Yi cob txuc yi chin xoꞌwbil nin eꞌ
13
1 Beneꞌn tzun wilol yi jeꞌn muleꞌn jun txuc xe mar. Yi jun txucaꞌtz at juk wiꞌ nin lajuj tucꞌ. Tib yi jujun tucꞌaꞌtz ateꞌn jujun coron. Nin te yi jujun wiꞌ, tzꞌibaꞌnt eꞌchk biꞌaj yi na takꞌ chꞌon tetz Ryos. 2 Yi jun txucaꞌtz, i cunin leopardo,a poro yi tkan i cunin tkan oso. Ej nin yi stziꞌ iꞌ i cunin stziꞌ león. Nintzun akꞌlij ẍchamil tu kꞌej tan cawuꞌneꞌn tzoneꞌj wuxtxꞌotxꞌ. Chin wiꞌtz ajcaw nin ban. Poro yi dragónaꞌtz iꞌ akꞌon yi poreraꞌtz tetz. 3 I cunin quimnak jun scyeri wiꞌ yi jun txucaꞌtz, tan paj yi qꞌuixpnak. Poro ul yos tuchꞌ. Wiꞌnin tzun cyeleꞌn yab wunaktz teꞌj. Chaꞌstzun te xomeꞌn chiwiꞌ teꞌj. 4 Eꞌ octz tan cꞌuꞌlajeꞌn yi dragón na iꞌ akꞌon ẍchamil yi jun txucaꞌtz. Nchaꞌtz eꞌ octz tan cꞌuꞌlajeꞌn yi txucaꞌtz. Itzun cyaltz: “Cyaꞌl nin jun yi choꞌn nink ẍchamil chi taneꞌn ẍchamil yi txuqueꞌj. Cyaꞌl nin jun yi nink xcyeꞌ cyen teꞌj,” cheꞌch tzun bantz.5 Akꞌlij tzun amaꞌl tetz yi txucaꞌtz tan tocsal tib nim tu jilon, nin tan talcheꞌn eꞌchk yol yi na el kꞌej Ryos taꞌn. Nchaꞌtz akꞌlij amaꞌl tetz tan cawuꞌn tetz caꞌwnak cob xaw. 6 Ej nin oc iꞌ tan telseꞌn kꞌej Ryos na nin oc tan yolcheꞌn. Ej nin oc iꞌ tan talcheꞌn yi quiꞌc muꞌẍ tal xac yi amaꞌl kale najleꞌt Ryos scyuchꞌ yi eꞌ yi ateꞌ-tz tcyaꞌj. 7 Nchaꞌtz akꞌlij amaꞌl tetz tan contriꞌn scyeꞌj yi eꞌ yi ateꞌ tetz tajal Ryos. Ej nin xcyeꞌ iꞌ scyeꞌj.b Ej nin akꞌlij amaꞌl tetz tan chicaweꞌn cyakil jilwutz wunak tu cyakil jilwutz tnum yi at beneꞌn tziꞌn wi munt. Quiꞌc na ban mbi jilwutz yolil na chiyol, na ja cawun iꞌ squibaj. 8 Ej nin chocopon cyakil wunak yi najlcheꞌ wuxtxꞌotxꞌ tan cꞌuꞌlajeꞌn yi jun txucaꞌtz. Yaꞌstzun yi eꞌaꞌs yi qui cuꞌnak chibiꞌ tul yi planiy kale tzꞌibaneꞌt chibiꞌ yi eꞌ yi ẍchicambok te yi itzꞌajbil. Yi jun planiyaꞌtz, Katxꞌixwatz qꞌuil tetz. Ej nin yaꞌstzun Katxꞌixwatz yi txumijt tan Ryos le xeꞌtzbil tzaj, tan quimeꞌn tetz kaxel.
9 Ko at jun yi na el talmaꞌ tan teleꞌn xtxum tetz yi xtxolbileꞌj, tajweꞌn yil tzꞌoc il tan xtxumleꞌn:
10 “Yi eꞌ yi xomok chiwiꞌ te Ryos at eꞌ ẍchixoꞌl yi txꞌaklij presiꞌn ẍchiwutz.c
Ej nin at eꞌ yi ẍchiquimok tan spar.”
Chaꞌstzun te pasens na taj, nin nimit cuntunin chicꞌuꞌl swutz. Tajweꞌn yil kꞌukeꞌ chicꞌuꞌl te yi na cyocsaj.
11 Beneꞌn tzun wilol junt txuc yi chin xoꞌwbil nin. Choꞌn jeꞌn muleꞌn jakꞌ txꞌotxꞌ. Yi tucꞌ iꞌ i cunin tucꞌ jun neꞌẍ bak wiꞌ. Poro yi jilon iꞌ i cunin jilon jun dragón. 12 Wiꞌnin kꞌej iꞌ tan cawuꞌn jakꞌ caꞌwl yi bajx txuc. Nintzun oc iꞌ tan chixoꞌwseꞌn cyakil wunak yi ateꞌ wuxtxꞌotxꞌ tan chilokꞌil yi bajx txuc, yi jun yi qꞌuixpij poro ul yos tuchꞌ. 13 Toqueꞌn tzun yi caꞌp txucaꞌtz tan banleꞌn wiꞌnin eꞌchk milawr ẍchiwutz cyakil wunak. Nin xcyeꞌ iꞌ tan sajseꞌn kꞌakꞌ tcyaꞌj tan tuleꞌn wuxtxꞌotxꞌ. 14 Ej nin tan yi eꞌchk milawraꞌtz xcyeꞌ iꞌ tan chisubleꞌn cyakil wunak yi ateꞌ wuxtxꞌotxꞌ. Choꞌn tzun bnixeꞌn eꞌchk milawraꞌtz taꞌn swutz cuꞌn yi bajx txuc yi chin xoꞌwbil nin.
Yi nsken bnix yi eꞌchk milawraꞌtz nintzun cawun scyetz cyakil wunak tan chibnol jun teblal yi bajx txuc yi pitzꞌcnak yi ticyꞌleꞌn spar te wiꞌ. 15 Ej nin akꞌlij porer tetz yi caꞌp txucaꞌtz tan jalseꞌn talmaꞌ yi jun teblalaꞌtz nin tan taꞌweꞌn yol taꞌn. Nin cawunin yi jun teblalaꞌtz tan chibiyleꞌn cuꞌn cyakil yi eꞌ yi quinin chimejeꞌ swutz iꞌ. 16 Ej nin nchaꞌtz cawun iꞌ tan toqueꞌn jujun cyechl cyakil wunak. Quiꞌc na ban ko eꞌ nitxaꞌ, nka eꞌ tijlcꞌuꞌlal. Quiꞌc na ban yi ko mebaꞌ nka ric. Quiꞌc na ban yi ko pres chiwutz jakꞌ caꞌwl yi chipatrón nka chichuc na chicaw quib. Tajweꞌn tan toqueꞌn yi jun cyechlaꞌtz te chikꞌab nka wutz chiplaj. 17 Ma yi eꞌ yi qui nin chicujij tan toqueꞌn yi cyechl, quiꞌt nin akꞌlij amaꞌl scyetz tan cꞌayiꞌn nka tan loꞌk. Qui nin tzun akꞌlij amaꞌl scyetz yi ko quiꞌc cyechl, nka quiꞌc yi biꞌ yi bajx txuc scyeꞌj, nka ko qui ocnak yi numbril yi biꞌ iꞌ scyeꞌj. 18 Na taj wiꞌnin ajtzaꞌkl, nin na taj wiꞌnin xtxumleꞌn tan teleꞌn katxum te yi mbi na elepont yi xtxolbilaꞌseꞌj. Poro slajluchaxk ẍchiwutz yi eꞌ yi at cyajtzaꞌkl. Na yi número iꞌtz kꞌajbil biꞌ yi jun txucaꞌtz, nin yi número iꞌtz kak cient oxcꞌal tu wukak, [666].