skꞌejl tu lakꞌbal na tzan tan chixochleꞌn quen yi eꞌ kajwutz swutz Ryos.
11 Poro yi eꞌ kajwutzaꞌtz ja chixcyeꞌ te yi jun txumul yolaꞌtz,
tan tuꞌ yi nkꞌukeꞌ chicꞌuꞌl te yi ẍchꞌel yi Katxꞌixwatz yi el kojxuj swutz pasyon.
Ej nin nchaꞌtz ja chixcyeꞌ tan tuꞌ yi quinin nchixob tan xtxoleꞌn yi bintzi, na cyakꞌoꞌnt quib tan chiquimeꞌn.
12 Chitzatzink cyakil yi eꞌ yi najlcheꞌ tcyaꞌj.
Poro lastum yi eꞌuꞌ yi najlcheꞌuꞌ wuxtxꞌotxꞌ.
Nin lastum yi eꞌuꞌ yi ateꞌuꞌ wi mar,
na ja opon yi Baybaꞌn ẍchixoꞌluꞌ.
Lastum eꞌuꞌ na wiꞌnin na chiꞌch cꞌuꞌl iꞌ scyeꞌjuꞌ,
poro quiꞌt tzꞌampon tiemp tan toqueꞌn cawseꞌn.”
13 Yi tilol yi Baybaꞌn yi nsken wiꞌt opon lajuꞌn wuxtxꞌotxꞌ nintzun octz tan buchleꞌn yi jun xnaꞌn yi nsken wiꞌt talaj yi jun tal yi xicy. 14 Poro yi jun xnaꞌnaꞌtz nintzun akꞌlij cob chumam xicyꞌ, chi taneꞌn xicyꞌ jun qꞌuilqꞌuitx, bantz beneꞌn tan ew ib tul jun luwar yi tzꞌinunin tuꞌ, yi joylaj len te yi Baybaꞌn. Choꞌn cꞌaꞌchxeꞌn yi jun xnaꞌnaꞌtz tetz ox yob tu niꞌcy tul yi jun aꞌmaꞌlaꞌtz yi tzꞌinunin tuꞌ. 15 Poro el tzaj jun cꞌoloj aꞌ le stziꞌ yi Baybaꞌn tan biyleꞌn cuꞌn kloꞌ. 16 Poro nin oc yi txꞌotxꞌ tan ẍchꞌeyeꞌn yi jun xnaꞌnaꞌtz, na nin je cꞌapxuj yi txꞌotxꞌ tan bekꞌleꞌn nin yi jun chin aꞌ yi el tzaj le stziꞌ yi dragónaꞌtz. 17 Wiꞌnin tzun ẍchiꞌcheꞌn cꞌuꞌl yi dragón te yi xnaꞌnaꞌtz. Chaꞌstzun te yi toqueꞌn iꞌ tan chibiyleꞌn cuꞌn yi eꞌ xonl iꞌ, yi eꞌ yi na chiban taneꞌn yi caꞌwl Ryos, yi eꞌ yi xomcheꞌ nintz te yi ẍchusuꞌn Jesucristo. 18 Ma yi dragónaꞌtz choꞌn beneꞌn tzi mar nintzun txicyeꞌ cuꞌntz.